2015年3月30日星期一

阿蜂原來係猛人

你猛我仲猛
無端起勢賺
若覺不自然
全因你未慣

語所謂「人怕出名、豬怕肥」吖嘛、之不過呢句嘢只係適用於一般正常人身上、睇怕對於面無四兩肉嘅痴蜂哥來講就冇有怕至係。某日當痴蜂哥一覺醒來連眼屎都未抹乾淨、就忽然發現自己無端端成為世界級領袖、而且自己個大名還可以跟天朝萬歲爺、大教王等名人共列一榜、都可謂光宗耀祖矣!難怪痴蜂哥近日笑到機乎連個下爬都跌埋落地咁滯啦!認真恭喜晒喎!

2015年3月25日星期三

一代奇葩去矣



人去聲猶在
使君難替代
變幻乃無常
拚死無大害

日前獅城國之爸(下稱獅爸)騎鶴而去、以致當今天下又缺少了一位英雄人物。有人話當今獅城老總欠缺其父獅爸之風範、在國際上亦沒有如其父一般的江湖地位、恐難再像從前一樣帶領獅城左右逢源。到底是耶非耶、就要看過才知到。不過、當年獅爸在惡劣環境之下、依然能夠以一招「乜聯邦五國聯防」成功拉得強鄰馬國加入做盟友、從而化解彼此之間的猜忌、為獅城鋪出一條和平發展道路、由此可見他是個在矛盾之中抓緊機會嘅傑出人物。

2015年3月23日星期一

紊亂中的博奕


嗒落味生津
亂得夠勻循
你具降魔棒
我有風火輪

有人向紅家會總舵告密、投訴紫荊保安隊未盡全力去對付反水黨、令到入城辦貨嘅個體戶數目銳減、以致城中各個大戶小戶均蒙受巨大損失。雖然總舵曾經派遣密使南下了解情況、但之後並無任何跟進動作。於是有人借用總舵嘅平台發動一輸輿論攻勢、矛頭指向即將退出江湖嘅紫荊保安大隊長家英哥不盡力去保障到訪商客。事隔幾天之後紫荊堂揸拂人施威公開對家英哥歌功頌德、此舉都可謂大出眾人預料之外。有消息指這次是總舵就某人對家英哥指控作出明確立場。假如傳聞屬實嘅話、那即是說那些來說是非者已被總舵視作為是非人。紫荊堂有消息傳出、家英哥翻閱過他初入行時讀過的那部「保安十八鋤」天書、發現其中的一條「三人成眾罪」好使好用、於是吩咐手下在必要時就拿出來將反水黨班友仔鋤到頭暈眼花為止。照咁睇嚟、一向馴如羔羊嘅保安隊可能會化身為怒目金剛、到時倒反水黨就冇可能再玩得咁輕鬆矣!

2015年3月21日星期六

星君仔的啟示



有個細路玩百厭
遭人勸阻父黑臉
少時做慣霸王雞
長大橫蠻兼氣焰

日前我與友人在快餐店吃早餐時、見到隔行斜對面的卡位坐着一對年輕夫婦、而他們後面卡位就坐着一個中年男子和兩名大約三和五歲嘅小孩。其間那名年約五歲嘅小孩不斷在其坐位擒上擒落、將枱當凳坐、將凳當地踩、最後居然精彩到擒上卡位椅背頂部當馬咁騎、搞到隔離卡位那對年輕夫婦周身唔自在、但係那名小孩老爸卻毫無勸阻自己個仔嘅意思。直至到那位年輕男子被小孩嘅鞋底兜頭兜腦招呼咗一下之後、就忍不住轉過頭向那孩子的老爸講:“唔該你睇吓個仔啦、佢咁玩好危險架!”點不知那位老爸居然對個仔講:“快啲返落嚟、有啲人好憎細路仔架、落嚟啦、唔好被人話我呀、知唔知到呀?”在下當時心想、咁都得?

