2016年12月30日 星期五

常無的不倫不類


高掛羊頭賣狗肉
小心千祈咪中伏
今日政壇多垃圾
踩着瓜皮實聽仆

心口長期掛着斷估華拉幅車頭相嘅丐幫幫主常無、擺明係反花家霸權主義嘅擁躉嚟吖嘛!點不知佢居然在垃圾會就職儀式之中打起黃傘(花家專為紫荊城革命度身訂造嘅戰中標致)做馬騮戲、並散發出一股今人聞之欲嘔嘅妖異之氣。眾所周知、斷估華拉(鴉根天娜裔反花家霸權先鋒)曾經是箍巴已故一哥卡斯𢱕反抗花家帝國霸權主義嘅老搭檔。如今常無居然心口挺着斷估華拉幅車頭相、而隻手就高舉黃傘嘅荒誕行為出來、難怪卡斯𢱕螺寧願早點歸西、冇眼睇常無丟人現眼啦!由此可知、常無嘅所作所為係幾咁「核凸」咯!

2016年12月28日 星期三

西狗又闖禍



唔養唐狗養西狗
不曉看家睇門口
只會惹來千般錯
累得莊家猛𢲷

自從首任阿頭老古董收養咗一隻西狗開始、紫荊城就再沒有太平過。呢隻西狗到處亂闖亂撞、唔係倒瀉人家籮蟹、就係打瀉人家杯茶、最近還跑去惹怒泛㒼班政棍、搞到人家發動城中所有喉舌作全方位攻擊、呢鋪都可謂煩死人冇命賠咯!西狗在七年前冇有識死、無端端闖人八婆會館搞散三王阿姐台戲、結果累到當時嘅阿頭啱曾都要挨罵。殊不知近日居然闖入京城古物晒冷館、靜雞雞將人家嘅珍藏古玩運返紫荊城、累到負責拉狗帶嘅大總管冧井被泛㒼當箭靶、狂拮佢濫職。咁你話啦、呢隻西狗係咪養極都養唔熟嘅呢、吓?!

2016年12月26日 星期一

跑馬仔傳說



你估我又估
靠撞冇辛苦
中央無表態
小心食詐餬

近日江湖最熱門話題大概就係阿頭跑馬仔咯!目前正式報名參選嘅人只有壺倌和葉柳。大賬房掌櫃抓錢華已經向縣府請辭、並正在等候中央批准。注於唔嫁又嫁嘅大總管冧井、但至今尚未提出辭職要求、看來是先要看中央反應、然後才作最後決定。穿紅褲子出身嘅爭六成依然高據牆頭試風向一時話嫁、一時又話唔嫁、總之耍來耍去都係耍那套迷踪拳。究竟誰才是真命天子就無人知曉。恐怕那些所謂貼近中央嘅消息靈通人所放出來嘅料都靠唔住。之但係、凡事總有一此蛛絲馬跡可尋的。

2016年12月23日 星期五

荒謬中的荒謬


未知真癲定假狂
有群茂利鬥荒唐
公然闖禍不思過
靠害街坊當幫忙

在大年初二零辰時分、荒唐縣新興獨派「半文錢」託辭替熟食小販爭取擺賣權、並趁機炮制一齙震撼全城嘅怒火街頭鬧劇。事後、坊間響起連串問號。那就是、點解替小販爭取擺賣權要當街縱火、以及使用暴力襲擊巡捕?點解只爭取區區幾天新年假期擺賣權、而不作長期打算?咁嘅行為算唔算係掛羊頭賣狗肉?暴亂期間女教頭牛小矋在「飛時卜」平台呼籲街坊積極參與、結果被裁判老爺判罰銀両抵罪。經此一役、牛小矋嘅名堂就響起來、而且在聚議堂贏得一個議席。按照常理來說、能覓得這一份薪津合共平均月入廿多萬両銀嘅筍工、應該好好珍惜才對。點不知、牛小矋卻偏偏在宣誓就職儀式之中扮烏龜扒行、搞到被縣長針對其行為人稟法院要求覆核。從犯下「玩誓」錯誤嘅奀症幫成員支那仔和扑嘢妹兩人被判冇得留低嘅情況看來、今次被覆核四人(牛小矋、常無、饒虫虫、𤓓三七)嘅形勢相當不妙。

2016年12月22日 星期四

殺到埋身仲唔知死



諸家贊成他必反
無須道理眼坦坦
呢群茂利呃呃騙
信上一成冚包散

當年紅家太祖帝話過、凡是敵人贊成的他們都反對。可惜吖、那些紅子紅孫人人向錢看、個個把他的話當作耳邊風。唯獨是反字堆件件緊記、隻隻奉行、而且已經達到戰無不勝嘅境界。日前總捕頭提出增聘捕快嘅要求時、白鴿標會首席師爺桃姐便指出、增聘新捕快無非是要為本城大歸廿載慶典壓陣、以防有人趁機滋生事端。話口未完、總捕頭亦承認係基於人口激增、遊行激化、加上反恐和防暴嘅須要、所以非要加添人手不可。記得在兩年前封街鎖路七十九天期間、巡捕房取消所有捕快休假、以及號召所在後備捕快出來助陣、尚且搞得𠸊𠸊掂、何故區區一天嘅大歸慶典就要加聘人手應付咁大陣仗?由此可見、今次招聘新丁極可能是針對反字堆作亂而做的。

2016年12月21日 星期三

判官亦瘋狂



強闖硬幹喊冤屈
野蠻老爺把我拮
幸得官說無須罰
全城彷似食忽得

話說、荒唐縣唔淨止係判官荒唐、連刑部司都係咁荒唐、以致荒唐縣城為當今天下最荒唐嘅法治之地。有一次地保會進行閉門會議期間、白鴿標總會嘅小頭目痴瘋許“自恃該會持有一道護身洋符”帶同一班人企圖硬闖會議廳、並且與睇場組人員爆發身體接觸。在一攻一守過程之中、兩名睇場員報稱被痴瘋許嘅無影腳踢傷。結果痴瘋許被判官判處「自我約束」一年。後來痴瘋許不服上訴、並成功推翻「自我約束」嘅判決。刑部司便以預防痴瘋許再次爆暴為理由、向高級裁判堂申請對判決進行覆核。點不知高級判官問、係咪逢人就判「自我約束」才對?高級判官話、睇唔到痴瘋許係暴力之人、並所疑刑部司究竟要防啲乜嘢?

2016年12月19日 星期一

你造王我搵銀


造王是假搵銀真
別怨登時斷六親
諸家建路吾家過
有人落疊扇風生

亂制指泛㒼一邊譏笑阿頭跑馬仔係特權小圈子嘅玩意、但另一邊又搏老命爭奪選委席位、簡直係精神分裂喎!另外又有人指泛㒼要造王、並呼籲所有架忌冷要齊心對敵、咪畀機會佢哋。唉、如果真係咁齊心、泛㒼又點會拿得325個選委席位、比上屆超出125席?當下泛㒼由茄呢啡躍升為第三主角、若然加上老搭檔資營取得嘅250席便有570席、佔總數47.5%。理論上、如果能再在亂制陣營中拉得2.6%人倒戈就sure win、即係贏硬架喇!之但係、亦有人話泛㒼造王係假、做生意才是真的。泛㒼大勝後、一面公開叫喊不排除投白票、而另一面又散播流言不打算派人上台參戰。這分明係商業宣傳格局、因為有人打算將手上嘅票擺上拍賣台由價高者得。無論是紅營或是資營那一方想贏、都必須好好的跟泛㒼商量一吓。呢趟都可謂嘅奇貨可居了吧!

