標青背後

事實證明我標青

帶頭造反恃命平

天生我才今冇用

從此落泊嘆一聲

近日江湖上風雲變色、正當八大門派與紫府拳來腳往之際、效顰之潮老大神蜂忽然撇開學師聯會、自己向紫府嘅林幕僚、陳幕僚、過氣捉蟲大賬房偷、過氣地窟大總管等人下戰書、要求召開一場牙較擂台大決戰。可惜人家卻連眼尾都懶得望他一下、令到神蜂滿臉尷尬之餘、還要被紫大教館嘅鶴丸舍副舍長陳大哥發文公開痛批他欠自知之明、無知識、愚蠢、墮落、好出風頭、徹頭底尾是個死咗都唔知乜嘢事嘅傻仔一名。嘩、陳大哥、人家都有阿媽生架、使唔使鬧到咁盡呀？難怪有人話今次事件反映出、鶴丸舍人馬妒忌神蜂獨得山姆大叔力捧成當世英雄人物、所以大發脾氣唱衰佢啦！

上述事件使我記起、在戰中期間鶴丸舍先發文揶揄八大掌門在行動中畏首畏尾好比老態龍鍾嘅老翁一樣、繼而狂插神蜂只管嘩眾取寵而幫不上忙。由此可見戰中大軍分裂已成定局。戰中慘敗之後紫大學師會被指僭越犯上而被斷水斷糧、而且內部呈現分裂狀態、有不少人支持退出大學師聯盟另起爐灶。從以上趨勢看來、在未來抗爭裡面鶴丸仔已有撇開八大門派和效顰之潮等組織而獨自出戰之意。因此在下月初由人陣發動嘅「我要真補丸」大遊行、鶴丸仔未必會參與期中。

講開又講、在這個表裡不一嘅現實世界之中、雖然大家都是打着「我要真補丸」嘅旗幟、但實際上各方要求是有所不同的。八大門派好利、他們爭取的是實質利益、故目的不是要獨立、而是要獲得政治上的話語權。神蜂好名、他需要的是將自己變成一顆讓全世界敬仰嘅名明星。然而鶴丸仔嘅野心最大、他們要的就是自立門戶。因此各方的願景實際上是有天壤之別。所謂合作者、無非是先合力剷除敵人、然後再剷除身邊異己、直至到最後一強為止。可惜鶴丸仔卻不知到、自立門戶對紫城來說是自尋死路。因為一個自立門戶嘅紫荊城肯定失去牽制天朝效用、同時亦失去對外圍勢力嘅利用價值、更重要的是紫城本身是完全不具獨立生存條件、所以鶴丸仔落得出師未捷身先死嘅下場是一早注定的。老實講、政治這趟混水基本上係唔適合羽毛未豐嘅小朋友去沾染嘅、不如比心機讀好書好過啦！係冇？