公家大帳房又填氹

人皆喊壓價

工程涉灶罅

超資又超時

過水冇有怕

開講有話、免強無幸福吖嘛、因此免強得來嘅嘢、通常都係靠唔住嘅。呢嗱、當初府衙擺糕鐵上垃圾會議事桌嘅時候、遭到一眾尊貴壓價。經過府衙左除右拆省去大筆製作費之後、議案才獲得通過。好嘞、現在工程造到欲罷不能之際、致話唔夠銀両支付餘下嘅工程費用。如果府衙不增加製作費嘅話、工程勢必爛尾。如果府衙繼續泵水、又唔知泵到幾時才可以滿足這個無底深潭。填氹呢家嘢並非糕鐵獨有、其它項目如沙中鱔、講豬獒大橋、西狗文化區等項目全部都差不多。事到如今、納稅人才發現、原來自己一開始就注定要當冤大頭。呢鋪都可謂、全民瀄濕身啦！係嘛？！

講開又講、事實證明由府衙所簽嘅大單、全部脫不了填氹命運。唔通呢啲就叫福地後人耕乎？今次糕鐵須要增加注資196億両、而講豬獒大橋又喊增加注資54億両、照咁睇嚟、公家大帳房已經變成公眾飲水機、邊個想水就來撳啦！雖然阿邊個高官話、當糕錢落成後、佢就會賊過興兵向有關方面追究責任、但目前要泵埋量後呢趟水、工程至有着落喎！但依我睇、都係聽住先囉！城中嘅大型項目搞到通通須要填氹、主要原因係府衙好大喜功、夾硬將幾個大型項目同時推上馬、以致銀根調動出現問題。但若然將所有錯處、全部歸咎於府衙還是有欠公允的。因為很大程度上係、有人以撕法覆核拖延工程、才令到造價飆升。咪話我又放馬後炮、人們明知拉布和撕法覆核是阻止不了那些大型項目、而且會令事情變得更糟、但偏偏要搞到全民陪葬才安樂。試問咁又何必呢？由於人們沉迷於損人不利己嘅遊戲之中、以致貯存在公家大帳房裡面嘅真金白銀、被人當沙石般的拎去填氹。呢啲唔係自作業咩？所謂精人出口、笨人出手。出口嘅黨派在上次大選拉上補下、成績尚且免強過得去。但出手嘅黨派則全部食白果。呢個故事話畀我哋知、天作孽猶可恕、自作孽不可逭。依我睇、以後做事之前、還是要先想想後果比較保險些。