當派糖成為習慣

派銀原來係老奉

收小個崩露愁容

只道庫銀不亂派

原來扮懵發噏風

呢嗱、着數呢家嘢、大家都冇嘅時候就好地地、一旦有咗之後就是非多多。舊時朝政府揸拂嗰陣、大帳房從不會向蟻民派錢嘅。自從大歸之後紫荊人眼見馬城府衙向蟻民派錢之後就大呷乾醋。就係咁、紫荊府衙惟有順從民意大派銀両囉！殊不知唔派由自可、一派就搞到連僑居外地嘅紫荊人都要派埋、結果鬧得烏煙瘴氣之餘、仲要被蟻民鬧爆。於是乎、紫府索性以免租、免稅、免差嚮這種間接派錢手段去滿足蟻民囉！點不知、當收着數成為習慣時、人們收小個崩都會唔妥府衙嘅。更大鑊嘅就係居然有輿論視揞口費為救濟金、公然指紫府免差嚮係益業主、亦有些尊貴喊政府派現金喎！呢嗱、明知行唔通都要喊政府派現金、分明係嘩眾取寵多於實際啦！係嘛？！

坦白講、無論是直接派錢、抑式是間接派錢都好、總之在下對其動機就是不敢恭維。府衙之所以派錢、無非是自知所做的皆未能令蟻民滿意、惟有利用些小甜作為揞口費、希望暫時穩住民情之嘛！之但係、呢種做法與斬腳指避沙蟲基本上是無大分別的。以其年年利用派錢塞住蟻民把口、倒不如認真地去搞好民生、以減輕社會上嘅怨氣更為上算。政府越係派錢、即表示越係冇決心去解決民生問題。某些人日日對住大氣層喊話暴亂與管治無關、簡值係侮辱市民嘅智慧啦！假如政管治當局能做到七十分或以上嘅話、社會氣氛肯定和諧得多。試問那些反乜反物嘅激進組織又點會有機會應運而生？咱家社會又點會變成兩極化咁可悲？以今日紫荊城嘅態勢看來、分明是利益駕馭政治、政治綁架管治、管治影響民生。假如官商政三方繼續各執己見不肯妥協嘅話、管治勢必一路惡化下去。難道管治當局真的連想都沒有想過這問題嗎？