勿再惡人先告狀

廉費購物團

邀君上賊船

謀財兼索命

禍患永不完

俗語都有講啦、有強姦冇局賭吖嘛！誰知咱家紫荊城竟然鬧出局人購物嘅醜聞、而且仲係長鬧長有添架！呢嗱、事情係咁嘅、自從阿爺大開中門“放馬過來”觀光之後、城中忽然出現一批專門招乎內地旅遊團另類商店。此等商居在江湖上嘅名聲一向都好不到那裡去、而且時有貨不對辦、以及“唔幫襯唔准出門口”嘅傳聞。但奇就奇在、咱家縣府對於打擊強迫購物嘅態度卻于人有點“唔嗲唔弔”嘅感覺。終於在幾日前有一名老表團友唔肯做水魚、並跟內地領隊爆發囗角、繼而有人相約出門口隻抽。殊不知出到門口時、原來係唔係隻抽而係圍毆。就係咁、唔肯做水魚嘅老表就做咗死魚喇！

其實此案擺到明係團友唔肯消費而跟領隊爆發口角、其間又有所謂嘅「刀客 /影子圍友」嘅人出來做架樑、終於搞出人命。呢件事點睇都唔會係紫荊城治安差、更加睇唔到有任行跡象是與趕客黨有關、然而蠻求日報卻反起雙眼胡說霸道、既罵紫荊城治安差、又罵紫荊人欺負內地遊客。從蠻求日報這種瞎罵紫荊人欺負內地遊客看來、顯然係對錯焦、以及突顯這種魯莽判斷就是加速兩地矛盾嘅原兇。但無可否認嘅就係、紫荊城亦有個別媒體犯下同樣錯誤。更令人冒火嘅就係、垃圾會某些聲音總是單方面指責本地人不包容內地旅客、而從來沒有認真去了解過箇中原因、否則紫荊人就唔會被人越焫越㷫啦！係冇？試問一聲、君可曾見過或聽聞過本地人欺負來自內地以外嘅旅客？講來講去、若不是有一個視民困如浮雲嘅褓呔、再加上一群見利忘義之流從中作梗嘅話、咱家社會就唔點會受到雙非和水客嘅衝擊、而趕客黨亦無機會應運而生矣！雖然今日雙非和水客兩大問題暫時得到紓緩、但縣府面對着內地旅遊團挾迫團友消費嘅惡行卻顯得束手無策。但問題是、真的管不了嗎？