中東命運難自決

拳頭打道理

越打越麻痺

放縱伊絲蘭

如今知彼味

自從鐵塔城受到恐襲之後、法攔犀大佬捕浪得立即遣派唯一嘅核動力航母前往中東狂炸伊絲蘭閣。本來跟沙俄冇偈傾嘅奧黑馬亦不得不向其大佬灰熊京尋求合作。還有一個自稱是全球最大黑客組織公開向該伊絲蘭閣宣戰、並聲稱將會對該組織發動全球狙擊、入侵和癱瘓其所有銀行戶口、以及點晒班恐怖分子出來。呢嗱、唔知各位街坊點睇呢單嘢、但在下對此等講法抱有極大保留。眾所周知、山姆大叔擁有一支全世界最勁揪嘅黑客大軍。若然黑客真的能斷絕伊絲蘭閣嘅財路、山姆大叔又豈會錯過？除非如陰謀論所講嘅一樣、有人要利用伊絲蘭閣去打殘拾葉派、而刻意對這幫人留手、否則冇理由唔去擺平佢哋吖嘛！

講開又講、以伊絲蘭閣而言、既無戰機和導彈、又無坦克和自走炮等火力猛嘅攻擊武器、但奇就奇在裝備先進嘅西方列強越落力打、伊絲蘭就越係強大。更令人百思不得其解嘅就係、西方明知獨靠轟炸毫無成效、但一直堅拒出動地面部隊。就算西方人條命仔比較矜貴而不落地搏命、但總可以提升相關國家嘅反恐戰力吖嘛！你睇、人家伊絲蘭閣在全世界抵制之下、依然擁有不少西方出產嘅刺針式導彈、反坦克導彈、以及多種單兵武器。除此之外、亦擁有千多部可以安裝重機槍和小形鋼炮嘅扶桑名牌豐田露斗貨車、甚至擁有一批花旗軍用嘅悍馬吉普車。更奇怪嘅就係、西方明知到伊絲蘭閣係依靠攻佔得來嘅石油田發大財、但西方聯軍並打那些油田嘅主意、花旗還說那些駕駛油車嘅司機是平民、所以連運油車隊都動不得。直至日前沙俄老大灰熊京向全世界踢爆、包括G20成員在內、有超過四十個國家嘅資金流入伊絲蘭閣之後、花旗、法攔犀才同意跟沙俄聯手轟炸伊絲蘭嘅運油車隊。按照花旗之前嘅講法、今次行動即係刻意去殺平民。究竟係乜嘢原因令到奧黑馬和捕浪得改變主意嘅呢、吓？！