框架的疑惑

有框無框都是框

臭花凝聚臭草甖

既是規則由我定

誰敢落鑊我敢烹

白鴨幫剛剛宣布將老將阿黃驅逐出幫會、理由是他公開唱反調令到幫主瞓街姐唔高興。呢嗱、姑勿論白鴨幫是否不能容納不同聲音、但幫主果斷清理門戶的確能夠起殺雞儆猴作用。相比之下、金紫荊揸拂人施威眼巴巴的看着自己手底下幾隻水蟹爬上岸跟除李工頭去瞓街、甚至有人涉嫌呃病假跑到佔領區當皮佬禮保貼身鏢都不敢揸正來做、簡直係英雄與狗熊之比喇！喂喂、施威呀施威、如果閣下做這份工做得唔耐煩嘅話、不如讓個位出來、由瞓街姐去做好過啦！

事實擺在眼前、高舉民主旗幟嘅白鴨幫也為幫中民主設下一個框框、並視走出這個框框嘅幫眾為叛徒。那麼、既然你有你的框框、阿爺亦有他的框框、你不容阿爺碰你的框框、阿爺也不許你破壞他的框框、所以再纏鬥落去永遠都唔會有結果、惟有妥協才是出路。可惜城中政客少而政棍多、搞到全城烏煙瘴氣。可不是嗎？在上次「和尚打傘」一役大家都有眼見、一群連人情世故都未學懂嘅黃毛小子居然被捧成政治明星。但若問他們除了曉得橫衝直撞兼連累街坊之外、對社會還有何等貢獻嘅話、相信很多人都會“O”晒嘴。你可以唔同意我講嘅嘢、但我相信你是見得到的。

今日世界政壇所奉行的就是框框由我定、龍門由我搬、對錯由我判、民主為我用。意思即係話、我絕不接受別人所設的框框、但別人卻必須接受我設的框框、誰膽敢挑戰我的框框、我就令誰永不超生。試問一聲、咁搞法點會有太平？