2016年5月30日星期一

講獨本色



愛發噏風不是瘋
瞓醒依然在夢中
整天胡扯添陶醉
外邊稱佢做河童

涼茶杰見過德叔之後話、泛㒼四人代表會見德叔、代表阿爺確立佢哋嘅憲政地位。本來佢嘅講話係畀本地投家聽的。點不知嗰個唔知頭又唔知路嘅痴瘋就酸溜溜咁話、泛㒼四人代表(鎏藝卿、涼茶杰、受難可、托輪李)去見德叔和要求炒施威、令到佢周身唔舒服。痴瘋指泛㒼視本城嘅選舉制度如無物、兼且做法倒退、並聲稱泛㒼爭取的應該係「真普損」和本土自決、因為問題是源於政制、而唔係個人喎!呢嗱、呢趟痴瘋又確係痴唔晒、佢一聲問題源於政制而非個人、就當堂窒到滿口㒼主嘅涼茶杰“O”晒嘴、機乎講不出話來。呢嗱、呢啲就似偽本土真講獨嘅本色喇!

2016年5月25日星期三

只許見花叔不准見紅爺



護花反紅又一功
反紅反轉地頭蟲
此子廢能兼異相
兩筒鼻涕送春風

香梗中箭坐館四維聰日前跑到銅鑼灣口水神壇上香、只見佢口牙閘閘念念有詞、但聽來聽去都聽唔出佢噏乜。不過當佢咒人嗰陣時、就忽然口齒靈利起來。佢指泛㒼四人代表在“講人異志”被踐踏之際、私底下跑到德叔面前、仲衰到連凳仔都冇張坐、要企喺度念急口令、簡直係丟晒同道嘅假。四維聰還以譏諷語氣話、德叔接見泛㒼代表、並唔係如涼茶杰所講、中央確認佢哋嘅「憲制」地位、而係確立佢哋嘅「獻世」地位至啱。四維聰強調只有得到阿美妮娟之神庇佑、才能夠發動群眾力量推倒紅牆、粉碎唇齒角色、實踐講人獨蠟嘅主體性。

2016年5月23日星期一

阿爺唔敢開拖?




你有顧忌佢無拘
拆你招牌實冇衰
瘋癲理念身痕格
幼稚無知夾戇居

日前我與友人在某大教館瓊天餐廳嘆茶時、無意中聽到隔籬枱幾個年輕人講緊阿爺是非。其中有人話、坊間流轉嘅所謂“中央對付講獨要刀有刀、要劍有劍”嘅講法純屬嚇鬼、理由就係阿爺絕不敢冒外資撤離、以及泡沫經濟爆破之險、而出動街坊軍對付講獨嘅喎!呢嗱、唔知各位街坊對於以上嘅言論點睇、但我就覺得如果我係佢哋嘅父母就寧願生嚿叉燒好過生佢哋咯!因為呢班友仔根本上連阿爺是何許樣人都未知、就貿然去撩交打、分明係買板唔知埞。難道佢哋唔知到在南天門八狗六死一役之後、紅家曾經受到蕃邦集體制裁。之但係、在廿六年後嘅今日紅家已經變成地球上第二大經濟體系、而那些曾經參與制裁嘅蕃邦卻紛紛要求阿爺在經濟上支援佢哋。

2016年5月20日星期五

殺狼有待



諸君做事太荒唐
無事狂踩理不當
飯民豬仔齊炒作
同心協力去誅狼

適逢德叔駕臨本城、話咗唔嫁又嫁嘅飯盟四人代表趁着出席酒會嘅機會、要求炒施威魷魚、以及重啟紫荊改革。之但係、施威是由阿爺欽點出來揸莊、絕對唔係呢班友話換就換咁簡單。講到重啟紫改就更加戇居、事關推倒紫改嘅係飯盟、現在喊重啟又係飯盟、彷彿當正阿爺廷係一部點唱機、呢班友喜歡點那首歌、阿爺就唱那首歌。咁你話嘞、阿爺算係老幾?其實成班友棟篤企喺度傾談廿卅分鐘、根本上傾唔出乜嘢名堂來、大概亦只能讓大家表示一下姿態而矣!坦白講、城中發生咁多事幹、若然話阿爺到咗今時今日才派人到來收料、咁即係話佢仍然未有打算、真係講出來都冇人信啦!係嘛?!