2016年12月16日 星期五

四毒聚東瀛



到處揚港毒
聽來真矚目
聚會乃家常
無關一鑊熟

在下嘅老友戴恭保剛從扶桑旅遊歸來就對我講、扶桑似乎成為了天朝毒派(疆毒、蒙毒、台毒、港毒)嘅集匯地。據阿戴講、在1210日「世界吟拳日嘉年華會」長駐扶桑嘅疆毒、蒙毒在會場打正招牌擺設毒神壇供教眾參拜、而台毒和港毒就派遣頭目參加遊行活動。期間半文錢坐館黃提兩和㒼族幫坐館陳路顛兩人獲得當地嘅台毒分壇(禮燈龜之友會)嘅壇主永跚英樹引薦之下跟其它毒派代表見面。但奇怪嘅就係、維獨是五毒之中嘅風頭躉藏毒卻未見蒲頭喎!

2016年12月14日 星期三

無知可以推翻一切?



有兜覆核王
勢兇又夾狼
一聲唔知到
斷估當幫忙

相信係人都知到肚餓就要食、食飽要屙、食嘢要畀錢、屙就去廁所。呢啲普通常識大概唔使人教都知到。相信冇乜人會反對、宣誓係一件莊嚴而且認真嘅事。對嗎?呢嗱、就在剛才之嘛、專業覆核師長兜郭又跳來出表示要維護「郭家尊嚴」而向大法堂提出「撕法覆核」看看垃圾會監誓主任是否失職而導致出錯、並要求重新讓所有垃圾尊貴再宣誓一次。據長兜郭所講、監誓主任事前並冇向宣誓者解釋清楚“點樣至係啱、點樣至係錯”便涉嫌失職、亦即係話尊貴“玩誓”條數應該由監誓主任付責埋單才對。按照長兜郭嘅邏輯推算、任何人在犯案之前唔知到咁做係錯嘅話、就有權以「不知到」為理由向大法師尋求「撕法覆核」讓當事人從頭來過、否則就算判咗罪都要推翻。咁你話、荒謬唔荒謬?

2016年12月12日 星期一

施威棄權之迷


相嗌唔好口
繼而施辣手
風狂火勢勁
點到佢唔走

毫無疑問、施威就是總舵主眼中嘅反獨功臣。可惜佢人和盡失、莫講話在亂制裡面朋友唔多、即使在他領導嘅班子裡面、能跟他交心嘅人物亦係唔多覺。由其是與他一起共事嘅三大總管更加係貌合神離。甚至有傳聞指、有人假借閣老級人物之手暗中向總舵篤佢背脊。試問一個孤家寡人、又焉有可能做得出好戲來?因此今次他宣布棄權、即被反派視為老古董腳痛翻版。據阿邊個閣老講、總舵已經察覺到若不在小圈子選委「分餅仔」進行之前先勸退施威嘅話、肯定會有大批「餅仔」落到泛㒼手中。為免令泛㒼食得太飽而滯壞個胃起見、總舵終於在分餅仔的前兩日決定喊停施威。

2016年12月9日 星期五

施威宣布棄權




趁着亂制打瀉茶
泛㒼抬舉抓錢華
施威話咗唔拚命
葉柳連隨又開花

呢嗱、葉柳剛剛表示要打擂台、而施威就宣布放棄追求冧莊。呢場戲都可謂來得既急且快咯!從表面形勢看來、抓錢華剛剛揩到一身屎、葉柳上馬勢成為一枝獨秀、但實情又係唔係咁、則惹人聯想。其實大家都心知肚明、紅家會嘅家訓就係、凡是敵人擁護的我都反對。當下抓錢華嘅推薦人就係泛㒼、即使說不上是敵人、但更不是架忌冷。因此可以肯定講句、佢根本上唔係阿爺杯茶。但在數月前亂制派嘅資家大本營傳出、對於由誰人來出任下屆阿金紫荊頭跟總舵意見相左。期間有人揚言、假如到咗退無可退嘅時候、他們就會將所有注碼全數押到泛㒼選手身上去。從今次泛㒼破格支持揸拂堂嘅抓錢華打擂台看來、反映出泛㒼與資營之間嘅合作已經展開。

2016年12月7日 星期三

是誰在敗壞法治?



莊家捉放曹
老千有前途
遲來先殺盡
早着劈崩刀

呢嗱、掌權最失敗嘅地方就係做事無層次、等同一個人經常語無倫次一樣、想話唔闖禍都難。以紫荊府衙為例、今年大年初二嘅街頭怒火一案都已經開始審訊、並且陸續有人被判刑、但早在兩年前爆發嘅戰中一案依然毫無動靜。更諷刺嘅就係、戰中主要疑犯一個都未有被提堂、反而涉嫌毆打潑尿超嘅七名捕快就已被押上刑堂受審。喂阿哥、如果冇戰中根本上唔有潑尿超涉嫌被毆嘅事。萬一此案有人被判罪成、而始作俑者嘅戰中三妖和一眾幫兇就開香檳慶祝嘅話、到時就真係唔知紫府點向廣大城民交代咯!在戰中期間天朝喉舌曾經公開報導、已經掌握到證據、證實紫府嘅三大總管和十三部長之中有人與戰中分子私通。再加上、紫府處理戰中手法一向惹人質疑、如果話呢壇嘢裡面冇鬼、就真係撞鬼咯。如果我係阿爺、都會做嘢啦!係嘛?!

2016年12月5日 星期一

兩頭唔到岸



睇錯攤皮落錯注
天生殘視冇得醫
最弊兩頭不到岸
徒勞白幹陰功豬

呢嗱、自從白頭兜在公仔箱公開阿爺杯茶係「與講獨勢不兩立」之後、有心問鼎阿頭個位嘅人物似乎獲得明燈指路。就在剛剛之嘛、公家大賬房掌櫃抓錢華在垃圾會大舞台開腔之前、為了證明自己與講獨勢不兩立、便聲稱不會與已經被申覆嘅疑似講獨四人組(常無、重炎妖、羅三七、樓小蟻)對唱的。誰知他的聲明尚未講完就受到泛㒼尊貴集體炮轟、甚至連亂制都話佢唔啱。根據垃圾會法術顧間界定、在申覆未有定案之前、上術四人依然是垃圾會尊貴、是有權跟大掌櫃對唱的。這件事奇怪嘅地方就係、泛㒼已經公布委任抓錢華代他們去打「阿頭爭霸戰」擂台大決賽、但當他要飛起疑獨四人組時卻反遭群毆、更奇快嘅就係連亂制都喊佢認錯吖嘛!

2016年12月2日 星期五

代言人的啟示



嘴藐做代表
聞者皆喊妖
內裡有乾坤
未知曉唔曉

近日齋講出聲一哥白頭兜從京司歸來、並帶來總舵允許反派回鄉探親嘅訊息。可惜嘅就係、唔止係泛㒼唔領情、甚至連亂制都表現得嬲爆爆。在泛㒼眼中、齋講出聲只係一隻令他們厭惡嘅曱甴、所以向來都睇白頭兜唔順眼、自然唔會當佢所講嘅話係一回事。由其是一向做慣紅家會代言人嘅亂制、眼見自己個位被白頭兜呢個二奶仔取代、就更加係感覺得周身唔自在、㷫焫焫是在所難免。不過問題係、點解今次總舵會授意白頭兜將訊息帶回紫荊城、而唔係像從前一樣交由亂制派裡面嘅重量級人物代勞呢?當中又有啥含義呢?

