2015年12月14日星期一

垃圾會布屎陣?




爆粗無分左右中
玩屎玩到滿堂紅
莊家氣量如水退
閒家酷愛發噏風

日前議事堂尊貴鬼槍梁話有人在佢嘅枱底搽咗一笪米田共、搞到佢條褲近膝頭哥位置葾崩爛臭。於是向主持人食奶謙投訴、但有人話那只係小事一宗。嘩、咁都話係小事?難怪人人都叫呢個議事堂做垃圾會啦!正如阿邊個話齋、屎嚟架、臭架、搵啲咁嘢嚟玩、有冇搞錯呀?喂喂、假如真係有人搞鬼嘅話、呢個垃圾會就要改名為茅廁會至得喇!

呢嗱、議事堂發生啲咁嘅事、確實令人匪夷所思。不過聽聞話、嗰笪糞跡應該係當事人唔覺意從外邊踩中地雷、埋到位仲翹足而坐、以致鞋底嘅米田共揩到冚個枱底都係、當佢嘅隔離左右都聞到陣陣惡臭氣味時、佢就不加思索賴人搞佢至喎!咁講都未嘗冇可能嘅、試問搞事者又怎能逃得過嚴密嘅監察系統呢?之不過咁、萬一真係有人在電眼沒有啟動嘅時候潛入去做手腳嘅話、就絕對唔可以掉以輕心架喇!試想、今次話就話玩屎啫、萬一下次玩鋪大嘅話、豈非杰撻撻?因此、呢單嘢、非查清楚不可。

講開又講、今日嘅教館教學不教德、以致爛笪文化充斥校圍、再加上社會上出現咗一大批政治盲流、而當中又有些人嘅做事作風越來越不可理喻。日前有人在議事堂門外嘅垃圾桶玩完爆炸、現在又話有人在堂內玩屎、對社會來說這無疑已經響起咗警號。咪又話在下危言聳聽、我總覺得某些人為咗一己私利、便利用自己嘅特殊身份不斷荼毒年輕人嘅思維、實在罪無可恕。奈何社會上嘅怨氣委實太重、難免會有人選擇跟當權者對着幹。為何我哋嘅社會居然淪落到「有政治、冇道義」嘅田地呢?大概唔使問阿貴都知到答案啦!係嗎?!

19 則留言:

  1. 咁搞法…第日開會每個人必定都要搜下身,時間少咗唔在講,咁就一定啱晒啲反對派!

    回覆刪除
    回覆
    1. 開會每個人必定都要搜下身 !
      每個女人必定都要搜上身 !!

      刪除
    2. 總言之、立扎會都好難有太平矣!

      刪除
  2. 哈哈!話明係垃圾會,D人唔要嘅米田共當垃圾放入去都好正常啫。
    爆垃圾桶、枱底米田共濕濕碎啦,遲D肯定仲有更杰撻撻嘅。

    回覆刪除
  3. 密室懸案
    要搵金田一攪攪

    回覆刪除
    回覆
    1. 如果唔方便嘅話
      近近地搵狄仁杰都得

      刪除
  4. ✬*¨★好友☁。*`⊹晚安好夢☾.•✫
    大家◇。゚*- ҈ -╠ ╣aΡpy星期二
    冬節*開心萬事得∴聖誕節快樂每一刻呢
    ❥・ ೋѼ*♥♡。・゚゚❤∵⊹・∴❣¨`*ღ

    回覆刪除
  5. 乜的人咁屎架!屎都玩?E!E!EEE!

    回覆刪除
  6. 玩米田共呢招的確新鮮,(那舊嘢就唔知係咪新鮮啦)但議事堂係咩地方呀,咁易俾人做手腳,若是有人傻起上嚟,咩事都有可能發生,睇怕要認真檢討下保安至得.

    回覆刪除
  7. 喺垃圾局內放屎係好高難度嘅事,一來四圍都有監控,二來如果早放,啲屎乾晒,來唔能夠達到預期效果。故此我相信係該名議員喺出面踩咗屎連自已都唔知,到蹺腳時揩到一褲都係,唯有賴三賴四!

    回覆刪除
  8. 域兄晚上好 ,
    我知邊個攪鬼,一定係 IQ 博士嗰個小雲同小吉做嘅,

    唔怕出陰招
    只要氣能消
    即使好不雅
    為求開心下

    回覆刪除
    回覆
    1. 華娃兄你好、
      講起來、小雲確係受歡迎得多喇!

      一招又一招
      獨怕攞假丟
      中招惟有賴
      扭擰又刁橋

      刪除