2016年5月18日星期三

講獨



你在專注賺大錢
我來混吉搭沉船
諸君咪話唔緊要
一覺醒來便變天

據說台灣年輕一代知到中國很強、亦很害怕有一日解放軍會打過去、但是無論中國有多強大都與他們無關、因為他們絕不承認是中國人。據2000年嘅一項台灣民調顯示、當時大約有60%台灣人承認自己是中國人。但在2016年願意承認自己是中國人嘅台灣民眾只有16%左右。有分析顯示、這是台灣政治趨勢所然。當日國民黨總統候選人洪秀柱因為主張「一中同表」就被迫退出競選。這就難怪國民黨中人只會聲稱自己是台灣人或華人、而不敢直認自己係中國人。因此、有關台灣就快沒有中國人之說、並非無的放矢、而係一個警告。試想想、由2000年至2016年十六個年頭裡面、承認自己是中國人嘅台灣民眾數由60%跌至百16%、若然再過多幾年、可能連1%都沒有了!

2016年5月16日星期一

冇品皇室



欠人錢債萬千千
最叻靠度搭沉船
未曾深交𢲷爛腳
唱衰背後咒行前

近日北列癲傳來一則新聞、揭露去年阿爺帶同着一張價值三千七百五十億両銀前去拜訪事頭婆期間、雖然獲得主人家以世紀隆重儀式歡迎和款待、但原來背後係另外一個樣的。據說阿爺出訪前、天朝曾向北列癲要求容許隨行保鏢佩槍、以及禁止當地龍裔人士示威、結果被拒絕。在歡迎儀式中一名據稱是隨行翻譯員(北列癲稱之為保鏢)要跟隨阿爺登上事頭婆嘅金馬車時、亦遭對方保安人員阻止、而且曾經發生爭執。在幾日前、事頭婆在某個場合中遇上當日負責保安嘅女指揮官墮爾西時、兩人重談當日事件。誰知一向被視為慎言嘅事頭婆居然用“認真冇引”去形容當時情況、並指天朝官員對她的大使亦是非常無禮貌。當這段對話經媒體曝光之後、立即在國際上引起一陣嘩然。

2016年5月13日星期五

由議會雞講起



你令我不爽
我拆你間廠
鬥到失三魂
亂噏當告狀

呢嗱、紫荊城班議會雞玩嘢玩到江郎才盡、現在居然演起「唔望同富貴、只求齊閉翳」嘅無聊劇來。繼咕喱頭雀人借「開會比應酬更重要」為題、反對垃圾會主持人爭六成提早放人去應酬講得張專員之後、又輪到話咗唔嫁又想嫁嘅撞棍幫頂爺涼茶杰話、佢要去叫張專員炒施威魷魚喎!喂喂、人家張專員由老遠嘅北方跑到南方來、無非想搞個畀面派對與眾同樂、順便帶挈大家發財之嘛!你哋要去就去、唔去就算啦!點解硬係要睺住人家大杯酒大塊肉、吃得興高彩烈之際、就帶個馬桶人場當眾開大、搞到人人反胃、個個嘔餐死呀?

2016年5月11日星期三

不如唔好請



欽差駕臨我請飲
你欲進門先受審
送君一鍋埋卵飯
若種生機趁地腍

各位街坊、相信請帖你就收得多喇!之但係、唔知你又收過一張令你㷫過焫雞嘅請帖未?近日城中出現一張請帖、內容規定嘉賓提交身份證明文件、聯絡地址和電話、辦事機構名稱和職位、最近嘅半身照片一張、仲話明必須通過巡捕房調查和確認之後才准入場。相信呢款“事前先起嘉賓底”嘅保安請帖、並唔係人人都福份收得到架!吓、邊啲人收得到呢張咁巴閉嘅請帖?之唔係垃圾會尊貴囉!督爺為欽差大人擺洗塵酒、並廣發英雄帖邀請垃圾會尊貴做出席嘉賓。