2016年11月30日 星期三

立法會 垃圾會



堪稱極品劉小蟻
人家造反佢吹雞
昔日判刑錢代過
呢回撞板聽歸西

號稱“小蟻老師”嘅垃會新貴劉小蟻雖然在新主持人大口梁無知嘅情況下、為她安排重新宣誓而取得尊貴資格、但卻遇上紫荊城揸拂人施威向大法壇申請、要求大法判就她的尊貴資格重新審核。按照最新大人釋法規定看來、小蟻老師份工都可謂凍過水咯!難怪她公開發爛渣、指責施威落井下石啦!之但係、如果她當日沒有在宣誓儀式之中加插那些愚蠢嘅嘩眾動作嘅話、就唔會被人抓住隻痛腳來窮追猛打啦!係嘛?!俗語都有話、種瓜得瓜、種豆得豆吖嘛!所謂食得鹹魚止得渴、任何人都要為自己所做嘅嘢負責嘅。試問點可以去埋怨別人?由此可見、呢位老師連自己都教唔掂就去教人、簡直係誤人子咯!

2016年11月28日 星期一

肥彭反講獨?




大人釋法佢心噏
泛㒼處事欠邏輯
肥彭拍枱兼怒喝
如此落去聽執笠

呢嗱、雖然肥彭每次到來紫荊城都有人罵佢係攪屎棍。之但係、今次呢條攪屎棍忽然講出幾句人話來。肥彭話、宣誓係一件嚴肅嘅事、他自己每次宣誓都是很認真的、全世界都有規定、不能通過宣誓便不能就職、正如早前紫荊城有人犯上愚蠢錯誤而失去議席一樣。肥彭講得很清楚、紫荊城回歸天朝是不爭事實、如果有人要做講獨英雄嘅話、米旗人是幫不了忙的。相信大家都雞食放光蟲、知到肥彭絕對唔會為天朝講好話、佢只係擔憂米旗人在臨走之前在紫荊城打造嘅㒼主基礎被講獨玩殘、才會出言點醒那群瞎搞一通嘅蠢蛋。

2016年11月25日 星期五

豬八戒照鏡



你說我紅不是紅
中間著墨托水籠
一心求塊安身地
左右逢源侍西東

聚異堂開光之日的一場愚蠢嘅「正字騷」將整個政治形勢弄得高深莫測。奀症代表梁洞痕和位遊藝禎做騷做到失去議席都唔在講、更奇怪就係連被捧為主持人嘅大口梁都被牽連吖嘛!亂制派指責大口梁為破壞誓詞嘅人重新安排宣誓是越權行為、故要求他下台。泛㒼方面則指責大口梁拒絕為民選代表重新安排宣誓是瀆職行為、並喊他下台。總言之、今次大口梁猶如豬八戒照鏡、兩邊不是人就是。之但係、過氣聚異堂主持人爭六成大哥今次又力排眾議、力撐大口梁。據爭六成話、如果聚異堂主持不為破壞誓詞嘅人重新安排宣誓、就冇權宣布當事人宣誓不合格。按照爭六成嘅邏輯看來、大概係指法官不讓疑犯再次犯案然後再重新安排審訊嘅話、就無權判案咁解。連這種屁話都講得出口、難怪好端端一個紫荊城居然會淪為罪惡之城了!

2016年11月23日 星期三

絕代人版



國恥當賞光
腦壞褲開襠
愚蠢兼契弟
面懵博投降

自從奀症雙𡃁(支那恆和扑嘢貞)被高級法術院大法師踢出聚異堂之後、便惱羞成怒到處𢲷爛腳。除咗寫信翳過氣事頭婆恢復紫荊城為米旗國嘅殖民地之外、剛剛又寫信給寶島一姐菜英子要求收回紳界區所有土地。據扑嘢貞在信中指出、「北驚公約」和「南驚條約」兩約嘅內容皆不能涵蓋戒恨街以北嘅紳界租借地、所以寶島有權收回該區所有土地嘅喎!雖然奀症雙𡃁寫給前事頭婆要求恢復紫城為殖民地嘅信被掉入垃圾桶、但今次菜英子卻煞有介事般的把扑嘢貞寫給她信件交由有關部門跟進。由此可見、勾結紅毛鬼係嘥心機挨眼瞓、煲燶藥嘥心機、反而埋抬獨堆才能夠產生相得益彰嘅效用、又可以沾到人家嘅光彩吖嘛!注於實際與否、則另當別論矣!

2016年11月21日 星期一

肺噏怪談



難怪梁游皆唾罵
泛㒼老鬼眾思歪
今日黑桃演異相
胡吹亂扯當詼諧

昨日總舵主在秘撈國出席經濟會議之餘、抽出時間與施威見面、並跟他談論某些「自講」議題。然而、白鴨幫長老兼垃圾尊貴近身桃(桃姐)忽然跳出來、充當總舵主嘅義務翻譯員。桃姐話、總舵主喊施威繼續做好「綜合思症」、凝造出「社會共色」、緊決維護「祖閣統一」、其意思係指施威做不到要求、並勒令他不得推出任何「新證冊」來「薰化社會」、同時亦警告亂制人馬勿再挑動「社會懲緒」喎!依挑姐嘅講話來看、總舵主豈不是變成泛㒼頂爺?喂喂、桃姐、你唔係想當班街坊都係白痴嘅、係嘛?唉、咁就難怪剛剛墮馬嘅梁洞痕和遊藝貞都睇你哋白鴨幫唔起、在臨撤出垃圾會之前都要留書一紙、話明將來一定會返來跟你哋一班老鬼算賬啦!

2016年11月18日 星期五

痴瘋過大洋



小丑出差過大洋
跑到花家會奶娘
憑膝要飯家常事
周全禮待屁燒香

當撈侵尚未正式登上花家一哥寶座、奧黑馬嘅契小弟「世界第十名猛人兼思想家」痴瘋便急不及待、立即飛往彼邦扒低翳契哥。痴瘋帶給當撈侵嘅上契禮物就是「指控紅家會騎劫紫荊城法治、破壞自由市場和金融中心地位」和「要求當撈侵維持本城嘅人權、司法、以及法治」喎!按情形看來、痴瘋是要趴低以自己身體作為當撈侵踩過界干預紫荊城事務嘅橋梁。究竟這隻曱甴仔憑啥數據去指控、紫荊城的自由市場和金融地位被紅家會破壞?假如情況屬實的話、何解金融界和商界嘅大老人皆沉默、而須要由這個一竅不通嘅蛋散來當代言人?其實答案很簡單、那就是無中生有。君不見痴瘋嘅指控、跟花大叔在「男海」使出的一招「以維護航行安全為藉口、繼而派遣大軍在天朝家門口撩是鬥非」同樣是無中生有的嗎?難怪榕樹頭大主教陳倭軍都話、此子「更形」入格、唔做「看更」委實太浪費啦!

2016年11月16日 星期三

恆禎玩完



搏出位古靈精怪
被搊根議席輸埋
大嘴巴神憎鬼厭
再玩火遲早聽拉

呢嗱、由於支那恆和扑嘢禎嘅幼稚行為弄到自摸詐餬、結果連議席都輸埋。扑嘢禎一氣之下、指大法師受到大人壓力才會作出如此判決。另一邊嘅支那恆就話、要同當局捻到底。點知一查之下、所謂捻到底、原來係飛鴿傳書給前事頭婆、要求米旗佬出手反擊喎!咁你話嘞、呢兩條友係咪懵到上心口呢這大概叫作至死不誤矣!恆禎兩人冇運行本來係佢哋嘅事、但累起整個反派就確係唔應該。在高級法術院對恆禎嘅判決未出街之前、棍壇兩大陣營早就睺實佢哋嘅遺缺。城中泛㒼和亂制兩大陣營早就暗中開始部署、務求兩席齊得。如果一個唔好彩被亂制冷手執埋這兩個「熱煎堆」嘅話、等同廢去反派嘅武功、到時垃圾會就會變成亂制一檔獨大。如果搞成咁、就真係冇眼睇咯!

