不如唔好請

欽差駕臨我請飲

你欲進門先受審

送君一鍋埋卵飯

若種生機趁地腍

各位街坊、相信請帖你就收得多喇！之但係、唔知你又收過一張令你㷫過焫雞嘅請帖未？近日城中出現一張請帖、內容規定嘉賓提交身份證明文件、聯絡地址和電話、辦事機構名稱和職位、最近嘅半身照片一張、仲話明必須通過巡捕房調查和確認之後才准入場。相信呢款“事前先起嘉賓底”嘅保安請帖、並唔係人人都福份收得到架！吓、邊啲人收得到呢張咁巴閉嘅請帖？之唔係垃圾會尊貴囉！督爺為欽差大人擺洗塵酒、並廣發英雄帖邀請垃圾會尊貴做出席嘉賓。

坦白講、垃圾會班反派尊貴嘅名氣仲大過成蟲、佢哋嗰幅尊容就算化咗灰都有人認得出、況且公家資料庫亦貯存着該等人士嘅詳細個人資料、要起佢哋底話都冇咁易。咁又何必搞到請飲猶如召人去見工咁款？依我睇、呢單嘢、若非有人在保安問題上畫蛇添足而搞出這個大頭佛、就係有人借頭借路、趁着欽差大人駕到執劑杰嘢畀阿頭嘆。你話唔係咩？現在垃圾會尊貴已經陸續發出聲明、唔會出席呢趟宴會、免得食咗嘅嘢通通由背脊骨落喎！假如其他人同樣過唔到面子這一關、而索性齊齊杯葛嘅話、到時成個宴會場地只係清一式架忌冷、豈不是又變成小圈子聚會？咁搞法、恐怕阿爺嘅印象分又再打到扣都得啦！係嘛？所謂見微知著、連請飲都請到三尖八角咁款、試問仲講乜嘢共建和諧？難怪有人話、請飲請成咁、不如唔好請好過、免得連累阿爺嘅假都被丟埋喎！