硬砍無益

平時不出手

招出冇情留

誰人敢莽動

劍過血封喉

不知各位街坊有否注意到、若不是奧黑馬硬着要搞那個甚麼「亞洲再橫行」嘅話、架仔就唔會咁斗膽買起釣島、阿爺亦唔會將該區水域列入常態化巡邏範圍之內、更加不會在東海劃出「防凶識別區」。若不是安南仔試圖在西沙水域越踩越過界、阿爺亦不會拖個鑽油台到該嚇他一餐飽嘅。若不是賓仔妄想在黃岩島起飛腳、阿爺就唔會奪回該島、更唔會在該島上建設成軍事基地。若不是架仔、安南仔、爪哇仔、馬拉仔、賓仔等人聽奧黑馬支笛陸續在東南二海進行填島活動在先、阿爺亦唔會一口氣拿下六個島礁於後、更不會展開填島行動和興建具有飛機場嘅軍事基地了！換言之、山姆大叔搞嘅「亞太再橫行」不單只啥利益也拿不到、而且返被阿爺打蛇隨棍上乘機在該區擴展和鞏固軍事力量。

從以上情況看來、當今嘅阿爺嘅性格明顯是能忍則忍、但當對手硬是要攻過來嘅時候、他就會毫不猶豫的比來者攻得更厲害嘅一類型強悍人物。就以今日紫荊城嘅形勢看來、如果飯仔唔搞「和尚打傘」嘅話、佢哋嘅形勢絕不會淪落到咁唔得人鍾意嘅地步。在近月各項民調均顯示、願意接受「食住先」嘅人是佔大多數。我唔敢話呢啲人全部都係認同「八點卅一慌案」、但卻強烈的感覺到紫荊人對於無止休嘅政治爭鬥已經厭倦、希望盡快把事情搞定、免得再「心」無寧日。試想想、呢個轉變係何等巨大？當初飯仔盡佔道德高地、並且獲得萬民擁戴。可惜有人太過急進、滿以為來一次大逼宮就可以令阿爺就範、放鬆對金紫荊嘅管控、但結果顯然是飯仔賠了夫人又折兵、都可謂衰過做女嗰陣時咯！假如有人還以為民意逆轉是因為「和尚打傘」那場戲做得唔夠好嘅話、那就肯定大錯特錯。我話你聽啦、根本上無關台戲做得好與不好嘅事、而係有人誤判阿爺嘅性格才犯下大錯架咋！如果堅持要一錯再錯嘅話、慘變神前桔嘅必定係飯仔。吓、唔信？那倒不是問題、只要再回頭看看阿爺係點樣去回應奧黑馬嘅「亞太再橫行」就知在下所言不差矣！