2016年11月14日 星期一

㒼塞



似殘似未殘
小妖亂法壇
滿城皆孽瘴
唔死一身孱

呢嗱、日前問卷聯頭目火雲師太在公開場合指、奀症嘅支那恆和扑嘢禎兩人挑起「畏安婦」傷痛喎!嘩、呢位師太咁樣講嘢、會唔會過晒火位架?喂喂、就算要打落水狗、都要打得其所才能夠令人信服吖嘛!若以火雲師太嘅邏輯來推算、挑起「架仔入侵神州」和「男驚大逃殺」、甚至更遠嘅「甲五海戰」嘅傷痛、豈不是全都要入埋恆禎兩人嘅數?嗱、唔怕得罪講句、恐怕架仔在中土「迫娘為娼」嘅時候、恆禎嘅爸媽都未曾出世喎!試問又焉能把「畏安婦」跟恆禎扯上關係?睇嚟、今次火雲師太擦鞋打錯臘、無端端予人話柄、上面唔得佢C至係咯!

2016年11月9日 星期三

以為係送儐



以為黑幫大送儐
睇真原來認錯人
佢被仇家掌摑面
當然又要發豬瘟

昨日法術界發動兩千多名身穿黑衣嘅人士上街抗議大人敕法。據御前大術師買田李話、大歸以來大人一共敕法五次、猶如在法術上砍了五刀、簡直係屎可忍時、尿不可忍喎!之但係、大術師公會阿一行運珠表示、大人敕法能夠令到法術更加完善亦是好事一宗。由此可見、法術界對於大人敕法亦有不同看法。不過有人踢爆今次參遊遊行嘅黑衣人並非清一色法界中人、其中混入不少來路不明嘅臨記、而且還包括來自法術署嘅公人在內。那就難怪上次㒼陣在坊間策動嘅反大人敕法大遊行時參加者只得一千之眾、反而今次法術界卻有兩千幾人參加了!

2016年11月7日 星期一

釋法



無論好不好
釋法已定稿
泛㒼呱呱叫
亂制說靠諧

呢嗱、無論你贊成抑或反對、人地釋法嘅結果終於頒布了!即係話、那些在宣誓就職儀式中犯規嘅講獨人士將不會獲得補行宣誓。亦即係話、即使已經補行宣誓嘅人士也不符合歸本法規定。因此尊貴夢破碎嘅人、除咗身痕梁和扑嘢禎兩人之外、還有劉小蟻。今次人地釋法帶出一個非常重要嘅訊息、那就是無論誰人膽敢觸碰紅家會底線必定自取其滅。同時亦話畀所有人知、究竟誰才是罪惡城嘅終極話事人。

2016年11月4日 星期五

熱臉貼上冷屁股



以為花𡃁羊牯
呢趟無端食詐餬
賺得徒勞兼廢事
惟有快閃冇辛苦

自從奀症幫嘅涼爽恆和遊藝禎兩人買板唔知埞、喊天朝為支那而開罪所有龍的傳人之後、以近身桃為首嘅一群泛㒼抽水高手齊齊充當觀音兵、在兩人身邊磅出磅入。殊不知恆禎居然眼高於頂、連囌都懶得囌班老叔父一吓。前日近身桃忽然變臉、公開指恆禎不喜歡泛㒼、而且特別討厭白鴨幫、仲話佢哋應該為日前強闖垃圾會造成嘅後果負責。嘩、在「肉麻」事件爆發之初、夾硬話恆禎只係以“輕鬆幽默手法宣誓”嘅桃大俠、何以忽然之間翻老臉呢?湊巧嘅就係、這邊廂恆禎兩人被踢爆在環仔區某大廈頂樓築新愛巢、那邊廂近身桃就調轉槍頭向兩人開火。究竟當中出了甚麼問題呢、吓?!

2016年11月2日 星期三

判頭也瘋狂



慣於堂前做公正
我講話時你要聽
今日我打我從前
鼓厲你來把命拼

日前胡判(高級明鏡堂嘅過氣大判頭)突然宣布要參加來屆揸拂人擂台爭霸戰、並帶頭在社會上牽起熱議。胡判寄語蟻民、不必害怕面對廿三法、因為總比面對各安法好得多。殊不知過了兩天之後、胡判的態度忽然起了180度變化。他說利用大炮打蟻民絕對不能接受、如果他打贏擂台成為本城阿頭嘅話、必定會為南天門“八狗六死”事件申冤。胡判仲話、假如時光倒退五十年、他亦會參加兩年前嘅打傘革命。因為連咁好玩嘅嘢都未玩過、實在太過落伍喎!

2016年10月31日 星期一

妖獸之城



此雞不是非凡雞
乃是盲巫面向西
推倒施威為首任
面對民生欠命題

昨日、在講錯電台主辦嘅口水陣節目之中、拍垃圾新貴樓小偽聲稱、施威係講獨幕後黑手和炒家。那位以「不守法並不等同不尊重法律」洗年輕人腦袋嘅涼茶杰就話施威係講獨之爸。理由係、若不是施威在「私訂報告」中狠批紫荊大教館刊物「鶴丸」宣揚講獨、社會上就不會有人討論此事。之但係、支那恆和爛口貞從未有被施威嘅「私訂報告」狠批過、但「肉麻」鬧劇不就是依時上演了嗎?在眾目睽睽之下將事實本末倒置和亂扣帽子、呢啲簡直係比小學雞更加小學雞嘅行為。如果話批評講獨嘅人就係幕後黑手、炒家、講獨之爸嘅話、人們就不得批評強姦、打劫、收買人命嘅事、否則佢哋就係慕後黑手、炒家、罪惡之爸矣!咁搞法、我哋置身之中嘅世界將會變成點?

2016年10月28日 星期五

赤的疑惑



十個馬桶九個蓋
來蓋去臭還在
看似是人偏是妖
蟻民躺着也當災

罪惡城內機乎每一刻都有人喊這裡被染紅了。但諷刺嘅就係、從來沒有人能夠拿出真憑實據來證明其所指。相反地、人們都見到廿三兜被推倒、國文教讀被搞垮、甚至連正字改革都失敗了!這足以證明、所謂染紅本城是何等荒謬之說。遠的不說、就以垃圾會擂台大賽來講、損毀會以防獨入侵為藉口禁止六萬琦參選、卻容許其他幾名講獨分子入閘。正當人們對這個安排感到不解之際、垃圾會就上演「肉麻」事件。紅媒亦在此時亦食住上、踢爆花家閣房部顧問拔幫瑞在兩年前嘅一次霍氏公仔台訪問中、親口承認花家透過盲指基金會(ND)提供銀両給戰中集團推動打傘革命、並由駐罪惡城總代理辦公室派專人參與其中。以上情節顯示出、罪惡城被染紅是假的、被染花才是真的。

2016年10月26日 星期三

天才與扮豬



以為就此博出位
點知原來做懵仔
此盤棋局參不透
未知兵凶勢又危

正當支那恆和爆粗貞嘅「肉麻」事件鬧得滿城風雨之際、兩人又高調飛去寶島跟抬獨集團摸杯底、彷彿驚死對手唔夠證據釘死佢哋係講獨分子咁款。目前形勢顯示、愛字堆正在努力爭取街坊籲名支持踢雙卒出垃圾會、揸拂當局亦嘗試以「撕法復合」手段阻擋雙卒入局、而亂制派則利用一切辦法阻延雙卒補行宣誓儀式、加上兩會錦衣衛和紅媒連日來對雙卒不圍攻、聲討之虛撼確係一時無兩。現在嘅問題係、既然明知到奀症係一個講獨色彩濃厚嘅組織、何解負責把關嘅篩毀會居然容許支那恆和燥粗貞兩人參賽?好嘞、到咗人家勝出並在宣誓儀式中玩嘢、當局又以大炮去打兩隻小蚊子。盲嘅都睇得出當中必有蠱惑啦!係嘛?!