2015年3月19日星期四

四叔有好橋



愚人用高壓
能者自振刷
擅用好時機
無須出蠱惑

噚日在大牌檔嘆奶茶之際、忽然聽到隔離枱錢老二起勢咁對人呻、機乎連大榕樹嘅葉都被佢呻埋落嚟。佢話「自己行」是朝廷送給紫荊城嘅大禮、點知現在被打水幫班反斗星搞到佢檔故衣無人問津、認真害時出世。佢仲話會向紫府提出盡快將櫳底嗰劑「廿三味」拎出來煲畀班打水仔嘆、睇吓佢哋仲有冇得惡喎!嘩!錢老二呀、錢老二、你使唔使咁大整蠱呀?須知到煲「廿三味」唔係講玩架、更加唔應該用來作為生意人護航嘅工具、千祈咪打錯算盤呀!

2015年3月17日星期二

別打出個「反」來



為官不知民
注定周身痕
鬥嘴無意義
對事莫對人

近日城中響起一遍打「反水客」之聲、矛頭直指火雞幫借「反水客」為名宣揚「紫獨」為實。雖然「火雞蛇貓旗」被視為火雞國國旗、但在下總覺得係有人掛羊頭賣狗肉。因為在歷次的「反水客」行動裡面所見到的情況、只是一群人專注於辱罵遊客和沿路製造麻煩、實在見唔到有多大宣揚「紫獨」嘅意味。不過無論其動機如何、總之以粗暴行動去對待訪客點都係唔啱嘅。但係咁亦唔代表坊間並無反水客思維存在、畢竟基層生活費的而且確係被走水貨活動扯高的。之但係打「反水客」還打「反水客」、切勿一竹篙打一船人、否則打出個「反」來就真係中計矣!

2015年3月15日星期日

誠能服眾



一幅無形布
遮蓋整盤數
大話冇將來
維穩需公道

近日有報導指出、跟據屢發廳和守城部提供數字顯示、舊年入城嘅訪客約為4720萬人次、當中大約有3133萬人次是「過引遊」訪客、旅客為紫荊城帶來消費高達3582億両銀子。資料顯示、每日以「一天多行」入城多過2次嘅訪客約為3900人次、在守城部監察名單內、大約有13500人涉嫌從事水貨活動、而去年被拒絕進入本城嘅涉嫌水客約為29000人次、佔訪客總數不足1%。呢嗱、淨係睇訪客為本城帶來3582億両銀子收入、就夠晒和味啦!係嘛?

2015年3月13日星期五

屎坑橋



你玩神仙跳
我送屎坑橋
看誰好手段
一試便知曉

昨日大教館嘅民調大教頭忽然轉死性、向紫府獻計就紫改來一次全民表決、不過一向鼓吹公投嘅反盟頭領涼茶大狀居然反對。由此可見、以目前形勢對反盟而言、係絕對唔適合就紫改搞全民表決。因為連盲嗰個都睇得出市民已經厭倦政治爭鬥、而主流民意亦較傾向接受方案。換言之、民調大教頭明知到輸硬都要提出來搞、如果我話當中冇蠱惑你都唔信啦!係嘛?

2015年3月11日星期三

三十六計 之 金蟬脫殼



兵家大舞台
扮懵定蠢才
唔怕割禾青
只怕你唔來

呢嗱、江湖傳聞指今次反盟調轉槍頭、對火雞幫在打水行動中濫殺無辜老弱婦孺予以譴責、其實係三十六計嘅金蟬脫殼之計。在講傳聞之前、先交代一些來龍去脈。話說火雞幫(標記:火雞蛇貓旗)是由蛇貓幫(標記:蛇貓旗)分裂出來的。雖然同是激進派、但火雞幫所走嘅路線比蛇貓幫來得更加激進。兩幫幕後嘅重心人物皆與反盟有極大淵源。最微妙嘅就係、這兩個激進幫會嘅六名大老級人物均為大法會法師。傳聞指反盟之所以劍指火雞幫、目的是要在大眾面前跟呢隻火雞劃清界線。但奇就奇在反盟號召盟友聯署反紫改聲明時、被喻為火雞幫嘅掛名大老居然有份簽署。就係咁就引起人們質疑、究竟這個葫蘆裡面裝的是否假藥?

