2016年1月29日星期五

點只衝擊咁簡單



揼雞又禁錮
看來太可惡
勿當無厘頭
秘練震天鼓

日前金紫荊大武館又爆發學師仔衝擊事件。據說係代表學師仔出任當然長老嘅大炮因發放流料、撻着咗守在會議廳門外嘅一批火爆同門、而引發起一場集體衝擊。期間總教頭孖啡森和大長老將硬李等數人被困幾粒鐘。雖然學師仔不斷在門外喊將硬李出去對話、但會議廳大門外嘅一對門搊卻被人用掃把柄閂着、裡面嘅人根本無可能走出來。呢嗱、這種手法跟當年戰中期間出現嘅(高舉雙手、口喊和平、雙腳在猛踢對方上下五寸之處)招數猶如同出一轍。雖然宮能界代表孽猿從後飛身撲出來撤賴一切都係長老會嘅錯、但亦不能抹掉有人在非自願嘅情況下被禁錮數小時嘅事實。

2016年1月27日星期三

由天氣預告講起



唔怕貨比貨
最怕唔知錯
水浸眼眉毛
才知闖了禍

近日本城氣溫驟然下降、聞說這是近50年來最寒冷嘅一次。花旗天文台提早十日八日前就大喊十、指本城將於124日(周日)上午8-11時會落雪。扶桑自然跟住大佬吶喊、指本城氣溫將於125日(周一)跌至接近0度以下。然而我哋嘅天文台卻實牙實齒咁話、氣溫只會維持在9-11度之間、新界地區可能再低2-3度。點知好嘅唔靈醜嘅靈、在24日早上城中真的出現飄雪現象、而氣溫亦曾經低過0度。天文台惟有面懵懵咁、將預測溫度再三調低。呢鋪都可謂抬棺材甩褲、失禮死人咯!

2016年1月25日星期一

常無話你知



如果冇有我
老幼都難過
閉翳咪嫌多
平常反惹禍

各位街坊、我係梁無常、但係我與舊時唱戲嘅梁無相完全冇關係嘅。江湖道上嘅朋友都喜歡將我個名倒轉來叫、故此人人都叫我做常無。嗱、開講都有話、各為其主吖嘛!我在垃圾會一切言行並不代表我個人、而係履行我對擁躉嘅承諾。由於我見人罵人、見物擲物、見布拉布、見柴拉柴、所以唔係累到班垃圾同僚人人陪我留堂加班、就係個個睇住我被“護送”出場提早收工鬆人。因此既有人羨慕、亦有人眼紅。雖然嗰啲患上眼疾嘅人都好想教訓吓我、不過又怕被我身邊嗰幾隻「鬥牛金」死口咬住唔放、所以啲人只能用個心罵我、而隻手就指着隻長毛公仔破口大罵、以求泄憤架咋!

2016年1月22日星期五

又玩甩轆



博你糊塗又一招
刁橋扭擰過板橋
廢話連綿今古秀
七情上面唱通宵

擾攘多時嘅闆拳法第二讀、終於在大部份飯盟尊貴決席之下通過。常無話、由於二馬基未能用盡其發言時間、以致在休息室瞓覺嘅飯盟尊貴不能及時趕回議事廳、才被亂制派偷襲成功。常無強調錯不在二馬基、而係佢自己嘅協調工夫做得差喎!呢嗱、這種令人睇到嘔嘅(人數啱啱夠、票數一面倒)甩轆把戲玩完又玩、無非是要告訴大家、今次闆拳法之所以通過二讀又係純屬意外。嘩、無常咁就想蒙混運關、會唔會太過低估市民嘅智慧呀坦白講、假如闆拳法真係如飯盟所指咁窮凶極惡嘅話、今次班甩轆尊貴全都係千古罪人嚟啦!試問、點可能隨隨便便發兩句噏風當無數?

2016年1月20日星期三

勇武誤事



勇字胸前掛
吹來我最誇
買板唔知埞
仲要誇啦啦

唔知係咪城中嘅政治氣氛令到人人㷫烚烚、個個火攻心、芝麻綠豆般嘅小事動輒成災。在不久之前坊間流傳一個故事、講及一名茶客將舔過嘅茶匙放入糖罌內舀糖舔時、被茶餐廳老闆發現而爆發口角。期間有人相約到店外隻抽、結果餐廳老闆不敵受傷被送往醫院救治、而茶客就被帶返巡捕房落案控以傷人罪。本來以為事件就此告一段落、殊不知傷者居然不治而死、巡捕房惟有將案件改為誤殺案處理。換句話講、本來被控傷人罪嘅茶客將會面對殺人嘅指控。

2016年1月15日星期五

爛戲一齣



你既口糠糠
我來鬧爆廠
年年皆一樣
上演大隻廣

前日講督在垃圾會宣讀未來報告時、長無忽然抓住個曲奇餅罐飛身撲向演講台。點不知、長無在臨門一腳發軟蹄被保安人員制止、而那個餅罐則脫手掉到地上去。正當人人戥講督吃不了曲奇餅罐而唔抵之際、大隻忽然提起一枚臘燭頭長杆、一邊揮舞、一邊叫喊的直衝演講台、但剛走了幾步就被保安人員截住。與此同時、另一邊嘅慢搣忽然企起身大罵講督只管擦阿爺鞋而罔顧民生、並舉起一張寫有抗議字句嘅紙牌準備離開座位之際、便即被保安人員撳住。就係咁、呢三位仁兄又係被提早收工去矣!

