2015年5月29日 星期五

肥懷係炸彈?

難知真或假
好歹由人話
各自出噱頭
橋舊無有怕

時逢驅異會大選期近、紫荊大舞台又有好戲上演了!近日坊間輿論指公園會大家姐阮嫻遲不出手、早不出手、而偏偏要在驅異會大選即將來臨之際、大張旗鼓的送「三非兒」肥仔懷去入境衙門自首、是有心焫着極土幫把火、以令反盟難看。理由係、弓幫二當頭張紅和三當頭張似兩人、都是反盟陣中專門負責為民抓福利嘅代表、假如反盟袖手旁觀、就被指為高舉福利旗幟呃飯食。假若貿然出手、勢必會受到本地幫狙擊。點做都會對未來選情構成障礙。之但係、雙張在未睇通形勢之前死人冧樓都唔出聲之外、連一向善於用口水浸死人嘅涼茶大狀都在記者面前扮啞仔。如果係真嘅話、都咪話阮嫻呢招唔擺命。

2015年5月26日 星期二

鬼拍後尾枕



冇着發嚕囌
闊佬你又嘈
點都唔合意
到底有何圖

縣府計劃將九月三日訂為「特別」勞工假期、紀念國家抗戰勝利七十周年。本來打工仔獲得多一天額外嘅有薪假期係件開心嘅事。點不知白鴨幫長老騸雞居然話、呢啲係縣府與朝廷合謀安排嘅政治假期、完全唔值得鼓勵、仲話考慮投反對票將之否決喎!唉、連放日假都關政治嘅事、咁你話死唔死?喂喂喂、騸雞哥哥、你有冇諗多咗架?人家內地十幾億人同樣享有這一天額外假期、你唔係認為阿爺為咗統戰紫荊人就搵咁大棚人出來做妹、係嘛?仲有呀、你老哥食飽無憂米、放唔放假都冇所謂、但係其他打工仔一年做到晚、今次咁好彩無端端放多一日便宜假、正式係皆大歡喜吖嘛!使唔使下下政治上身、搞到咁掃興呢?喂、你冇權咁樣做架!知冇?

2015年5月25日 星期一

當差還是花旗好



同人唔同命
點到你唔認
紫警眼矎矎
花差殺得勁

我哋紫荊人有句老話叫作「同人唔同命」原來係啱嘅。就拿紫荊捕快跟花旗捕快來比一下就知到冇花冇假。最近花旗發生一宗62輛警車追捕一部房車嘅個案。其間捕快狂轟137槍、以致兩名黑人青年死於亂槍之下、但鵝害鵝洲大法官判時指出、無足夠證據證明兩名捕快開槍行為導致兩名黑人死亡、於是判兩名捕快無罪釋放。正如上面所講、兩名黑人是死在亂槍掃射之下、根本很難證實誰開的槍導致他們死亡的。

2015年5月24日 星期日

大俠也抽水



阿姐被人煩到嘔
黑仔除即伸義手
今日反盟捹鐵血
各行各路了恩仇

近來反盟“就無證仔三非懷小朋友獲得「車流拳」及「上鶴拳」一事”群起指責鐵血幫無理生事、大有當天下英雄面前與該幫割蓆之勢。事緣日前人稱「倦派票后」嘅公園會大家姐阮嫻出手幫助三非懷小朋友取得「車流拳」和「上鶴拳」嘅拳譜、並惹來鐵血幫不滿、以及糾眾在其街坊聯絡處門外不斷叫囂。正當阮嫻孤軍應戰之際、想不到出來幫手解圍嘅竟然係人稱「反盟票王」嘅白鴨幫長老黑仔桃。他喝令鐵血幫停止以涉嫌含有恐嚇成份在內嘅手段妨礙阮嫻見街坊。有街坊話、公園會跟白鴨幫是對手而非盟友、今次黑仔桃出手替阮嫻解圍實屬罕見、並稱讚黑仔桃是值得令人尊敬嘅大俠。

2015年5月22日 星期五

兄弟變仇人



昨日糖黐豆
如今像惡狗
關門放毒氣
片甲也不留

開講都有話、有仇不報非君子、詹啤早就講過誓要雪前恥、不把施威從紫荊分舵舵主之位拖下來勢不罷休。自從綠林飯局一役之後、施威對詹啤已經心存介蒂、甚致對他敬而遠之。當詹啤染得一身地底油之際、作為親密戰友嘅施威卻寧願躲在家中練習書法、都不願出手幫他洗去身上油跡、而且還要向戒律院告他一狀、指控詹啤出言恐嚇兼妨礙書法公整。不過詹啤卻吉人天相、獲得九大長老裁定他身染的不是地底油而係白花油、並登時還他清白。正所謂人逢喜事精神爽、日前詹啤透過 992 喇叭筒指當年撐錯施威、並指其「改骼」方案是違反老祖宗嘅開明政策、違反歸本法、以及違反一覺兩世嘅規定、並向幫眾呼籲必須連手將此三違反方案推翻。

