點止趕客咁簡單

趕客連場鬧爆天

遊人七竅盡生煙

生鏽功夫藏利器

博你疏忽泥裡纏

城中反對趕客嘅聲音只着重於經濟損失、其它的則一切欠奉。不過榕樹頭唱家班歌王田大就有不同聲音。他說內地人對於同胞在紫荊城受辱很惱怒、並吹起一陣不歡迎紫荊人浪潮。因比他認為紫荊人到內地旅遊、最好認自己係五羊城居民、否則有排你受。聽聞最近有些曾經到訪黃甫區嘅街坊歸來後講、當地有些人抱着以牙還牙嘅心態、對紫荊人嘅態度都幾惡劣吓嘅喎！

呢嗱、勿以為以上事件只係兩地矛盾咁簡單、其實呢個局面就係紫獨搞手樂意見到的。也許你會質疑、咁又與紫獨何干？江湖早已有傳聞指、趕客嘅目的就是要在兩地人們之間製造：（一）互相敵視；（二）互不相容；（三）各走極端；（四）步向分裂。以近來內地遊客數字大幅下降看來、即表示人家實在唔想貼錢賣難受。當紫荊人在內地也遭受同樣待遇嘅話、兩地人互相憎惡和仇視嘅情緒就會飆升。假如情況不受控制嘅話、紫獨勢力抬頭、甚至帶領紫荊人走上不歸之路嘅可能性誰都不敢抹殺的。

成件事搞成咁、我唔覺得紫府係冇責任嘅囉！因為紫府從來未能做得到防患於未然、每次都要等到有爆粗行為出現時才出手。咁搞法、遊客唔嬲就有鬼啦！係嘛？難怪城中有陰謀論指出、紫府之所以表現得如斯溫柔、無非是要讓市民切身體驗這類破壞性活動所帶來嘅痛苦、然後睇準機會借助主流民意嘅推動力將「廿三味」上市。