2016年1月13日星期三

人性何在?



強把老人剝光豬
火酒亂噴智障兒
膠紙乳頭搣又貼
如此惡行理當誅

呢嗱、俗語都有講啦、受人錢財替人辦事吖嘛!之但係、在我們嘅社會裡面卻偏偏有種人呃飯食都唔在講、而且仲係呃得特別樣哀、特別乞人憎嘅。去年大埔區一家商辦乜橋護老院被揭發、職員將在露天平台上排隊等候沖涼嘅長者就地剝光豬、睇到鄰近街坊火都嚟埋而去投訴。跟住嚟又輪到元朗區慈善機構乜乜局轄下嘅一家特殊學校被人用手機拍攝到、一名女教師用消毒火酒噴向智障學生面部。剛剛踏入新的一年、沙田區乜乜輔導會轄下嘅嚴重智障人士宿舍的四名職工被揭發、先行將一名中年男性智障人士嘅上衣脫去、繼而以牛皮膠在其乳頭上連續多次貼貼搣搣、並用手機拍下整個過程。

2016年1月11日星期一

擳牙膏般的傳說


混來一片黑
兇吉難料得
看來無邊際
越聽越飄忽

蒸發事件越爆越驚人、繼兩名閣老“包括五兩升嘅「五人集體縮娼被捕」和牛奶彊嘅「五人販賣犯天條刊物而被蒸發」”嘅言論之後、另一位權威人士狀馬指出、三皮哥牽涉在一場宮庭鬥爭之中、並呼籲城中街坊無須驚恐、因為普通百姓不會有這種背景。狀馬以支離會頂爺剁人李為例、指他在城中宣傳「結束一家獨大」遊戲、但由於該宣傳並無流人中土、所以不會遇上蒸發。但問題係、此話嘅潛台詞是否指、若該等宣傳一旦流入中土、就會有人被蒸發呢?由其是電腦資訊發達嘅今天、誰敢保證自己嘅言論一定不會流入中土的呢?聽罷這幾位代表性人物嘅講話之後、反而多添幾分忐忑矣!

2016年1月8日星期五

蒸發傳說



蒸發疑雲罩香江
議員亂噏當幫忙
官家老爺懵了面
全城大眾眼光光

近日紫荊城爆發失踪疑雲、一家禁書店嘅老闆李三皮、以及股東和店員等、一共五人忽然先後離奇失踪。令人驚訝嘅就係、正當江湖上盛傳大內密探越境執行蒸發命令之際、宮能代表五兩升毅然跑出來闢謠、並引述江湖傳聞指稱、五名失踪人士皆是非法潛人內地偷食家鄉雞而被拘捕的。之但係、好死唔死、內地一份半官方媒體發表評論文章指出、雖然大內密探不能先將有關人等抬上轎、然後大搖大擺通過關卡進入內地、但總有規避法律嘅手段、在不跨越制度底線之下讓有關人士配合調查。呢嗱、雖然規避法律嘅講法幾得人驚、但卻能撇除五人在內地偷食家鄉雞而被捕嘅謠言。雖然五兩升知衰公開認錯、但三皮嫂就企硬、唔肯接受佢嘅所謂道歉之嘛!

2016年1月6日星期三

制水背後



鬧來鬧去鬧空墟
妖言之下有盲隨
今日兩營刀鋒過
頹成勢劣眾當衰

近日施威嘅所謂「喊城中各武林世家勿向八大武館泵水」嘅言論、在城中不脛而走、而且成為黃藍兩營互片嘅新焦點。有人指、施威嘅目的係要以制水方式、進一步打壓大武館嘅武術自由。但明眼人一看便知、呢種講法亦是言不由衷的。因為八大武館之所以能夠成為山姆大叔嘅花拳發揚地、並唔單止係水源咁簡單、更多的反而係心態上嘅問題。江湖中早有傳聞、武林名宿皮佬禮在戰中期間所泵嘅水、是遠遠比不上實際消耗。因此才會另人連想到、有可能是本地武林世家暗中提供水源。因此施威今次大概是向某些「當年著乸衣、今日食爺飯」嘅人物宣讀聖旨而矣!

2016年1月4日星期一

三両木鬥三両木



既然未能成一局
惟有劈去三両木
我召天師你招魂
何以人皆一鑊熟

日前大撞黨首領涼茶杰放話、指現屆講督施威委任美國張為大武館長老會頭領、目的就是要搗毀大武館維繫百年嘅食民地傳統、以及打壓所有大、中、小幼武館武術究發自由。最後、涼茶杰強調、施威做得如此霸道、其實已經曝露出其強弩之末嘅勢態。呢嗱、涼茶杰講嘅嘢係真唔係不得而知、但此語一出、自然又會被人話佢係有口話人、冇口話自已。有人直指涼茶杰旨在妖言惑眾、亦有人認為他講得半點都不差。然而、事實又係點嘅呢?

2016年1月1日星期五

二零一六



二零一五除夕夜,維港兩岸看煙花。
張張笑面齊呼叫,其中包括你我他。
時逢二零一六到,行個靚運笑哈哈。
社會若能安穩定,丁財兩旺有揸拿。