2015年5月21日 星期四

2015年5月15日 星期五

陰謀論 之 紫改通過



阿華批阿華
雙方鬥掉牙
唔怕勾鼻佬
最怕向外爬

最近三家大教館 (紫大、華大、李大)合辦嘅民調報告顯示、近來「篩補丸」嘅支持者數目暴跌、其間李大教館嘅華教頭話、這個現象可能跟早前嘅過氣揸拂人華阿頭嘅「反紅者不 得當阿頭」言論有關。在下不知各位對華教頭嘅論調有何睇法、但我覺得呢句話好似有些思覺失調。坦白講、城中冇幾多個人相信阿爺會同意由反紅人物來當阿頭 囉!既然係咁、今次嘅所謂「暴跌」又點會跟華阿頭嘅言論扯上關係?

2015年5月11日 星期一

唔想鬥抑或唔敢鬥?




順水行舟推力猛
時逢逆水怕艱難
既是命懸生死綫
何不落地鬥一番

昨日反派在沙區鐵路站門外舉行反「食住先」宣傳時、燶黨大佬雀寅回答記者提問時話、佢哋唔會跟倦派玩街頭簽名鬥多遊戲、假如要鬥就不如鬥公投喎!呢嗱、佢呢頭咁講、嗰頭就有人踢爆話、係人都知阿爺不容許縣府搞公投、所以雀寅才以此為放無煙大炮平台。坦白講、既然雀寅知到真正嘅公投無望、而自己又咁有勝算把握、點解唔趁今次機會來一次變相公投、跟倦派捻鋪勁嘅呢?勝出之後保管可以挾民意而令縣府、甚至有機會迫使阿爺就範。不然的話、就打起順應民意嘅旗號、將「二戰」擺上台吖嘛!有咁筍嘅嘢擺在眼前、雀寅居然耍手擰頭、如果唔係「阿崩養狗」轉死性嘅話、就必定有炯耿~喔~對不起、應該係「景轟」至啱。

2015年5月8日 星期五

求楓葉不如求櫻花

楓葉無力掯神州
櫻花有心冇人求
既是康莊無覓處
又逢爛鬼鬥不休

近日傳媒揭發反派人馬跑到楓葉國求援。報導踢爆鶴聯今前兩任總書記四維冲和兜糠糠曾經跑到花旗向「抬毒、撞毒、僵毒、刮鱗功」等組織取經。楓葉國國會亦就紫荊城嘅「人拳、紫改、一閣兩砌」等方面召開一個聽政會、並由大撞幫長老弱微姐、鶴樵一哥痴蜂二人透過視象配合親身出席聽證會嘅鶴聯總書記四維冲齊齊煮重「篩補丸」嘅米。報導指這告狀三人組要求楓葉國出手、促使天朝勿再做出損害天朝尊嚴嘅事、而風國國會亦答應派員到紫荊城了解狀況。之不過、只怕到時其國會議員要重蹈前上次北列顛國會議員食閉門羹嘅覆轍。

2015年5月4日 星期一

跳老舞風雲




血氣翻騰跳得高
流汗沾濕眼眉毛
無暇攻書人學懶
唯將禍闖過一刀


最近公園會長老阿旺在一次直播口水戰裡面、叫鶴潮仔收皮、結果被人熱烈問候足足一個星期。依我睇、阿旺講嗰句「收皮」既非性器官、亦不在三字經系列之內、唔知點解咁都會紅足一個禮拜嘅。講到三字經呢家嘢「跳老舞」就入流喇!拎啉大教館學生會最近搞嘅一場黑暗時代跳老舞大會、先至稱得上係威水之作。人家學生會嘅公關主任Lader-Hung當館長嘅警告透明、仲話有機會再大搞一場更爛、更粗、更掯嘅派對、仲話咁至能夠體驗言論自由喎!

2015年5月1日 星期五

霸權世界




你發佢又發
憑沙撈石刮
獨食冇商量
人皆玩爛笪

劃地會終於通過粉靚區和古董區嘅劃地計劃、兩地將會共建六萬個住宅單位、其間私宅和公宅各佔一半。本來多建幾萬個公宅是基層市民渴求嘅事、但係當這個計劃一出門口就立即遭到強烈反對、而且反對團體還聲稱不排除提出撕法覆核嘅可能。恐怕這麼樣一搞、又唔知要拖幾耐矣!江湖上有傳聞指、由於紫府收地價錢和賠償額都比大戶低很多、以致地主和住戶均大為不滿。於是有人與反對團體攜手製造事端、迫使紫府提高收地和賠償金額之餘、同時亦迫使紫府檢討目前嘅土地政策。