取消恨奶令？

為利行頭作先鋒

中途易帥夢成空
祖師壇前擺路祭
挾迫關帝坐華容
 

近日城中有人高呼貨品滯銷嘅情況比「沙屎」時期更差、並將責任歸咎於陀地趕客、而且借傳媒把口向縣太爺喊話、要求解除「恨奶令」和重啟「一簽多銀」政策。喂喂、請先等一等、既然係關陀地趕客嘅事、只須要加強檢控就得啦、何必要搞咁多花臣？不過縣太爺亦唔係食齋嘅、當然冇咁順攤啦！據縣府發言人指出、每日出入數次嘅拖喼黨只是搶貴米嘅水客而非觀光客、故暫時無計劃解除「恨奶令」或重啟「一簽多銀」政策。但事頭黨發言人則認為這樣陰乾落去、金紫荊遲早都要變成廢柴。呢嗱、聽落確係公有公理、婆有婆理、其實大家都只係著眼於一個利字之嘛！係冇？

以在下此等窮等人家而言、少咗水客沖擊、買頭痛藥都唔使咁貴、商鋪租金下調、業主就再冇藉只亂加租、我條褲頭帶就唔使再勒得咁緊吖嘛！之不過那群在前任縣太爺揸拂時期大開水貨鋪搵快錢嘅老闆就喊得一句句。事關少咗水客嘅光顧、鋪頭嘅生意就猶如水瓜打狗唔見咗一大節、莫講話租金應付不來、就算夥計嘅人工都搵唔番吖嘛！試問明明係財路一條、就此被人玩殘咗、確係唔嬲就瓦燒啦！係嘛？呢嗱、連穿紅褲子出身嘅公園會都頂唔順、連忙爆響口話未知會唔會支持縣太爺冧莊。咁即係意味着、假如情況繼續令持票人失望嘅話、下次縣太爺嘅票箱裡面嘅票亦如水瓜打狗般的唔見咗一大節。但縣太爺卻如屎坑石般的又臭又硬、難道他真的不怕人家下次唔受佢玩嘅咩？依我睇、其實雙方都是在這場沙蟹賭局之中彼此鬥大、目的是要看看對方嘅底氣有幾厚。因此是否解除「恨奶令」、又或是何時解除、一切都視乎這局牌點打落去。那麼蟻民嘅利益又被放到那裡去呢？呢個問題我唔識答。不過我可以肯定嘅就係、沒有投票權嘅蟻民只不過是這場賭局嘅旁觀者。借問一聲、假如閣下是賭局中人、你又會唔會為咗去討好一群無關宏旨嘅閒人、而去降低甚至犧牲自己利益呢、吓？！