究竟誰才是主人家？

排華不排洋

背後有無常

紫荊何處去

扮鬼拆屋梁

紫荊大教館館長這個位向來都是利洋人不利華人。大歸之後曾經有兩名華人出任館長之職、但其人還未就任、就遭受到「講讀生」群起反對。上任之後不斷受到衝擊和批鬥、甚至連雞毛蒜皮都要被人拿出來清算。由於日子實在太難過、結果兩名華館長都是知難而退。因此、大教館館長這個油水位又再度落到洋人手中。到底其原因何在呢？有人話、講得好聽就是大教館歷代英靈庇佑、講得難聽啲就係長期鬧鬼至搞成咁喎！

講開又講、紫府大老爺呢個位同樣是利洋人不利華人。記得在洋老爺揸拂時、所有華人管事人人聽教、個個聽話、而且還撈來一個殖民地精英雅號。之但係到咗華老爺接手之後、整個形勢立即產生一百八十度大轉變。雖然管事仍舊是那一群管事、但之前那種聽教聽話本色卻消失得無影無形、而那群所謂精英忽然變晒笨丁。因此首任大老爺老古洞在冧莊之際忽然腳痛跌咗落台。反而由精英過度而來、並且吹口哨上位嘅啱僧就由頭做到尾。不過輪到被傳是「孔夫子」地下門生嘅施威上台之後、又嘗試到舉步為艱嘅滋味。唯此君命水好獲得萬歲爺賜予「免炒金牌」一枚、所以至今依然兀立不倒、之不過就無日安寧矣！

一直以來、在下只聽聞上大人插手干預金紫荊事務嘅譴責之聲、但肉眼所見嘅就係紫府長期鬧鬼、「絲髮」和「咬肉」兩個重要陣地又被厲鬼所制、人民公社嘅「神位」雖然大部份被「孔家班」投得、但機能故障頻生使得一片嗚煙瘴氣、莫講話人做唔到嘢啦、就算係鬼都唔靈吖嘛！由此可見指責與實情大有出入、情形就有如山姆大叔每天都誣蔑萬歲爺欺負鄰家小子、但實情係萬歲爺嘅後園無時無刻都被山姆大叔所唆使嘅小子潛入偷番薯。照咁睇嚟、確實係有人惡人先告狀、難怪有人話城中有班人係山姆大叔嘅虔誠信徒啦！

咪話在下又係有彈冇贊、十七年時間話長唔長、話短唔短、之但係金紫荊依然被厲鬼所纏、連上大人這般財雄勢大居然不能將厲鬼消滅、如果唔係用人不善嘅話、就梗係屋企裡面有鬼、呢鋪都可謂失敗到連老祖宗都冇眼睇咯！難怪近日有人重提、請出二十三壇大法師到來治鬼啦！