2015年3月9日星期一

火雞蛇貓旗



火雞壓蛇貓
當然會鬧交
兄弟變仇人
旗幟鬧雙胞

最近有報導指在江湖上興風作浪嘅「火雞蛇貓旗」是去年底由一名綽號國師的作家所寫的一編「聯邦建國論」所衍生出來、並指這個本地派組織(下稱火雞幫)嘅宗旨是不承認大歸、以及主張紫荊城脫離天朝獨立。呢嗱、這份刊物所講嘅係真唔係就不得而知、但係講到呢道就先要交代一下呢支「火雞蛇貓旗」嘅來由。目前城中有兩個不同字頭嘅本地派組織。一個是「蛇貓旗」組織(下稱蛇貓幫)、而另一個就是上述嘅火雞幫。據說兩枝旗本來是同屬蛇貓幫一家、後來由於該幫嘅笛公子和癲教頭兩大長老鬧翻而分家的。

2015年3月7日星期六

陰謀論 之 兄弟幫



一窟餓鬼充英雄
指天篤地喊屠龍
終於遇上神仙跳
累得英雄變狗熊

呢 個世界真係無奇不有、明明係「玩轉手拉車」吖嘛、但係班反丁居然會驚死冇人知佢哋想造反咁、高舉那枝發了霉嘅過氣埠旗招搖過市。咁搞法不獨只得不到被迫食 貴米嘅大眾認同、還免費為正方提供一個口誅筆伐嘅平台。現在問題係、點解呢班友仔唔驟忌唔做、係都要搞啲唔等使嘅嘢出來惹人話柄?仲有呀、上次「和尚打 傘」一役反方落得慘淡收場唔在講、最大鑊嘅就係在事後集體形象大插水、而且仲越嚟越唔得人鍾意。究竟點會搞成咁嘅呢?我就唔曉解讀嘞、不如聽聽陰謀論專家X君點講啦!

2015年3月5日星期四

水貨帶旺經濟?

水貨養肥冒牌貨
皆因有人攬住錯
諸君食飽冇回頭
惟有來者抵罪過

講起走水貨這個熱門話題、在下記起大概在十年前、當我在法蘭西旅遊期間獲得一次意外經歷。當時我與友人在春天百貨公司購物、並見到有一個攤位擠滿的都是女性顧客。當我走近才發現、原來那攤位是售賣L?手袋。我留意到每當紫荊團旅客埋到該攤位時、售貨員就說貨品售罄。但係當扶桑、高麗、甚至天朝團旅客埋到去又忽然之間有貨。總言之就是人人埋到去都買到有貨、唯獨紫荊旅遊團埋到去就食白果。當我滿心疑惑之際、幸好友人告知原因。他說是當地L?手袋總代理收到紫荊城代理商投訴、指紫荊水客到法蘭西搶購L?手袋返紫荊城賣、對紫荊城代理商構成嚴重經濟損失、因此當地公司都接到命令拒絕將L?手袋售予紫荊旅客。

2015年3月3日星期二

紫荊外傳



乍看似真不是真
踏上台板便上身
它朝莫怨時非爾
只怪當年自亂神

紅家會第五代總舵主正在全力捉家賊、據說被捉到嘅家賊之中包括第三代和第四代嘅重心人物。消息指、大批高級頭領夾帶私逃、並成功跑到山姆家尋求庇護、而其他中下級頭目則分散逃往外地。原來在最近十年內、外逃家賊帶走的銀両居然有十六萬億両之多。去年底紅家會喉舌揭露總舵亦擁有一份紫荊堂家賊名單、並聲稱必要時會把名單公開。雖然消息傳出之後、曾經在城中引起一陣恐慌、但有權威人士指出、只要有關人等不再搗亂、以及在適當時候引退嘅話、總舵未必會公開名單。

2015年3月1日星期日

永遠的關注

眾生原來係棄嬰
老爺扮作觀音兵
今日滿城皆炒客
它朝怒火更難平

正當社會上人人都話樓價狂飆是反映出樓宇供應不足、只有增加供應量方能符合社會須求。之但係、紫府嘅裁褲事務部部長親家強就公然唱反調。佢話近年房屋供應量已較以往大大提高、而且現時嘅「潛在供應量」及「實質供應量」都非常可觀。吓「潛在供應量」都得?睇嚟、如果講者唔係患上思覺失調嘅話、就梗係玩語言「偽述」矣!