司焫覆核

行家一開口

最好調頭走

大話無真理

只有硬拳頭

呢嗱、指鹿為馬是政客搵食嘅看家本領、早已係見怪不怪之事。但怪就怪在、連被視為正義化身嘅無上判官、居然都有雷同吖嘛！早前豹隱多年嘅判官甲忽然公開露面、並點名批評戰中鬥委娘例摑濫用司焫覆核機制之時、唔覺意瀄濕咗另一位歸田不久嘅判官乙件衫。判官乙當然唔順氣啦、於是乎反指司焫覆核係一個專門替老百姓檢查公共機構推出嘅政策是否違法嘅機制、人人都有權使用它的。之但係、佢就冇就判官甲所提及嘅「司焫覆核是不能挑戰縣府政策」這部份作出回應。呢兩位過氣嘅判官老爺、你一言、我一語、搞到小市民無所適從咯。不過現在問題係、究竟點解司焫覆核呢家嘢會霎時之間潮起來的呢？

江湖上廣泛認為、政治團體動不動就利用司焫機制去焫縣府、無非是要削弱「行企指導」呢個持之已久嘅制度。雖然話、當下紫荊城是行企、立扎、司焫三權分立、但由於立扎會被宮能組佔去半壁江山、以致反對派長期處於下風狀態。在無辦法迫使縣府取消宮能組嘅情況下、有人選擇咗司焫覆核這種焫得人痛又焫唔死人嘅做法、希望借此機制去挑戰講府政策、從而打擊其管治威信。咁做雖然可以拖慢縣府施政節奏、亦可以有效地打擊縣首嘅管治威信。但可惜嘅就係、咁樣做只能算得上係損人不利己。事實證明、拖慢基建工程除咗迫得縣府不斷為填氹而破大財之外、根本上啥作用都沒有。難怪坊間廣泛認為、咁搞法係有害無益嘅啦！唔單只係咁、某些政客以為利用代理人出手去惡搞縣府嘅房屋政策、就可以挑起基層勞苦大眾對縣首不滿、殊不知呢種與民為敵嘅手段瞞不過廣大市民。事實證明、那些幕後搞手除了成為輪候上樓一族嘅公敵之外、更加係有關黨派嘅負資產。這情況對於食四方飯嘅黨派來說、等同用掘頭掃把拍財神一樣咁戇居。依我睇、如果情況繼續這樣發展落去嘅話、來屆立扎會想話唔變成亂制派嘅一言堂都幾難矣！