Band 1 大教館

學武邊度好

靚大最靠譜

教頭多能士

學師跳都舞

日前見到阿黃唉聲嘆氣、機乎連樹上嘅葉都被佢呻埋落地。佢話佢個寶貝仔學藝嘅嗰間恕忍大教館原來係浪得虛名嘅喎！阿黃仲話館中嘅教頭質素良莠不齊、而有咁啱得咁橋、佢個仔跟嘅師父係呃飯食嘅一類教棍。咁又好難怪阿黃嬲嘅、佢辛辛苦苦供個仔入大教館學藝、無非係望個仔成才之嘛！殊不知、原來佢個仔跟嘅師父係泥鯭充正斑、張教頭證仲係流嘢嚟。搞到他銀両就花咗唔少、但係個仔就乜嘢都學唔到、仲跟玩師兄弟走去瞓街、真係唔嬲勢係假啦！佢問我知唔知邊間大教館係 band 1 嘅、因為佢想幫個仔轉館喎！

相信各位街坊都知到被列為band 1 嘅中級教館係乜嘢貨色嚟架啦！但你又知唔知到 band 1 嘅大級教館又係點樣嘅呢？吓、邊間係 band 1 大教館？之唔咪就係素有專出靚男嘅嗰間靚大囉！嗱嗱、別以為靚大呢個 band 1 資格係浪得虛名呀！嗰度有個教委自創咗一種叫作「一步登天」吓獨門絕技、係可以縮短門生嘅學習期、提早打出木人巷成為武進士、仲慳番好多學費添架！本來靚大仲有一位綽號三隻手嘅助理副總教頭係擅長複製大法嘅。每當有須要嘅時候、佢就出動第三隻手將他人嘅武功秘笈加以複製、然後當正係自己嘅獨門絕招傳授給門徒。可惜有人眼紅佢嘅成就、而迫走了他。不過靚大嘅門徒當中係有好多精英分子嘅。呢班精英除咗喜歡在館內開跳老舞派對之外、即使在言討會這種靜態場合之中、也不忘對着班館委大跳其老舞、總之跳到盡興為止就是。咁你話嘞、呢家 band 1 大教館係咪名副其實呢？喂喂、閣下嘅公子或千金搵到大教館未呀？如果未嘅話、不防考慮送佢哋入靚大啦！即使學唔成武功、都可以練得一身跳老舞嘅本事吖嘛！