唔想鬥抑或唔敢鬥？

順水行舟推力猛

時逢逆水怕艱難

既是命懸生死綫

何不落地鬥一番

昨日反派在沙區鐵路站門外舉行反「食住先」宣傳時、燶黨大佬雀寅回答記者提問時話、佢哋唔會跟倦派玩街頭簽名鬥多遊戲、假如要鬥就不如鬥公投喎！呢嗱、佢呢頭咁講、嗰頭就有人踢爆話、係人都知阿爺不容許縣府搞公投、所以雀寅才以此為放無煙大炮平台。坦白講、既然雀寅知到真正嘅公投無望、而自己又咁有勝算把握、點解唔趁今次機會來一次變相公投、跟倦派捻鋪勁嘅呢？勝出之後保管可以挾民意而令縣府、甚至有機會迫使阿爺就範。不然的話、就打起順應民意嘅旗號、將「二戰」擺上台吖嘛！有咁筍嘅嘢擺在眼前、雀寅居然耍手擰頭、如果唔係「阿崩養狗」轉死性嘅話、就必定有炯耿～喔～對不起、應該係「景轟」至啱。

話時話、近日縣府一眾官老爺跑到各個環頭拉票、並不時遇上被人當面撕票嘅尷尬情景、咁即係話反對「食住先」係大有市場。既然反派係民意化身、理應設置一兩百個街站跟倦派打對台、在展示肌肉之餘、亦能給予支持者表態嘅機會、看看誰才是真正嘅大多數。早前白鴨黨長老鐵頭信心漲滿的話、自己將會辭去公社代表之職、然後搞一趟變相公頭去證實民意取向。鐵頭咁猛料確係勇氣可嘉、可惜無論橫睇抑或掂睇、佢嘅所謂公投只係一隻公雞自己鬥自己、不獨只毫無說服力、還招人話柄指佢博出位。之不過咁、假如反派能夠趁着倦派搞嘅簽名運動嘅時機、來一次文鬥式嘅民眾簽名大比拼、咁就真係本城歷史上第一次重量級變相公投。假如反派勝出就有大條道理喊紫府煞停「食住先」然後重啟方案、萬一倦派勝出亦屬民意所然、只要反派能夠從善如流嘅話、不獨只不會失面子、亦不會流失擁躉。更重要嘅就係、文鬥嘅優勝之處、就係不會對社會造成破壞性沖擊吖嘛！現在反派連試都唔肯去試、反而鼓吹包圍人民公社。難道嫌上次「一戰」嘅教訓還不夠深刻、非要再來多一次「二戰」才甘心嗎？其實爭取民眾支持唔係靠吹、唔係斷估、更加唔係喊打喊殺就得嘅、必須要拿出令人信服嘅手段來才可以。如果又要像上次「一戰」一樣、要班街坊白白蒙受損失嘅話、不單只會有輸冇贏、而且仲可能會將反派帶入永不超生嘅絕境之中。既然係咁、不如早啲收檔、返屋企大覺瞓好過喇！