2015年3月5日星期四

水貨帶旺經濟?

水貨養肥冒牌貨
皆因有人攬住錯
諸君食飽冇回頭
惟有來者抵罪過

講起走水貨這個熱門話題、在下記起大概在十年前、當我在法蘭西旅遊期間獲得一次意外經歷。當時我與友人在春天百貨公司購物、並見到有一個攤位擠滿的都是女性顧客。當我走近才發現、原來那攤位是售賣L?手袋。我留意到每當紫荊團旅客埋到該攤位時、售貨員就說貨品售罄。但係當扶桑、高麗、甚至天朝團旅客埋到去又忽然之間有貨。總言之就是人人埋到去都買到有貨、唯獨紫荊旅遊團埋到去就食白果。當我滿心疑惑之際、幸好友人告知原因。他說是當地L?手袋總代理收到紫荊城代理商投訴、指紫荊水客到法蘭西搶購L?手袋返紫荊城賣、對紫荊城代理商構成嚴重經濟損失、因此當地公司都接到命令拒絕將L?手袋售予紫荊旅客。

相信紫荊人唔會日日搭十四小時飛機過去法蘭西買L?手袋、但當年城中代理商為保護自己利益就寸土必爭、盡一切手段杜絕L?水貨入境。之但係、何解家鄉代理商卻如鵪鶉般的任人搶自己嘅飯食呢?不如就聽聽榕樹頭講古佬口水陳點講啦!口水陳話、佢嘅同鄉陳秀才在紫荊城和家鄉兩地都是經營XX生意。由於兩地稅制不同、所以營運成本亦有差距。因此同一件物品、在家鄉的售價通常比紫荊城高、其中有些貨品嘅價錢更加高出四倍。聰明過人嘅陳秀才忽然想出一條發財妙計、趁着朝廷開放一簽多行之際、實行大車轉細車(將貨櫃車的貨品化整為零、放到手拉車上去)再由水貨客以螞蟻搬家形式送到家鄉那邊出售、回程時又再把家鄉產品運回本城售賣。由於利潤獲得倍數增長、陳秀才很快便暴發起來。為咗捍衛利益起見、他與一眾同道中人全力撐水貨活動、並利用宣傳機器宣揚水貨活動是帶旺本城經濟重要一環、絕對取締不得。

呢嗱、目前從事水貨活動只屬一小撮如陳秀才這類特殊人物、但當這種靠走私漏稅而發達嘅生財之道成為大眾所追隨嘅時候、亦即係國家稅收銳減之時。到時睇怕陳秀才都已經上咗岸、留底來墊屍底嘅、大概只係那群跟錯風嘅盲流而矣!

14 則留言:

  1. 域Sir,差不多四十年前我第一次去法國時,當時LV仲未有人認識,巴黎鐵塔只開第二層,對上一次去20多年前,買咗兩個男用銀包,每個港幣約750元,我記得800元是因為其中一個代我同學買收回他750元,當日香港中環門市賣1100左右,名牌加差價大才造成有水貨客。

    回覆刪除
    回覆
    1. 今日世界變喇、家陣嘅水客係搶購日常必須品、商家當然豬籠入水、家庭主婦就喊救命。矛盾就係咁起架咋!

      刪除
  2. 最近常常話在邊境開水貨商品場,皆因羅湖商業城一早已有,但為何香港總都是只聞樓梯響?相信那便是分薄既得利益者利益。如果真的大搞,市區及其它商舖一定會跌價,同時邊一班人可以在那些地方做生意,這也成了另一個問題?所以,有邊個官員敢揹呢個責?

    回覆刪除
    回覆
    1. 那肯定的是 , 小商户得不到任何甜头

      刪除
    2. 其實政府肯做多少功夫嘅話、矛盾不至於搞成咁。難怪有陰謀論指政府內有家賊啦!

      刪除
  3. 生意人嘅腦筋動得好快,佢哋利用開放水貨自由行,嚟個螞蟻搬家形式帶貨逃避關稅!咁反自由行旅客嘅人士,原因係咪純粹為咗太多自由行嚟香港呢?抑或係為咗某種利益呢?社會變得愈嚟愈複雜,作為巿民一份子,做每一件事都唔好單單睇表面,否則做咗幫兇都察覺唔到!

    回覆刪除
    回覆
    1. 我睇大部份人都睇得出某些人所做嘅嘢滿是陰陽怪氣、所以雖然坊間挨貴嘢個個牙痛咁聲都冇走出來支持趕客行動。不過、假如政府錯判形勢嘅話、咁就好難講架喇!上次「和尚打傘」一役不就是個好例子嗎?

      刪除
  4. 社會愈嚟愈複雜,水貨客都係喇!

    回覆刪除
  5. 水貨活動
    政府隻眼開隻眼閉
    唔知幾時開放番條水路
    比大飛每日運番三幾十架BENZ上去呢?

    回覆刪除
    回覆
    1. 哈哈、恐怕今回輪到由上面運番啲copy平治落嚟至係喇!

      刪除
  6. 食得咸魚抵得渴。針冇兩頭利嘅, 人自己犯賤囉.

    回覆刪除
    回覆
    1. 冇法啦、我國人認銀不認人、現在更進化到連國都唔使認架嘞。

      刪除