2016年10月24日 星期一

反上腦



此子出世遲
未讀五經書
認架仔作父
拜花佬為師

日前有報導指、紫荊大教館門生會嘅過氣一哥陰敬鳳(波仔籍紫荊人)趁着出席架仔家一個由老外特派協會舉辦嘅屠龍大會之際、表示希望趁著花大叔重“反”亞洲嘅機會、搞一個由花家、架仔、講獨所組成嘅屠龍大聯盟、並以紫荊城為屠龍基地對付天朝。陰敬鳳聲稱、講獨、薑獨、撞獨三方大有合作空間。看來陰敬鳳係唔知到、花大叔在南海日都蝕緊大本。以花家目前咁嘅家底、根本上花唔起錢去打天朝。加上賓仔又變咗心、花大叔現在連出師都無名。喂喂、陰敬鳳、萬一真係打起上嚟、連累你老家波城嘅同胞墊屍底就唔好啦!講到尾、你都係在彼邦出生嘅波仔嚟、千祈咪累街坊呀!既然閣下唔鐘意紫荊城回歸天朝、倒不如躪返去波城、咪喺度靠害紫荊人呀!知冇?

2016年10月21日 星期五

法治已死



爾擒我放有緣機
余家法治太水皮
荒淫惡行得天佑
誅惡無力確堪悲

怪事年年有、今年特別多。怪事一、有一名特殊宿舍舍長被錄像機拍攝到與一名只得八歲智商女院友性交嘅過程、並且在受害人身上和衣服均發現染有該舍長精液、但最後戒律師卻認為受害人無法企出來作證、便以勝訴機會不大而撤消控罪。呢嗱、若以戒律師嘅邏輯來推算、謀殺案理應通通唔使審就放人至係。怪事二、某飛刀會東主涉嫌迷姦一名女顧客、但他否認強姦、卻承認交替非禮。判決師聲稱被告人品格良好、有生意人頭腦、以及不想判刑影響其事業為理由、輕判做三十日義工了事。難怪坊間質疑、假如受害者係戒律師或判決師嘅親人、仲會唔會咁輕易放生嗰兩壇淫蟲嘅呢、吓?!

2016年10月19日 星期三

鼓吹仇恨



樂禍又幸災
委實太不該
鼓吹仇與恨
終歸惹禍來

今日罪惡城果然係有政治冇道義、居然有媒體公然鼓吹仇恨。日前有一名女捕快在分娩期間出血過多而死亡、某媒體居然用上「黑捕有報應」呢類幸災樂禍嘅冷血手法將新聞發放出街。其實大家都知到、所謂「黑捕」其實是在戰中期間、皮佬𡅏旗下喉舌用來抹黑捕快嘅手段之一、目的是藉此去為那群封街銷路嘅政治盲流炮製出一個敵我分明嘅假象。雖則話係各為其主、但亦無須要對一名自己不認識嘅死者出言侮辱吖嘛!據說、這類鼓吹仇恨嘅行為、除咗明益那位每一刻都在妨礙龍的傳人進步嘅花大叔之外、恐怕對誰來說都不是一件好事。呢啲咪就係、司馬昭之心路人皆見、唯獨是政治盲流係睇唔見之嘛!

2016年10月17日 星期一

就快有大龍鳳上演



兩老到處口噏噏
打橫打掂夾依泣
莫謂齋噏無是處
車完大炮有金執

日前榕樹頭講古二老、賣田李和陳四姑、獲得袋鼠家邀請到其地頭表演相聲。期間賣田李指出、只要紅家會兌現「一個兩砌」罪惡城嘅年輕人就不會要求獨立、而陳四姑就話、袋鼠幫跟紅家會有交易往來、若要紅方遵守「各製異霧」嘅話、就非確保罪惡城嘅「一個兩砌」得以維持不可。呢嗱、依賣田李的說法看來、他一定是事前獲得講獨組織授權代表他們向袋鼠佬放話。之但係、在江湖上卻從來未有流傳過有件咁事。再講、陳四姑究竟憑啥理據將「各製異霧」和「一個兩砌」扯上關係?究竟講古二老又憑啥、認為袋鼠家有能力去左右紅家會嘅呢、吓?!

2016年10月14日 星期五

垃會開光大典



盲巫趁着花癲雞
勝過長毛路姆犀
開口夾脷唔生性
扑嘢不成面向西

呢嗱、俗語都有話、寧犯天條、勿犯眾憎吖嘛!殊不知初生之犢冇有識死、在垃圾會開光大典之中為所欲為而觸犯眾怒。在宣誓儀式之中、帶有濃厚講獨色彩嘅拚討派成員之中、有人披上「罪惡城不屬於天朝」字樣布條進行宣誓、有人將天朝讀成 XX Re-fxxking of XX、有人刻意將罪惡城讀成Crime Nation(罪惡國)、有人在誓詞中加入「不效忠XX政權」等語句。雖則話、拚討派在開光儀式之中鬧個不亦樂乎、若然當局要利用這機會剷除呢班人實在係講唔通。理由就係、既然當日篩委會扮盲許這些入閘參賽、今次垃圾會亦應該繼續扮聾讓他們順利人座才對。否則、篩委會就有必要企出來解釋、青年奀症和半文錢同屬獨派、為何涼爽恆和扑嘢媜兩人可以入閘、而獨係涼爽琦一人唔得?

2016年10月12日 星期三

ABC時間



倒梁不是玩泥沙
點解人人話佢差
錯在幫他唔幫我
鬧得龜孫遍地爬

呢嗱、如果話要換走施威相信很多人都不會反對、但若是換上那位歷史上最廢嘅財神抓錢華來當揸拂人嘅話、咁就同係咁講嘞。須知到、抓錢華嘅最廢財神封號是來自反對派、但今日反對派居然要捧他做揸拂人、咁你話係乜嘢意思呢?無它的、因為今時今日罪惡城只有嘩眾取寵之輩、而無領導之才。人們之所以要趕走施威、就是因為他是個鬥士。當他落場一刻開始就擺出一副格鬥架式、而且結下不少仇家。在過去四年裡面、罪惡城內嘅眾矢之的就是施威。大戶要趕走他、反對派要趕走他、亂制派內部亦有人要趕走他、江湖上一眾只見施威負面而不看其正面嘅政治盲流同樣要趕走他。因此、在形勢上看來、施威是非走不可的。

2016年10月10日 星期一

由垃圾會坐館講起



開會打龍通
收工趁早鬆
牙無三兩力
同歸假大空

江湖流傳、亂制派一至支持梁十八登上垃圾會坐館寶座、白鴨幫挑戰者小桃桃質疑、梁十八身為十八家大戶嘅受薪話事人、是否適合擔當此任。呢嗱、小桃桃嘅質疑是有道理的、垃圾會嘅決定對民生影響非常之大、如果由一名大戶界代表當垃圾坐館、對於基層個體戶來說確實不是好消息。例如垃圾尊貴在一項涉嫌劫貧濟富嘅議題上發動拉布戰、而具大戶背景嘅坐館爺卻剪布、究竟利益偏重於那一方大概不言而喻矣!不過垃圾會終歸是垃圾會、有幾多個尊貴係真正關心基層利益嘅、恐怕用顯微鏡都照唔到出來。因此無論由誰當垃圾會坐館、街坊都是懶得去管、這才是社會真正嘅悲哀。

2016年10月7日 星期五

瘟疫誰不怕?



