衰鬥衰

你要我衰不獨衰

好歹拖你去埋堆
既然不可同歡樂
惟有背後插一錐

俗語有講、好就糠黐豆、唔好就水溝油吖嘛！大家有商有量就能將臭史密冚、即使冚不來亦可以處理得平順一些、將負面影響縮到最小。相反、就將件事有咁大鬧咁大、總之係都要搞到天翻地覆才過引。呢嗱、正當飯盟機乎衰到貼地之際、忽然又峰回路轉了！日前飯盟嘅烏雲師太收到密報指、亂制派火雲師太夫家在城中出售嘅水煲含有危害健康嘅重金屬、於是馬上派人追查、結果證明確有其事。因此烏雲馬師太上公開此事、並要求縣府立即徹查。殊不知縣府開始時卻顯得有點像猶抱琵琶半遮面咁款、但隨後又發現原來部份水煲不單只含重金屬、而且還含有一種致命嘅「下崗兵病」病菌、於是不敢怠慢馬上做嘢。看來、飯盟雖然聲名狼藉、但今回有亂制派和縣太爺落鑊相伴、那就不愁寂寞啦！

當事件曝光之後、水龍所所長居然不敢登時公開水煲公司嘅大號、已經令人聯想到那家公司嘅來頭一定不小。冇錯、該公司就是鼎鼎大名嘅天朝水煲公司、而且長駐本城嘅大掌櫃就是火雲師太嘅先生、再加上縣府嘅曖昧態度、難免惹人有所聯想。當日水龍所所長在公仔箱之前聲稱、恐怕講錯有關機構名稱、所以在答問完畢之後查清楚才知記者。問題是、你是否會相信身為一所之長、居然連最重要資料都未曾掌握得到就貿然跑出來見記者？究竟是他是反應遲鈍、抑或係唔敢當場踢爆、相信大家都心中有數。難怪有人形容、自從大歸之後衙門嘅作風越來越「大綠化」矣！作為衙門理應給予市民一個公平、公正、公開嘅印象、才能夠穩住市民對衙門嘅信心。所謂一石激起千重浪、今次只是好戲剛開始、保證陸續有來、假如縣府在處理此事之中稍有差池嘅話、墮時都可以觸發起軒然大波的。到時誰受損、誰受益、相信不難想像啦！係冇？