2016年5月9日星期一

新豬鬥舊狼



同門不同道
固然爭莊做
搭上順風車
發圍兼起步

呢個世界真係無其不有、區區一個被遣忘了的手提包唔止牽起一場飛雞場抗議事件、而且被反對派利用來打壓阿狼、更令人出乎預料嘅就係演變成為另一場豬狼鬥一番。講馬廠智囊沙摟豬日前公開承認、今次重出江湖嘅目的就是要拉阿狼落馬、理由就係現在已經到咗不變不行嘅地步。嗱、沙摟豬口中嘅不變不行所指何物、怒在下估唔到。但係在三年前那趟豬狼鬥、亦係跟兩廠有關的。當時過氣講馬廠主持人尿龜忽然回廠、一腳伸開接班主持人江瓦王、然後由自己赤膊上陣指揮滅狼行動、迫得阿狼立即跑去向西廠求救。結果由京都南下嘅大姐大榴蓮冬在冧鎮使出一招隔山打牛將屎龜制住、並成就阿狼登上揸拂人寶座。

2016年5月6日星期五

天仙局



三家打龍通
上頂下又鬆
開槓包三門
自摸變出衝

噚日我在「瓊天」吃早餐時、無意中聽到隔籬枱三叔公同人講、日前范民、建仔、法師三人拉咗施威去金紫荊會所開雀局。臨行前、建仔仲掹埋豬柳倫去幫手斟茶遞水兼做埋跑腿。東圈第一鋪由施威起莊坐東位、法師坐南位、范民坐西位、建仔坐北位。作為施威上家嘅建仔採取影印機戰術、總之施威打乜佢就跟住打乜、誅到施威眼都花埋。南位嘅法師就起勢髮章比西位嘅范民、總之唔係供到九章、就係十二章、搞到施威包牌都包到手軟。如是者、建仔死誅、法師猛鬆、范民造牌、四圈尚未打完施威就已經清袋。施威在乾塘之下、惟有打電話畀佢老表遠平籌旗。由於施威頻頻求救而令遠平產生疑念、於是吩咐得光立即前往金紫荊會所看個究竟。

2016年5月4日星期三

驅狼行動



阻人發達冇得傾
道理唔通鬥大聲
不分晝夜齊炒作
芝麻小事震天庭

近日細圈不斷流傳、假如大圈堅決讓今屆揸拂人冧莊嘅話、將會有大筆注碼押在第三個參賽者身上。湊巧小田田在前幾日講、勇字抬頭是源於不滿小圈子擂台嘅制度、並鼓吹重啟制度改革(制改)之門。呢嗱、係人都知到今年九月垃圾會擂台大賽開打、明年就輪到細圈打擂台、完全冇可能在咁短時間內完成制改。如果小田田旨在垃圾會擂台大賽之前、講啲嘢出來搏取街坊支持是無可厚非。但弊就弊在未必人人都係咁諗、萬一被人在背後一篤、話佢唱衰那個奉旨辦事嘅細圈擂台、咁就犯下大逆不道之罪。所謂前車可鑒吖嘛!步大田田後塵、極其量都係冇得撈。但係好似啤啤熊咁、搞到要坐花廳就確係該燴咯!

2016年5月2日星期一

報紙館風雲



你威不及我威威
我企高時你跪低
呢個老闆無叉用
馭狗無方被狗噬

呢嗱、眾所周知、盟報嘅員工係出名夠惡。無論上至行政決定、下至人事變遷、大老闆講過都唔算數、總之員工唔鍾意就打起維護新聞自由旗號、實行集體逼宮。呢種恃人多而令老闆嘅行為、已經司空見慣。早前該報裁走一工頭、幾名專欄作家便帶頭在其專欄開天窗(交白卷)以示抗議。當資方要封窗時、職工會卻斥之為打壓言論自由。但江湖流傳、在那位工頭領導之下、盟報嘅業績不斷下滑危及公司利益。如果係真嘅話、資方裁員亦只係商業行為、根本上與新聞自由毫無關係。但係嗰班員工居然勾結咗七八個幫會來鬨其老闆。喂喂、人家間報館係私辦企業、唔似得公家電台咁、任憑班馬騮舞架!既然係做得唔開心、咁就劈炮咪鬼撈啦!再唔係、就索性買起間報館、到時莫講話開幾個天窗、即使成份報紙“白炒”都得啦!係冇?