鬧出個大頭佛來

拉布點人頭

流會當應酬

戇居兼撞板

前退兩堪憂

俗語有話、物極必反。在飯盟不斷拉布壓力驅使之下、茄呢蘇使出終極撒手鐧、宣布假如版權法再次被刁難便就此作罷。按正常情理來說、議案作罷理應中正飯盟下懷才對。殊不知一眾飯盟尊貴聞言後、人人驚青、個個發矛、成班友跳出來指責茄呢蘇以氣用事兼不負責任。從他們的反應看來、彷彿拉布、點人頭、流會等事情從來未有發生過似的。但話說回頭、若非茄呢蘇堅決寸步不讓、而亂制又唔係盲目支持議案嘅話、件事未必會鬧到咁薑。若然飯盟係真金不怕紅爐火嘅話、應該為拉倒這條所謂惡法被拖垮開啤慶祝至係。試問又使乜驚青成咁？

其實人家龔聯興早就己經爆響口、跟番邦商家關係好嘅係飯盟、並警告他們別妄想在網民面前做好人、而推亂制去做傻仔、否則就惟有阿蘭嫁阿瑞。點知飯盟班友只管娛樂網民、當龔聯興講嘅話係發開口夢。於是乎、飯盟玩拉布、亂制玩流會。但係茄呢蘇就冇佢哋咁好氣、忽然使出一招“烏蠅摟馬尾、一拍兩散”睇吓邊個真係咁夠薑唔怕死。與此同時番邦商界發聲、非常樂見新版權法立法成功。就係咁、飯盟忽然之間變成豬八戒照鏡、兩邊不是人。其實大老闆之所以長年大月關照着呢班友、無非是養兵千日、用在一朝之嘛！點不知原來班友仔養唔熟兼倒自己嘅米。試問如果你係大老闆、仲會唔會戇居到養狗咬自己？依我睇、呢鋪肯定係「大細雞」有變。基本上無人願意開罪四方財神、所以飯盟一定會作出遷就、讓新版權法通過。但係所謂遷就是否會令網民唔高興、那就要睇過至知了！