明日話今天

舢板充炮艇

蠢才愛標青

今日你釘人

它朝人照釘

呢嗱、近日紫府有紫府動員到坊間爭取街坊支持「食住先」、而飯仔有飯仔派人出來唱反調。那個剛剛被山姆大叔捧上世界第十名風頭躉嘅十頭蜂則聲稱、假如紫府膽敢繼續上街迷惑街坊嘅話、佢就會拖馬見鑊炒鑊喎！有人話、在「食住先」嘅框架之下、飯仔不單只無緣問鼎金紫荊揸拂人寶座、甚至連生存空間都大打折扣、咁搞法、唔爆紫府大鑊至奇。計我話、呢個世界上叻仔通常都係求財、只有蠢仔才會求氣。試問、拋個身出來刀鋒上打滾唔係為銀、唔通真係為興趣咩？最少有我一個唔信囉！咪話我市儈、我相信每條政棍都有個價、一百萬買不來的、一億就可以、再唔得咪再加囉、反正大莊家唔志在、且看有幾多人真係能夠降拒銀両嘅魔力吧！

在兩陣對壘期間、最辛苦嘅睇怕都係各方嘅擁躉、紫改嘅內容係乜東東佢哋都唔知到、就跟隨大隊人云亦云、而那些所謂支持和反對旨在衝擊對方、根本冇幾人會諗過當中嘅真正意義。紫荊城就是這麼樣一個奇妙嘅地方、無論係幾慌謬嘅論調都會有信徒、只要有人肯牽頭就必有人跟着走、總之一將功成萬骨枯就是。從前紫荊城是個工商業興旺嘅城市、期間也曾造就過大批人發跡。今日紫荊城演變成政治之都、所以亦養肥唔少政棍。呢個轉變究竟是好是壞、相信大家都心中有數。有一群連被人洗咗腦都唔知嘅青年、譏諷支持紫改嘅人已經唔適合呢個時代、還要罵人家禍延下一代。唔知到各位對呢類後生仔點睇、但我就會以平常之視之。因為只有無知嘅人至會講無知嘅話。其實每過人都做過年青人、亦也曾經歷過一個“知啲唔知啲”嘅階段、當人們覺悟前非嘅時候、通常都已經係一把年紀了！今日笑他人、它日人笑之、這是千古不變嘅定律。

呢嗱、話口未完、兄弟幫又準傳好赤膊上陣去幫各位兄弟嘅大忙喇！睇落、上次賠了夫人又折兵嘅歷史即將重演。咁、你話嘞、仲爭嚟做乜？