大遊行的馬後炮

大話唔怕多

老點冇奔波

人人皆好作

小子也大哥

在剛過去的周日、由「傳聞拒絕假補丸」所發起的反「假補丸」大遊行原定有五萬人參加、但唔知點解大失預算。任由主辦者點講、亦只能說參加者有三千五百人。咁即係話、參與人數連預期嘅一成都冇。呢嗱、無論係這家主辦機構嘅號招力是否大不如前也好、抑或係紫荊人越來越懶得去分辨「補丸」嘅真假亦好、總之今次給人嘅印象就係、紫荊人對於這類性質嘅遊行玩意已經興趣銳減。

據最近三家大教館就「假補丸」議題所辦嘅民調顯示、反對「假補丸」嘅人數有所上升、甚至已經蓋過支持「真補丸」嘅人數。按道理、在這大好形勢之下、再加上政治明星效應、這趟反「假補丸」遊行理應人山人海至係、但事實證明參與人數居然達唔到預期嘅一成。難怪三家大教館公布出來嘅民調結果、在社會上引起咁大爭議。由此推斷、若不是民調內容帶有引導性因素嘅話、就是這個世界已經變得越來越無厘頭。以今次遊行嘅情況去睇、點都睇唔出反對「假補丸」係有傳說中咁大嘅市場囉！難為主辦者之一（以三十七票當選鶴聯總書記）三七羅仲話、由於民調已經足以反映出市民反對「假補丸」嘅心聲、再加上天氣炎熱、所以參加人數稍為減少也不足為奇。吓、比預期人數少咗九成有多都算係不足為奇、咁都得？呢嗱、如果我係佢嘅話、我就嗱嗱聲去檢討一下、件事搞成咁、究竟係衰在自視過高、抑或係衰在誤判形勢嘞。但可惜得很、這位三七羅大哥跟日前自稱有人出一億両銀子收賣佢投「假補丸」一票嘅常無大哥一樣、唔清楚究竟「人貴自重」係乜東東都未定。否則又點會講呢類咁犯駁嘅廢話呢？