如此陳四姑

平時脷刮刮

月咬九萬八

大話說風涼

吹水嘴唔抹

呢個世界上有人為兩餐挨到隻積咁、但挨來挨去都係得個吉。之但係、卻有種坐享太平糧嘅人、終日抱着“寧望人閉翳都唔望人富貴”嘅心態過一生。日前那位江湖人稱「齋講良心」嘅陳四姑剛剛獲得食糧署加薪6.1%、但連錢都未袋暖又跳出來跟縣政府唱反調。人家縣太爺剛剛至話要集中力量先搞好民生、點知那唯恐天下不亂嘅陳四姑卻與泛盟互相呼應、話應該先解決政治問題。呢嗱、之前搞到紫荊城雞毛鴨血嘅政治問題啱啱至停下來、現在紫荊人連條氣都尚未唞順、那見鬼嘅陳四姑居然又喊再來一次、難道還嫌紫荊城死唔去乎？

政棍一向依賴搞屎棍賺取豐厚收入、所以不斷鼓吹政鬥爭、無非只為生活。但陳四姑每個月向公家大賬房支取約十萬両銀子太平糧、照計是衣食無憂至係。但她偏偏要食碗面反碗底的跟縣府過唔去。總言之、唔係跑去番邦唱衰紫荊城、就係在城中煽風點火。呢嗱、講到呢度、在下又想起陳四姑做官嘅時候傾力協助洋督執行殖民統治、但勢估唔到在改朝換代之後此君卻忽然民主起來。在之前的一場宮廷鬥爭之中、陳四姑以捉蛇為藉口把四名蛇王管工送去做監躉、令到老古董個朵在衙門內猶如神台貓屎般臭。然而老古董亦不是吃齋的、他以有人呃房津為題、陸續將高官判罪、甚至有人因此而被打入大牢、搞到陳四姑身邊親信人人自危、結果成功迫得她提早執包袱。湊巧的是、當時泛盟剛剛接到倒董令、所以相方一拍即合、而陳四姑亦被捧成泛盟共主、結果成功把老古董拖下馬。不過當老古董下台後她的利用價值也不再存在、而她的共主地位亦相繼消失、從此被打入冷宮。但陳四姑卻獲得其恩師大頭霍（前布政司）協助之下、成功搭起咗一個「雙胞異靈」祭壇、專門召集異類靈體跟阿爺糾纏、以報事頭婆當年知遇之恩。講真啦、政治爭鬥是無止無休的、到咗呢把年紀還不肯放手、唔通真係要鬥到至死方休、值得嗎？