行李門背後玄機

車完大炮放飛機

被人篤爆嘆倒楣

勝在荒唐兼異相

陰謀背後笑嘻嘻

自從行李門事件曝光之後、飛雞工會一直以有人無視國際安全規定、向小職員施壓提供不合理服務。究竟在此事之中是否有人違法和違規呢？據日前垃圾會尊貴兼資深狀師韋進在一個電台節目中、就行李門事作出分析。他指那件行李是由航雞公司職員攜帶並透過安檢、然後才交到物主手上、法理上並無違反“同行同檢”規定、但若然行李有問題嘅時候、有關職員就要付上法律責任。因此問題重點並不在於安全問題、而係誰授權予有關職員替乘客攜帶行李通過安檢。但飛雞工會代表死撐話、過去案例中嘅失物都是電話、護照、證件等。呢嗱、呢啲咪就係鬼拍後尾枕、連唔講嗰句都講埋出嚟囉！試問一聲、如果遺留護照或證件、物主又焉能進入禁區呀？照咁睇嚟、呢單嘢都係針對人而非針對事。

不如改姓賴

講督老爺炒冷飯

屙屎唔出賴地硬

水客擾民人皆厭

莫將責任當麻煩

講督話、遊客多又被人鬧、現在遊客少咗又被人詐形。佢仲話、現在並唔係冇客源、只係城中蟻民嘅胸襟藏人家唔落、並且諷刺有人又要馬兒好、又要馬兒不吃草、咁係冇可能嘅喎！講督提醒蟻民、應該好好的想清楚到底須要幾多遊客才對。喂喂喂、督爺呀、督爺、早前蟻民唔妥嘅係嗰群滾水淥腳趕頭趕命嘅水貨客、現在店鋪老闆嫌少嘅亦都係水貨客而非一般觀光客。督爺嘅講法似乎將水貨客與觀光客混為一談喎！唔通佢近來改咗姓賴嘅？事實上觀光客與水貨客兩者之間係有天淵之別嘅。正常觀光客係絕對唔會打衝鋒咁拖住個篋橫衝直撞、更加唔會在一日之內來來回回跑數次之多。最歡迎這類擾民指數爆燈嘅水貨客、正正就是那群一窩蜂開店輔大做水貨客生意嘅老闆。但在受滋擾嘅蟻民眼中、那群水貨客就是有組織和有計劃嘅走私客。明未？

狼狗鬥一番

禦狼碰上花癲狗

道理唔通便講手

走入衙堂翻舊帳

話我醜時你仲醜

呢嗱、相信講古佬你就見得多。但係講古講到連當今天子都要封個官畀佢做嘅講古佬、唔知你又見過未？話說、年前罪惡城發生一宗掟波羅奇案。事緣江湖人稱善辯狼嘅禦用講古佬在榕樹頭開講其間、有一名綽號花癲狗嘅聽眾無端端扯起火來、並拎起隻波羅捩手向講古佬掟過去。只見波羅疾飛如電、並在講古佬身邊不遠之處落地開花、登時波羅釘四射、幸好未曾傷及任何人。之不過、講古佬條氣就十分唔順、於是喊人報巡捕房、指花癲狗企圖襲擊佢。就係咁、一狼一狗便鬧到上公堂矣！

撲水 抽水 醒水

君欲籌旗我出錢

宏揚講獨免牽連

審度世情頂硬上

誰人共你發花癲

呢嗱、本來在紫荊城搞屎棍、係有好多人願意提供贊助嘅。之但係、一提起講獨呢家嘢、贊助人就會走夾唔唞。吓、點解？咪就係朝廷已經把講獨定性為反賊囉！換言之、邊個被查出暗中贊助講獨、嗰個人就係主謀、朝廷與之勢不兩立。坦白講、只有無知嘅小朋友才會在天朝如日中天嘅時候做啲咁反常嘅嘢、思想稍為成熟嘅人絕對唔會咁做。一般而言、贊助人養馬騮嘅目的、無非是將之作為跟阿爺討價還價嘅籌碼、如果真係搞到金紫荊變成廢柴、兼且要跟朝廷反晒面嘅話、絕非生意之道、所以投家係唔會與講獨扯上任何關係。在這情況下、講獨集團必然五行欠水。雖然水並非萬能、但冇咗水就一定會死人。因此那些碰了針嘅小朋友實行、今天的我打倒昨天的我、改口話自己並非主張講獨的。

