2015年8月7日星期五

水的疑惑



塘水滾塘魚
露出大肚臍
買板應知埞
問價看時宜

紫荊城都可謂多事之秋、勢估唔到今期食水安全問題越炒越大鑊。最弊傢伙嘅就係成個水記部門擺咗喺度、但係發現食水含重金屬嘅竟然係大雲姐呢位人民代表。衙門方面知到自己行頭執輸、於是速速宣布立即徹查。唯獨是調查嘅速度比蝸牛還要慢幾分、而且還給予人一個到喉唔到肺嘅印象。涼茶大狀眼見勢色唔對、於是試圖先向飯盟取得共識、然後再向亂制爭取支持運用「凸拳法」在人民公社開堂審理此案。但據稱涼茶大狀嘅提議、連自己友一關都過唔到。咁你話奇怪唔奇怪?

據圈中消息顯示、第一個反對「凸拳法」嘅係大雲姐。因為一旦開堂嘅話、過料畀佢嘅人就會被傳召到公社作供。咁搞法等同叫大雲姐將自己「條針」曝光、以後搵鬼過料畀佢都得啦!係嘛?坦白講、爆得呢單嘢出嚟嘅人、若果唔係行內嘅知情人士、就係能夠獲得此等資料嘅衙門中人。假如泄密者係來自承辦商嘅話、最多就唔打東家打西家啫。萬一此人係來自衙門嘅話、等同發現水中有「金」而刻意隱瞞、然後再將資料交給外人爆大鑊、而令到衙門當堂出醜。如果係咁、那就唔單只冇咗份工咁簡單架喇!其實在大雲姐方面而言、水中含重金屬事件已經曝光、足以引起大眾對承辦商「大國麵粥公司」嘅關注、可謂目的已達、根本上無必要犧牲埋自己「條針」咁冇義氣嘅。講到呢度、相信大概可以解釋到、何以大雲姐會先知先覺的出錢請人幫人在食水中尋「金」啦!係嘛?

15 則留言:

  1. 我喜歡赤的疑惑~~梅艷芳唱,咭咭咭!

    回覆刪除
  2. 好友♦・゚★又一天過去了✬*°¨✫瞓覺呢☁°☾晚安甜夢・。。゚週末快樂

    回覆刪除
  3. 五金鋪話十個水喉佬有九個都係買呢D平價錫條,只有係乎有幾多滲入水度,超唔超標,呢壇野有排都收唔到科。

    回覆刪除
    回覆
    1. 對呀、能購多一些就購、這亦是正常的。

      刪除
  4. 唔止有政治飯食
    仲有政治水飲
    照顧周到

    回覆刪除
    回覆
    1. 一局兄、聽講話仲有政治銀両派呢!

      刪除
  5. 域Sir,十月尾返香港飲多些水都唔怕重金屬超標,因為我仲缺金和銀。

    回覆刪除
    回覆
    1. Wai 兄、原來越富有越喜歡認窮係真嘅。

      刪除
  6. 「 塘水滾塘魚,露出大肚臍。」哈哈.......域兄好幽默!

    回覆刪除
    回覆
    1. 秋葉君、因為我想唔出擺邊一句落去、唯有將小時候唱通街的那一句都偷來用好了!

      刪除
    2. 域兄:幽默的句子不妨發揚光大。
      閣下的時事打油詩確是精彩!

      刪除
  7. 我不嬲都唔覺得我哋食用嘅水係百份百安全!東江之水越山來,有幾多有害物質排咗入東江?我相信政府唔會公佈,不過,我覺得担心都担心唔嚟,因為無得選擇,唯有既來之,則安之!

    回覆刪除