常無話你知

如果冇有我

老幼都難過

閉翳咪嫌多

平常反惹禍

各位街坊、我係梁無常、但係我與舊時唱戲嘅梁無相完全冇關係嘅。江湖道上嘅朋友都喜歡將我個名倒轉來叫、故此人人都叫我做常無。嗱、開講都有話、各為其主吖嘛！我在垃圾會一切言行並不代表我個人、而係履行我對擁躉嘅承諾。由於我見人罵人、見物擲物、見布拉布、見柴拉柴、所以唔係累到班垃圾同僚人人陪我留堂加班、就係個個睇住我被“護送”出場提早收工鬆人。因此既有人羨慕、亦有人眼紅。雖然嗰啲患上眼疾嘅人都好想教訓吓我、不過又怕被我身邊嗰幾隻「鬥牛金」死口咬住唔放、所以啲人只能用個心罵我、而隻手就指着隻長毛公仔破口大罵、以求泄憤架咋！

呢嗱、就在兩日前之嘛、講府嘅勁打得大總管就係指住隻長毛公仔起勢罵“薪高福利厚、爛笪冇人有、開工鬥命長、費時兼立竇。”唉、咁鬧法、即係打橫嚟講嘅啫！眾所周知、班擁躉之所以抬我入垃圾會、無非要我唱反調、否則人家就唔會千揀萬揀、偏偏揀中我扮花旦啦！之但係、大總管卻繼續罵隻長毛公仔“月入九萬幾、燒鵝食左肶、開會唔耐煩、提早返屋企。”喂喂、唔係我想趁早鬆架、而係掙六成大哥派人夾硬押走我咋！我都話咗架啦、我同妳嘅立場係唔同嘅喎！擁躉揀我做代表、就係要我替佢哋發爛渣。如果我乖乖咁畀講府提出嘅議案話過就過、咁先至係失職架！點不知大總管仲係繼續罵隻長毛公仔“食君祿不擔君憂、正式係萬世唔修、懶骨頭不謀正業、仲咒我遲早揸兜。”大總管呀、大總管、妳到底明唔明架？加陣養我嘅唔係主上而係紫荊人、妳鬧我做乜啫？其實你咒我賺得嘥聲壞氣架咋！雖然我在妳眼中、係一碌不折不扣嘅頂心杉、但我班擁躉卻當正我係正義朋友。咪話我老鼠跌落天秤、下屆我又會以「糕票」當選、而妳就只能夠執定包袱、兼帶埋隻「黯然銷魂掌」返米字國刨薯仔皮。呢啲咪就係各有前因囉！正所謂“你罵我反常、我卻有市場、長長又久久、好過出雙糧。”所以話啫、破壞與建設皆無關宏旨、總之能夠留低下來、銀照逗、氣照喢、話之你反常唔反常、最緊要就係有市場吖嘛！係冇？！