由促銷電話講起

機主在發愁

庸官冇計謀

萬家皆着火

唯爾戇兜兜

呢嗱、垃圾會嘅筍盤爭奪戰期近、一些討好蟻民嘅議題又係時候被派上用場。今次垃圾會尊貴重提加強管控人對人促銷電話活動。之但係、茄呢蘇大老爺話、咁做會打擊七千多名從業員嘅生計、須要時間去研究喎！嘩、此君言下之意、大有以斷人生計去揞住幾百萬機民把口之勢。喂喂、茄呢蘇大老爺、家陣冇人想斷人咪路、只係唔想自己再被騷擾啫！人家申訴專員早在2010年就已經提出規管人對人促銷電話、並建議政府將選擇權力交還給機民、讓有興趣嘅人可以自行申請接收促銷電話、讓無申請嘅人不再受騷擾。呢單嘢一講就已經六年架喇、依家仲話要拖、究竟官老爺係咪當百萬機民嘅要求只係個屁呀？

抗議督千金

無憑欠證鬥一番

機場訪客運路行

開聲自有人和唱

望求九月喫多餐

飯盟與雞總（飛雞及地雞服務員總會）合辦、以抗議督千金仗勢欺人為題、嘅一場示威活動、於上周日在飛雞場上演、一眾飯盟老叔父和老叔婆均齊齊撐場、都可謂聲勢浩大矣！之但係、弊就弊在那位傳說中受到迫害嘅主角（托軚空運店小伙計）竟然拒絕臨場現身說法。俗語都有講啦、冤有頭、債有主吖嘛！現在連原告都冇、難怪有另一群愛字堆人馬跑到飛雞場反指、今次有被告冇原告、分明有人刻意將小事化大、目的是借勢獎督爺拖下馬、而非關甚麼濫權不濫權嘅事。依我睇、導致今次嘅羅生門事件不外乎兩個可能性。第一、正如咕哩幫幫主咬人李所講、小伙計害怕被人秋後算帳才不敢露面。第二、如嗌講之星揸拂人高大賓所言、當事人可能係督千金老子嘅粉絲才會作出特別服務都未定嘅。

政棍炒作爭犯議題

瘦田冇人耕

耕開兩份爭

政棍搏倒流

芸香遇臭甖

身為狀師竟然人云亦云、將非洲肯瓦向天朝移交四十多名寶島籍涉嫌電話騙徒一事與三皮李被失跡混為一談、並胡扯城中寶島籍人士非常擔憂有朝一日會有同樣遭遇。這位垃圾會尊貴嘅講話、都可謂戾橫折曲咯。試問一個不犯他人嘅人、別人又點會犯他？基本上、肯瓦將一批由外國人組成嘅跨國罪犯、移交給有關受害民眾嘅國家審判並非私相授受、而係有例可援的。根據世界訴訟管轄原則、屬地原則、以及法庭便利原則、擁有優先審判權當然是嫌疑犯所在地肯瓦、其次是受害者所在地天朝、而嫌疑犯家鄉寶島只能排在第三位。由於肯瓦法例之中並無詐騙罪、所以除了以違反電訊使用條例控告他們之外、在詐騙方面是控無可控的。因此肯瓦政府將那批疑犯移交與之有幫交嘅天朝審訊是正常不過的。據知疑犯之中有一名龍裔花旗人、而該國政府之所以鴉雀無聲、大概是知到天朝所做的都是符合國際法則。

特薯特笨

無厘無頭滿天驚

江湖追殺冇人情

嬲得阿爺狂拍枱

打倒施威喊不停

日前保安大隊長話、空運公司職員替細小姐送個篋入機場禁區係特事特辦。呢嗱、問題就係在於“特事特辦”呢四個字身上。因為呢句話嘅潛台詞、就係非一般做法。按照今次情形看來、即係擁有特殊身份嘅人、就能享受特殊服務。可惜在今日仇富仇官嘅社會裡面、即使細小姐在要求被拒之後按照正確程序解決此事、但只要消息外泄、同樣有人大造文章狂轟濫炸一番。吓、點解？咪因為佢係督爺千金囉！所以話啫、在呢個惡劣嘅政治環境裡面、越係有權勢嘅人、越不可使用特權、否則必定會被有心人“特事特辦”一番架喇！

