2015年8月28日星期五

一台獨大


一台獨大有乜好
吞金滅餸確離譜
廣大市民心火燥
三句唔埋問老母
 

前幾晚在街口被黃伯截住、佢話屋企個公仔箱唔知係咪壞咗、個老番台搞來搞去都只係得單聲道、搞到佢聽極都唔明套劇講乜東東、仲叫我幫佢較番雙聲道喎!咁我咪跟佢上樓睇吓幫唔幫到佢囉!點知我發現佢個公仔箱好正常、於是問他究竟是那一套片集冇配音。佢話唔知劇名點叫、只記得一套係檢查骨頭破案、另一套係講個男主角諗嘢好叻破案嘅。我聽後登時明白晒、於是話畀佢知那兩套片集已經冇配白話、完全唔關部機事。點知黃伯聽完我講之後滿臉不悅、仲問我點解失驚無神取消咗配音、我真係唔知點答佢囉!


講開又講、日前亂制頭領China Bun在老番台接受訪問時點名踢爆、在行企會裡面只有施威一個人反對發牌畀神童台。如果屬實唔話、就真係豈有此理喇!勢估唔到施威對冇記咁關照、但係義氣博兒戲。冇記唔單止冇趁兩個新台未開幕拿些好劇種出來箍客、反而讓那齣苟延殘喘嘅「晚飯劇」繼續悶街坊、仲要將雙聲道劇種打回單聲道、擺明係欺負街坊冇得揀。呢啲咪係一台獨大嘅真實寫照囉!
 

其實呢件事正好反映出、繼地產霸權之後公仔箱霸權又得到縣府嘅過分照顧、以令廣大市民嘅合理須求落空。自開埠以來、紫荊城就是憑自由經濟帶動而獲得成功。今次縣府以市場容納不下太多公仔箱為理由而限制發牌給神童台、其實係窒礙自由經濟市場發展。商場上留強汰弱是自由經濟成功所在、公仔箱同樣是一門生意、點解不能讓市場去決定存亡呢?假如限制是利民嘅話、當然不會有人反對。但係當限制變成剝削嘅時候、那就人人得而反之!看來、社會上嘅怨憤多是孽由自作矣!

 

 

10 則留言:

  1. 思歪我曾經支持過,但佢依家做嘅野愈來愈歪,我改為支持佢快啲落台!

    回覆刪除
  2. 支持思歪土去赤化
    是自作孽

    回覆刪除
    回覆
    1. 是否自作孽就得看當事人嘅利益所在

      刪除
  3. 唔想做嘢就話大巿場小政府,
    到真要做嘢就話知你的多多理由,
    最弊…好多都係黑箱作業的冇人知呢!

    回覆刪除
    回覆
    1. 黑箱作業呢家嘢、恐怕全世界都做緊呢!

      刪除
  4. 如果申請開新台其中一個條款係無條件支持思歪, 包馬上批出十個免費台。

    回覆刪除