自恃為革命之子
原來係過街老鼠
呢啖氣確吞唔落
惟有靠屈人蓋恥

某日暹邏收到可靠情報將有瘟疫帶菌者衝關、有關當局即時下令各關卡嚴加注意、並採取一切措施嚴防有人將瘟疫帶入境內。就在此時香皂眾痴嘅書記痴瘋從暹邏機場大搖大擺的向關卡走過去。關員第一眼就睇出痴瘋是帶菌者、於是立即將他隔離半日然後遣返罪惡城。期間香皂眾痴收到痴瘋被禁錮嘅消息之後、馬上要求戒律師出面追查、另外又要求暹邏給與合理解釋。更令人莫明其妙嘅就係、逢水必抽嘅白鴨幫又跳出來無的放矢。其長老小桃桃話、唔猜測暹邏唔准痴瘋人境係咪受到天朝壓力、但香皂眾痴就一口咬定、天朝曾去信向暹邏施壓。喂、阿哥、你邊隻眼見到架、堂堂天朝有乜可能出動國家機器去對付一隻曱甴?嗱、有證據就拿出來畀街坊睇、唔好齋噏當秘笈。更重要嘅就係、暹邏係一個主權獨立嘅國家、豈容別人在其出入境政策上指手劃腳?別把痴瘋托到咁高、小心佢孭唔起咁重飛而累死呀!知冇?!

2016年10月5日 星期三

出口成扑



阿姐一開口
誰敢認泰斗
大事欠揸拿
偷雞要就手

呢嗱、今日嘅新一代垃圾尊貴、果然比那群守舊嘅棍壇老鬼有出色得多。就在日前之嘛、垃圾新貴遊藝精出席李公大教館論壇時指出、當下城中年輕人連「扑嘢」嘅地方都冇、登時引發全場嘩然。但遊藝精卻不慌不忙、並解釋皆因年輕人收入低、畀唔起昴貴房租、所以才會搞成咁嘅喎!喂喂、藝精姐、有冇咁嚴重呀?依妳所講、莫非要為年前一對大學徒在大教館門外行人路邊當街扑嘢翻案乎?之不過、無論藝精姐所講嘅話有冇根據都好、就憑她今次夠膽憑藉「扑嘢」而令自己個朵紅遍棍壇、就足以令在下佩服。須知到、經此一扑之後「扑嘢姐」呢個外號恐怕以後想搣都搣唔甩架喇!

2016年10月3日 星期一

金紫荊何去何從



雖得神佑欠神威
未曾展翅被狗噬
先生教學頻呃秤
望子成龍變弱雞

呢嗱、怪事周維有、本城特別多。揸拂當局拷鑼打鼓禁止獨派人馬參與競選垃圾會席位、但結果有數名疑似獨派人士成功贏得議席。揸拂當局喝令城中教館不得縱容獨派向學徒洗腦、結果連小教館都淪為獨派洗腦場地。更令人費解嘅就係、戰中兩年已過、但搞手逍遙法外都唔在講、還要在剛過去嘅垃圾會爭奪戰之中上下其手左右大局。雖然有幾個小頭目被提堂、但戒律院嘅判頭只輕判當事人做義工、當中更有人被判緩刑、即係唔使還。所以話啫、所謂「出得來行、預咗要還」只係因人而異架咋!對於那些在戰中期間蒙受重大損失嘅街坊來說、這一判才是真正的和尚打傘。雖則話戒律院判頭也是吃人間煙火嘅凡人、但點都應該做得好睇一點、無謂搞到「戒律面前人人平等」淪為天下之大笑話嘅。係嘛?!

2016年9月28日 星期三

革命之花



紅家舊調花家唱
此調聽來真混賬
世界震得搖晃晃
到頭仍是夢一場

回顧紅太陽年代、紅家雖則一窮二白、依然能夠攞嚿錢出來幫助世界各地反「山姆霸權」嘅同志搞革命。當時紅太陽的那部「紅經」是世上唯一能在銷量上比美「勝經」嘅典籍。其實、當時都不知有幾多人崇拜變紅太陽、剛過身不久嘅牙刷拳王阿里亦是他的擁躉。勢想不到紅太陽那套「惡生無罪、造反有理」革命思想消聲匿跡於神州大地、卻在花大叔手中發揚光大。於2011年花大叔憑一枚茉莉花便令到北非和中東多個政權垮台。然而茉莉花雖然狂掃神州十三省、但結果還是失敗告終。當時紫荊城泛㒼組織為響應內地行動、便以反對抓錢華那份被指為是“史上最廢嘅財政預算案”剩機搞起茉莉花革命、結果同樣是失敗告終。在2014年花大叔改以一柄黃雨遮企圖迫紅家大開殺界、殊不知紅家早已識破此一著、並以吊鹽水方式將打傘革命陰乾。不過在2014年嘅一場太陽花革命之中、便成功在寶島為聽教聽話嘅菜英子鋪上登基之路了!

2016年9月26日 星期一

橫兜鬼打鬼



橫兜鬼打鬼
政棍皆肴底
世上冇公平
人皆咬耳仔

殖民地時期地政部有一張叫作“未來發錢藍圖”嘅密件、裡面所顯示的都是各個區域嘅未來建設內容。唔係呃你、在早在90年代、當在下任職公人期間、已經見到未來發錢藍圖上顯示有地龍經過古洞區的。如果我係發錢商、一定會提早趁平吸地。呢張圖之所以成為密件、就是要保證消息不會外泄。之但係、仍然逃不出發錢商嘅耳目、所以該區地皮登時有價。由於有了前揸拂人老董自爆“八問五”計劃而被整垮嘅教訓、如果我係揸拂人就會緊更加謹慎。今次橫兜呢壇嘢之所以搞到咁大鑊、皆因要個體小戶被迫遷、而大地霸就可以繼續佔用官地經營和等後安置。試問這種欺善怕惡嘅做法又焉能逃得出大眾嘅法眼?想人唔相信有官商香黑打龍通都幾難咯。

2016年9月21日 星期三

今日記招


你有金鐘罩
我備鐵布衫
欲看誰家硬
惟有鬥一番

呢嗱、金紫荊揸拂人施威帶領大帳房掌櫃抓錢華、車居部部長冰涼張、及兩名有關主管出席記招、解釋橫兜事件嘅來龍去脈。在整個記招嘅過程裡面、五大巨頭之中只有施威面露笑容、而抓錢華和冰涼張兩人則全程執到金都唔識笑咁款。故此誰人心中冇壓力、誰人心中有壓力、已經一目了然。不過如果有人諗住睇好戲嘅話、恐怕要失望了!因為大家都是成年人、即使有過節亦唔會愚蠢到當着全城老記面前揦高自己個肚皮畀人睇吖嘛!係冇?

