2016年4月22日星期五

撲水 抽水 醒水



君欲籌旗我出錢
宏揚講獨免牽連
審度世情頂硬上
誰人共你發花癲

呢嗱、本來在紫荊城搞屎棍、係有好多人願意提供贊助嘅。之但係、一提起講獨呢家嘢、贊助人就會走夾唔唞。吓、點解?咪就係朝廷已經把講獨定性為反賊囉!換言之、邊個被查出暗中贊助講獨、嗰個人就係主謀、朝廷與之勢不兩立。坦白講、只有無知嘅小朋友才會在天朝如日中天嘅時候做啲咁反常嘅嘢、思想稍為成熟嘅人絕對唔會咁做。一般而言、贊助人養馬騮嘅目的、無非是將之作為跟阿爺討價還價嘅籌碼、如果真係搞到金紫荊變成廢柴、兼且要跟朝廷反晒面嘅話、絕非生意之道、所以投家係唔會與講獨扯上任何關係。在這情況下、講獨集團必然五行欠水。雖然水並非萬能、但冇咗水就一定會死人。因此那些碰了針嘅小朋友實行、今天的我打倒昨天的我、改口話自己並非主張講獨的。

從上述情況可以見得到、講獨既無根、亦無底、更無親戚睇、極其量只能算得上係一件商品。既然此貨無人問津、就惟有重新包裝以求銷路。至今仍然企硬嘅講獨團體、除非本身有雄厚嘅資金作後盾、否則休想在政壇上分得一杯羹。難怪半文錢(年初一大龍鳳主辦機構)兩名揸拂人、黃蹄兩和梁堅肥都要搵花大叔商量商量啦!俗語話齋、打仔不如打老逗吖嘛!今次朝廷嚴厲的劃出界線、目的大概是先搞妥班本地投家、然後再去應付花大叔。目前大概只有那些食飽無憂米嘅書生依然對講獨充滿幻想、而那位離開校園嘅痴瘋哥(齋講眾志書記)就冇你咁好氣、一於重新包裝再次上路。但諷刺嘅就係、反而飯盟一眾老江湖忽然變成老天真、見到講獨聲勢一時無兩便妄想埋人家嘅堆兼抽人家嘅水、於是紛紛改變策略自認本土以求埋堆。殊不知人家經過戰中一役嘅教訓之後不獨止唔領嘢、而且仲要重重的教訓班“縮公”一頓、罵佢哋只係一群毫無理想兼呃飯食嘅假本土政棍。飯盟呢趟都可謂老貓燒鬚咯!但係又唔怪得人嘅、正如班後生仔話齋、淨係坐在垃圾會投反對票係人都識啦!

10 則留言:

  1. 我都想睇吓佢哋點樣講獨......

    回覆刪除
  2. ☁¨*☆好友★。゚☾晚安♦・゚✬週末╠╣aΡpy

    回覆刪除
  3. 講得好…嗰班叔公叔父真係都幾縮㗎!
    佢哋都現時唔使收皮都係全靠啲縮骨功咋……

    回覆刪除
    回覆
    1. SHU兄,我唔能夠喺你個BLOG留言,唔知乜原因?

      刪除
    2. 依我睇飯盟陣中冇能人矣!

      刪除
  4. 打仔不如打老竇!
    打老竇不如阿爺吖嘛!

    回覆刪除
  5. 班泛民學者,一早就港獨言論撐班靚仔,話討論港獨無犯法.佢哋伸出友誼之手,無非係想抽抽水!點知班靚仔唔領情!

    回覆刪除
    回覆
    1. 飯盟班老餅偷雞不成蝕把米、仲要被班後生後省到立立令、都可謂笑死街坊矣!

      刪除