人情冷暖話當奴

風光過後了無痕

一沉萬踩箇中人

往日功勞今日過

滿盤墨水潑一身

擾攘了三載嘅「貪嗔痴案」終於有新發展、前日過氣金紫荊揸拂人當勞噌（下稱阿噌）終於被開封府控以兩條行為不該罪。坊間流傳指阿噌今次被控行為不該罪、最多就係被送到大池塘跟佢嘅結義兄弟詩人許團聚、假若被控以乜乜勾結罪而又入罪嘅話、分分鐘提早埋單都有可能。之不過咁、阿噌是否罪成暫時尚未知曉、但人情次暖勢態炎涼就可見一斑矣！莫講話一向唔多妥佢嘅人齊齊跑出喺佢身上曬靴、甚至連佢屋企舊日嘅伙頭都跳出來唱佢用隔年月餅打賞家丁。喂喂、各位阿哥、阿姐、就算係落水狗、都唔使打到咁盡嘅、係嘛？！！

自從歸田之日起即被冷落嘅阿噌今次忽然獲邀出席升旗禮酒會、而且被安排登上主禮台向在場人士祝酒。可惜嘅就係、喺咁熱鬧嘅環境裡面、人人對阿噌敬而達之、他那張熱情嘅面孔亦只能則到人家嘅冷屁股上面去。唔單只當年曾經跟佢搵食嘅人扮睇佢唔到、即使昔日同佢稱兄道弟嘅抓錢華（當今大帳房長櫃）亦當佢透明。更諷刺嘅就係在台上祝酒時、阿噌居然被安排站在無上庭大判官倒立馬身旁。這個畫面不禁令人聯想到、下次當他們兩人碰頭時再不是並排而立、而係一個高坐衙堂之上嘅大判官、而另一個則成為犯人欄內嘅待罪之身。勢估唔到就在酒會後不足幾日、阿噌真的成為被告人。令人毛管棟嘅就係、基層鬧屋荒、三非和水客禍城等劣績都清楚的紀錄在阿噌嘅成續單上面、但係居然有人跳出來貓哭老鼠、講埋一大堆歌功頌德嘅反話。難怪江湖盛傳、係有人驚怕廣大蟻民唔記得阿噌嘅好帶挈、而特登講些屁話出來剌激一下大眾嘅腦袋啦！