2016年9月19日 星期一

重中之屁



有着唔拎點會肥
諸君咪話我剝皮
向來棺箱同一櫳
大眾何必挖是非

揸拂人上台之前曾經講過、解決蝸殼問題乃是轄區嘅重中之重。七年多過去了、人們在這個問題上卻看不到曙光。最近聚異堂新貴豬八萬爆大鑊、聲稱安全受到惡勢力威脅、才將掂州事件暴露在陽光之下。眾所周知、揸拂當局本來打算要在掂州打造一個能容納15萬無殼蝸牛嘅公殼邨。但當局忽然將蝸殼數目由1.7萬縮減成4千、理由就係未能找到合適地方安置該區嘅土地使用人。但奇就奇在、明明係有人非法佔據公家土地長達16年之久、但地管部查明之後只係將2/3公地圍封、並將其餘1/3公地轉祖給非法佔用人士。難怪皮佬𡅏嘅喉舌指揸拂人與響樹幫勾指結伴啦!咁搞法、想話冇流言蜚語都幾難咯!

2016年9月14日 星期三

由約見新貴講起



一件污糟兩件穢
呢鋪唔死就得米
向來世事皆如棋
是誰當家有數計

新一屆聚異堂新貴尚未登場先喊打、但金紫荊揸拂人一於好少理、繼續向新貴發出會面邀請、結果換來一面屁。拚倒派新貴在拒絕見面之餘、當中還有人說會面必須要有判官在場見證、以免事後被人抹黑喎!呢嗱、能講得出這種屁話嘅人擺明係嘩眾取寵之流。喂阿哥、本城何時發生過你所講嘅事?有就拿證據出來、咪個吹水唔抹嘴。呢壇嘢之所以無中生有、大概又是要盡其嘩眾之能事。話時話、發生咗咁多事、揸拂人應該知到自己嘅人緣係點、只要公開祝賀一下就得啦、可必擺假嚟丟?雖然話、聚異堂內大部份都係架忌冷、但實際上找不出幾個人係鍾意食涼粉嘅。點解連這麼樣一點自知之明都欠奉呢、吓?!

2016年9月12日 星期一

勿步大丈夫後塵



從前有個大丈夫
贏了牙較命嗚呼
今日猛男超積極
八萬歡呼當靈符

剛剛抓着八萬個like進人聚異堂嘅新貴豬八萬、繼報巡捕房全家遭受恐嚇之後、又以避開仇家追殺為由、表示要舉家遷入聚異堂居住。坊間有人質疑、呢壇嘢究竟係真唔係?但在下相信係真的、因為豬八萬嘅志向書清楚闡明、所對抗嘅係紅家會紫荊分舵、民生霸權、邊疆鄉語堂、以及陀地組織。相信係人都想象得到、咁搞法無疑係茅廁點燈找屎是也。呢嗱、就在月前之嘛、江湖上赫赫有名嘅黑幫龍頭大佬尚喜仔焫㷫咗條大水喉、就搞到天下無立足之地、惟有乖乖哋從外地返來向巡捕房舉手。試問區區豬八萬又有憑乜嘢本領去當萬人敵?無可否認、豬八萬利用蟻民嘅仇官仇富心理作為進入聚異堂踏腳石、的確選對了題目。之但係、樹敵太多始終都係唔化算嘅。

2016年9月9日 星期五

點解賓仔咁夠薑?


要悲唔要喜
分明累自己
若要發大財
戒甩堅離地

賓仔新一哥賭得蒂把口唔收已經係街知巷聞嘅事。今期又佢破口大罵奧黑馬係龜蛋。賭得蒂隔空警告奧黑馬別再將他看成係花家僕人、因為只有賓島大眾先至係佢嘅老闆。賭得蒂話、如果奧黑馬同佢見面時膽敢質疑其反毒政策嘅話、佢就會問候呢隻龜蛋。佢仲話、保證唔使幾耐隻龜蛋就會去拍他的馬屁。這番話傳到正在紅家出席“支二十風會”嘅奧黑馬耳朵裡去之後、兩人原先約好會面就被取消。現在嘅問題係、究竟賭得蒂點解咁夠薑公開焫㷫奧黑馬呢?有人話、賭得蒂係夜狼自大、但在下並唔係咁睇。

2016年9月7日 星期三

探索廿三條計嘅死因


空有鐵腳冇鐵腕
偷雞不成蝕老本
當年反轉廿三堂
贏得今日冇王管

紅家會紫荊分舵首屆香主鐵腳華為着維持轄區穩定、便提出合廿三堂之力去剷除花家幫嘅勢力。本來各堂揸拂人都答應支持。殊不知在決定性時刻富貴堂堂主錢得進忽然調轉槍頭摧毀全盤計劃。據說錢堂主是為了捍衛對外交流自由才犯天條的。之但係、在這個要銀唔要品嘅世界裡面、恐怕連阿茂都唔會相信。因為破壞廿三堂聯手等同跟總舵主過唔去、呢條係死罪嚟吖嘛!因此、錢堂主點解要明知故犯、一直都是個迷。直至日前遇見一位行商界嘅朋友阿邊個、並且在我追問之下才給予我一些啟示。阿邊個並無直接回答我嘅問題。他只反問:“假如你係我會點做?”就是被他這麼樣一問、我的疑團便解開了!

2016年9月5日 星期一

屎尿屁中的選擇



選擇當前屎尿屁
當然臭到無鄰里
無奈從中挑一件
但求不必忍毒氣

經過連番思想掙扎之後、結果昨日連新聞都未讀便跑去投票站投票。今午扭開公仔箱就聞得大妖蜓搞嗰個甚麼「泥洞計劃」原來係一部輸血機器嚟、搞到落敗嘅咕哩幫頭目受難可姐姐對住個公仔籍猛呻嗰部嘢輸錯血、令到佢同埋幫主剢人李因缺血而躀低。坦白講、假如選民尚須要佢哋嘅話、莫講話泥洞計劃啦、就算用鐵筆都撬唔走佢哋啦!係嘛?總言之、希望經過上屆教訓之後、今年當選嘅尊貴莫再將議事堂弄得比公廁還要臭、更加不要再令選民失望、並能夠實實踏踏的多做實事少作混吉。呢嗱、願念縱歸願念、但實際情況就難講矣!

2016年9月2日 星期五

矛盾世界



既愛討着數
又怕去操刀
全憑口水浸
注定冇功勞

日前波佬一哥李軒松演講時忽然不支、事後有消息傳出他不再參加下屆嘅一哥擂台爭霸大賽了!報導亦指出、由於花紅兩家在南海互鬥、李軒松乘受着選邊站嘅困擾。呢嗱、雖然消息就是這樣傳出來、但究竟屬真屬假則見仁見智。從李軒松在花家作客時針對紅家所講的一番話看來、只要是正常人都會理解為他已經站到花大叔那邊去了!況且李軒松自少受西方文化浸淫嘅、思維和價值觀傾向西方是正常不過的事。須知到、當年是李軒松的父親(已故波爸)李鋼腰擁抱着“發財抓紅家、安全抓花家”嘅願念、跑到花家要求花大叔重返亞洲的。作為接班人嘅李軒松、眼見花大叔在南海頻頻弄巧反拙、擔憂是正常的。因此他跑到花家要求奧黑馬加強對紅家嘅壓制、亦只不過是其份內之事、根本上是無須掩飾的。

2016年8月31日 星期三

抉擇時刻


全憑嘴打浪
議事冇心裝
問君何選擇
滾水當上湯

呢嗱、參與競選人民代表者、理應拿出自己嘅政綱讓選民參考吖嘛!唯獨是自家紫荊城嘅參選者係無須製訂政綱、只須要事先抓得對手嘅把柄、然後刷乾淨棚牙跑到口水擂台數臭對方、誰數得叨就是贏家。在下很懷疑、究竟紫荊人須要的是監督政府施政和提出建設性議題嘅代表、抑或係須要一群罵街能手闖入議事堂替自己出氣的呢?上屆議員變成鬥士、議事堂亦變成鬧事堂、而且被街坊冠以垃圾堂之臭名。其間發生了連串不理性嘅事故、大型基建項目受阻而令到大帳房花費大筆公帑去填氹都算了!之但係、連民生項目都被拖累、未免太過份了吧!難道紫荊人須要的就是這些?