行李風波

阿女不依規

老父局挨批

滿場皆亂棍

早晚聽趴低

呢嗱、據說在幾日前督女進入機場禁區之後、才發覺自己件隨身行李遺留在禁區之外、於是要求航空公司地勤人員替她取回。期間身在現場嘅督太亦跟地勤人員交涉、而督女忽然將電話遞給地勤人員、直接跟電話裡面嘅督爺對話。後來由一名具有大撞幫背景嘅飛機師發動聯署向國際民航協會、國際機場協會、國際空混協會投訴、指機管廳聲稱航空公司職員替顧客送行李冇問題、是不合乎“同行同檢”嘅安全程序、並要求三大組織加入追究。雖然機管廳證實行李是經過檢查之後才交予督女、但一宗瑣碎嘅事就此變成國際大新聞、更加焫㷫埋班垃圾尊貴要求垃圾會開堂徹查、看看是否有人以大欺小。呢鋪都可謂陸雲霆睇相、唔衰攞嚟衰咯！

講獨係揼雞？

亂噏原來係揼雞

瘋言背後有所為

飯盟終於同口徑

齊心合力廢施威

連日來、痴瘋哥嘅風頭都可謂一時無兩、呢頭剛剛宣布齋講眾志（齋眾幫）開張、嗰頭又做埋講獨發言人、聲稱如果本城早有普選、就唔會有人搞講獨。可惜痴瘋哥講嘅話無根又無據、而且佢嘅發言資格亦備受質疑。首先、不知痴瘋哥從那裡獲得授權代講獨發言？其次、他憑啥去斷定有普選就冇講獨？看情形、痴瘋咁多姿整、無非是假借講獨嘅角色配合飯盟過施威一棟、指他才是萬惡根源而矣！此子最大本領就係想入非非、而且吹起牛來面不紅耳不赤、確實是個可造之才。難怪當日夏蝙蝠入主花旗會館時、司機陳和煲腍葉兩人極力向他推薦此子啦！

痴瘋又成風頭躉

你說我傻不是傻

取隻咬烏做老婆

天生注定無能勇

合家剷泥學種蔬

江湖盛傳、痴瘋日前到獅子錢莊開聯名賬戶不果、便在記者面前老屈錢莊以政治理由拒絕他的申請。眾所周知、錢莊是站在商業角度看待所有客戶、絕不會無端白事拒絕市民開設戶口、除非有人被懷疑利用戶口去幹一些不乎合錢莊要求嘅活動則屬例外。坦白講、既然痴瘋要開戶口收取損款、最保險就係去花大叔名下嘅錢莊開賬戶、起碼唔會被托手踭、兼且可保資料不會走光吖嘛！試問點解要去找非親非故嘅獅子錢莊呢？難怪有人話、政棍係靠無事生非而令自己個朵見報、並藉此提升知名度。因為當一名政客在政壇上無聲無氣嘅話、就即係已經玩完架喇！

鬥法

為了標松柴

狂轟企定挨

站邊不在講

還要賣精乖

最近亞太法術協會（亞法協）公開發聲“寸爆”青天大老爺嘅判決手法。該協會指出、參與去年「和尚打傘」嘅黃黨成員、除了被起訴者少之外、入罪律也不足半數。相反、那些反對「和尚打傘」嘅藍黨成員作出類似動作就罰得較重。亞法協指、由於起訴律和入罪律都比其它地方低、容易令人覺得青天大老爺寬鬆對待暴力行為。嘩、法協咁講法、分明係暗示青天大老爺雙眼嘅“嘥屎”生個唔夠平均、仲兜個圈話人家“重藍輕黃”添啦！係嘛？如果係咁就真係冤枉咯！咱家青天大老爺一向以公平、公開、公證見稱吖嘛！試問又點會係大細瞧呢？