2016年2月19日星期五

暴亂背後



開牌過一棟
諸君齊入甕
造反冇市場
麻煩真金種

日前戰中廷走出來講風涼話、拒話初一暴亂與戰中無關、但轉過頭來又指、那次暴亂是因為講府當和平抗爭冇到所至。嘩、依佢咁講、豈不是文求不遂就要武攻?不過唔好忘記、社會係唔係戰中廷一夥玩晒嘅。莫講話老黃跟老藍所追求嘅嘢係唔一樣、就算係在下或其他人士所追求嘅亦未必相同。如果人人都以暴力去索求嘅話、咁就靠搶得啦、何必要政府維持治安?雖知到政府係有責任平衡各方利益、而且在平衡過程之中難免會出現厚此薄彼嘅現象、但係絕對唔應該以暴力威脅嘅。然而有一群禮義廉政棍跳出來替戰中廷背書、將上次暴亂入晒施威數。喂喂、你班友要整施威咪盡管去整佢囉、點解係都要指搵嘢賴兼拖晒班街坊落水啫?大年初一流流搞鑊咁杰嘅出來畀街坊嘆、真係大吉利是咯!

呢嗱、人所共知連拳打天下嘅山姆大叔都無本事去滅絕紅家、莫講話城中區區反派啦、係嘛?但係又確實有班人鍥而不捨的由朝反到晚嘅喎!講穿咗、無非都是為利益所驅使。因此、反紅是假的、煩紅才是真的。事實上、若不是有紅家存在嘅話、本城就會少咗很多就業機會。目前城中以依賴“真/假煩紅”維生嘅人話多唔多、話少唔少。顧主方面除了有本地的、也有來自神州和海外的。雖則顧主們目的各異、但共通點都是為紅家添煩添亂、然後從中撈得更多利益。大年初一上演嘅一齙本名為「六國大封相」嘅街頭劇又被人抽水喇!飯盟嘅一眾頭目、包括受難可、常無、搏揸旗、胡扯喂、涼茶杰等人夾硬將人家齙戲易名為「官逼民反」、都可謂禮義廉到極喇!由於施威被某些利益集團視為惹火尤物和眼中釘、本以為先除而後快、但又不敢跟老人家擘網根(反面)、到最終還是免強接受下來。但係、各位街坊認真唔好意思、明年又是換畫之年、為免有人冧莊、所以有心人必須多做幾台好戲畀阿爺睇、希望老人家能夠體會佢哋嘅苦心、答應換過一幅大家都睇得順眼嘅畫。既然係咁、你哋班街坊咪張就一吓囉!


21 則留言:

  1. 再咁搞落去,分分鐘嚟一場乜乜大革命,到時最好封關唔好放呢班人走……

    回覆刪除
    回覆
    1. 世事難料、惟有放長雙眼去睇就係咯!

      刪除
  2. 雖知到政府只係專貴維護
    阿爺及建制利益
    所以30歲以下
    深感無肋

    回覆刪除
    回覆
    1. 好似蠱惑仔爭地盤劈友甘、到最後還是要坐低傾掂條數。既然係咁、又何必一定要攞條命仔去較飛?

      刪除
  3. 域兄晚上好,
    大年初一就搞鑊咁嘅嘢出來,正所謂佛都有火,一於攞支前朝留低嘅狼牙棒出嚟,睇吓能否一振聲威,

    街頭六國大封相
    捕快傳媒齊遭殃
    向來物極必會反
    重蹈左仔嘅下場

    回覆刪除
    回覆
    1. 華娃兄你好、

      紫荊城搞成今日咁、官民皆有責嘅。

      新春佳節喜洋洋
      誰知搞到咁淒涼
      街頭盡是火遮眼
      縱是鐵人也內傷



      刪除
    2. 警民對立,最終只會造成兩敗俱傷。得益者並不會是任何一方。

      刪除
  4. 亞爺冷眼旁觀,如果做過左火位,可能會由換畫變冧莊。

    回覆刪除
    回覆
    1. 依我睇、呢單嘢背後可能有不為人知嘅蠱惑。

      刪除
  5. 域Sir,香港變成咁嘅爛攤子,邊個做特首都唔慌好得去邊咯。

    回覆刪除
    回覆
    1. Wai 兄、依我睇、今次只屬序幕、好戲尚在後頭。

      刪除
    2. 這個政府終日與民為敵,小心玩火自焚。

      刪除
  6. 俗語說:有錢使得鬼推磨,重賞之下必有勇夫。收錢去放火,收錢去掟磚! 揾快錢此其時了。

    回覆刪除
  7. 政客同政府衰埋一堆,吵吵鬧鬧無日無之,如果對佢哋表現著緊嘅話,正一蠢材

    回覆刪除
    回覆
    1. 其實佢哋只係各為其主、旁人只能睇戲咁睇矣!

      刪除
  8. 當日我送物資畀D學生,就曾經留底咗八個字畀佢哋,就係「勿忘初衷,勿忘信念」。我亦同佢哋講過,你哋嘅敵人唔係警察,唔係大陸人,而係現時香港嘅整個制度,例如係23條、國教同一簽多行等等……一開始成班年青人都好守秩序,立場鮮明,態度正確,但去到後來佔中三恥同某班無良政棍嘅加入,就令成件事開始變質,更加演變成後來嘅警民衝突、中港矛盾,整件事已經變成人與人之間嘅對立,而當權者同一班抽油水嘅政客就正在角落偷笑,真叫人無奈。

    回覆刪除
    回覆
    1. 政治本來就係污穢不堪、學生哥一旦接觸到就好難全身而退。所謂人在江湖吖嘛!

      刪除
  9. 另外,我實在很難再稱呼上面做「阿爺」,試問天下間又怎會有這樣無良的「阿爺」?

    回覆刪除
    回覆
    1. 無論係阿公、阿爺、抑或阿爸只是一個代號、是代表不同利益集團嘅一個代號而矣!

      刪除