2016年8月29日 星期一

禁鬼禁馬咩



二十三題冇得傾
國人教育門前清
改革不成添業障
戰中種下不了情

呢嗱、大概唔使問阿貴、各位街坊都知到上面四句嘢係講緊乜架嘞。冇錯、係講緊紫府在大歸之後嘅不濟現象。究竟點解會搞成咁嘅呢?答案就係、有人越玩越過界嘅結果嚟囉!也許你會話、並唔係所有街坊都係玩嘢一族。對的、實情的確只係部份人嘅愛好、而呢啲都係要同阿爺拗手瓜嘅人。湊巧地、這群玩家當中有些人是掌控着本城嘅重要樞紐、恐怕連阿爺暫時都只能扮眼唔見。相反地、如果呢班人要玩紫府揸拂人、咁就話都冇咁易。回顧當年、老古董唔係被人玩到殘晒之後才躀低嘅咩?

2016年8月24日 星期三

播種



港人亂講煽歪風
莊家猶如在夢中
教頭公然搞亂檔
今年講獨勢如虹

泛㒼力指講獨是當今揸拂人管治霸道而迫出來的、並在垃圾會擂台爭霸戰臨近之際、以趕走暴君為宣傳口號。呢嗱、咪話在下又撥冷水、呢種講法係人都知到係屁話嚟架啦!事實上、連阿水都知到講獨係由戰中催生出來、而戰中係花大叔在背後掟銀、再由一群大教頭利用三年多時間公開鼓吹而成的。換言之、講獨其實就是戰中嘅第二部曲、將來還可能有三部曲、四部曲、甚至五六七八九部曲。係人都睇得出、泛㒼在講獨方面是扮演着西南二伯父角色、明知錯而不反對、而且還暗中幫忙。如果唔係嘅話、點解每一次揸拂人出手對付講獨之際、泛㒼之中總有人跳出來指手劃腳、罵揸拂人違反這個、違反那個呢?於我睇、呢班友再唔趕快轉彎嘅話、到最後可能有人陸雲霆睇相、唔衰攞嚟衰咯!

2016年8月22日 星期一

冇眼屎乾淨盲



人家開飯佢開拖
一人一句有排哦
口水未乾人便㷫
實行掩耳冇囉唆

向來用電視送飯嘅兩耳婆昨日同我講、佢話唔知點解近日晚晚都食唔落飯、連街口嘅拉布大國手苦瓜騮都束手無策喎!呢嗱、有些睇落似病、其實又唔係病嘅症狀真係會考起神醫架!幸好異靈異靈嘅問米婆陳四姑剛剛經過、仲教兩耳婆去找佢嘅「巴啦打」綽號耷頭大主教嘅司機陳幫忙。真係講都唔信、司機陳果然能人所不能。佢只係站在兩耳婆面前耷低個「酸薑蕎」望住個地拼命眨眼、然後在兩耳婆耳邊講咗五個字、就令到她食欲大振。吓、司機陳講咗邊五個字咁駕勢?之唔係“熄電視食飯”囉!假如閣下有疑問嘅話、只要在黃昏吃飯時扭着個電視機、然後撳過去費趣台睇吓那個直播節目、就知到司機陳條計仔真係使得架嘞。

2016年8月17日 星期三

未算荒唐



你說我癲不是癲
喊打行頭鬧冧天
荒唐霸道得關照
好人蝕底理當然

上次一拳打出六萬幾個like嘅半文錢小將六萬琦本想話乘勝追擊、參加垃圾會擂台分餅賽。點不知臨門一腳被擂台篩委掟翻出門口。好夢成空已經夠晒激氣架啦、好死唔死、仲要被條老記問長問短、而且問問埋埋嘅都係夭心夭肺、令人扯火嘅問題、確係唔嬲就瓦燒。點不知、呢條老記原來係有心嚟贈“㷫”嘅、一味死纏爛打、趕極都唔肯走開。結果在四目交投之下、啲眼火咪爆晒出來囉!就係咁、有人就被另外一個人請食兜槌鍋面、而且食到一面都係𠻹。呢嗱、咁又好難怪嘅喎、人家幾經艱難才能上契畀花大叔吖嘛!啱啱至話失咗個表演機會、並且正在煩緊唔知點向花大叔交代之際、就被人窒到嘔咁滯、直程係潮州魚蛋、唔打唔爽啦!係嘛?!

2016年8月15日 星期一

衙門有鬼



天師䁯眼瞓
群鬼鬧紛紛
盲巫玩賭命
遲早斷三魂

怪事年年有、今年特別多。勢難想象、在這個年頭民間居然會過問衙門捕快升遷之事。早前開封衙門人稱煲爛梨嘅大刀頭升級不成劈刀唔撈。此事經過政棍輾轉相傳之後便在坊間發酵、甚至鬧到上垃圾會去。近日有心人請得前朝嘅蕃鬼開封府尹師伯曳千里迢迢從米旗國跑到紫荊城來跟賣田李密斟、然後狗捉老鼠管起開封衙門嘅內政來。此公仲暗示、今日嘅華督唔似得當年嘅洋督咁有正義之氣、所以應該修改條例以令開封衙門在不被干預之下運作。期間、未曾展翅恨天低嘅深閨怨婦陳四婆又跳出來、力指刀頭唔撈是極不尋常嘅事嚟喎!

2016年8月10日 星期三

儒子幼稚



無知不自知
注定要執輸
不如返學去
別再傻痴痴

早前講大教館嘅鶴苑仔話、一定要將本城脫宗、最多就係唔食大六菜、唔食大六豬、唔飲大六水、一切用自己方法去搞掂喎。點知佢話口未完、就被班同學仔話佢腦殘。然而當下居然又有人話、脫宗之後可以繼續向紅家買糧和買水嘅喎!喂喂、小朋友、橫掂都係口噏當秘笈、點解唔索性話將老祖宗逐出神州大地、然後霸起佢個位來坐、到時想點都得啦!係嘛?!話時話、雖然泛獨友人人喊脫宗、但並唔係個個要講獨嘅。當中係就係有人喊獨立建國、但亦有人話要重歸米旗。照咁睇嚟、呢班友根本上毫無共識、若把注碼押在佢哋身上、肯定輸硬都得咯!

2016年8月5日 星期五

大龍鳳前奏曲



戰中不遂搏偷雞
煽班門生再起圍
收起天書鬥法寶
慢調斯理壞天規

政治呢家嘢既黑暗又污穢、但無疑是一面能夠將政棍嘅醜惡嘴臉照得一清二楚嘅照妖鏡。日前「戰中三縮」之一嘅戰中廷公開喊話、指稱歸本法只規定垃圾會尊貴必須擁護歸本法、但並無闡明參選人都要擁護、故質疑選委會阻擋泛獨參選人入閘係濫用權力喎!唉、戰中廷呀、戰中廷、你老母湊大你咁辛苦、點解你總係學而無術嘅呢?試問、你阿媽嗌你喫飯、你係咪淨係扒飯而唔夾餸嘅呢?須知到世界上唔係所有有關連嘅事物都要續一闡明、因為人係有普通常識吖嘛!在下決不相信閣下不明此理。唯望你老哥合埋貴口、放過班後生仔吧!