2015年12月28日星期一

吹水又見吹水



聖上當年曾講過
三權合作冇囉嗦
今日勢成水火格
未來好事更多磨

記得某年當萬歲爺尚是儲君之時、曾到本城巡視。期閒他曾經講過、三權(行企、法、黐法)應當通力合作而非對抗。誰知萬歲爺話聲未了、就有人撲出來指那是干涉本城內務之舉、更有人喻之為企圖將本城染紅。無論人們點睇都好、那確實是萬歲爺對紫荊城嘅期盼、因此他心儀的代理人便成功登上縣太爺寶座。然而、自從縣太爺就任以來、不獨止係行企與遝法嘅關係趨於惡化、甚致連黐法部嘅兩名過氣大判官都在「黐法覆核」這個問題上各持己見而爆發口水戰。咁你話嘞、我哋嘅社會又點會有太平可言呢?因此有人認為縣太爺搞到整個社會變成河蟹、乃係領導無方所至、所以冇得留低。坊間亦流傳着下屆縣太爺人選、將會係當今大帳房掌櫃抓錢華。唔知你對呢個預測又點睇呢?

2015年12月25日星期五

有啥好肯定





官樣文章又一編
講人自講發花癲
天時地利皆不順
關門隱事過新年

日前縣太爺循例上京面聖述職、據消息亦顯示、無論是聖上抑或相閣大人均對縣太爺嘅管治成績加以肯定。然而、紫荊城內民怨未減、社會紛爭不絕、大型基建工程項目無不受到阻延、公家大帳房變成為超資工程填氹提款機、住屋問題比之前任何時間都來得差劣。在政治方面而言、莫講話與反對派嘅關係勢成水火、甚至連自己友籠裡雞作反。講到民生、就更加係乏善可陳。遠嘅唔講、就講吓聖誕節啦、聽聞話無論係工展會、抑式係美食節都係丁財兩不旺。咁你話啦、到底有啥值得肯定?

2015年12月23日星期三

累來累去累街坊



呢鋪阿蘭嫁阿瑞
亂制販民皆鬥累
一窟牛鬼與蛇神
帶挈全民皆受罪

日前在下同阿力在某處嘅擎天大餐廳吹水其間、遇見幾個熟口熟面嘅仁兄在隔離枱打牙較、其間聽到有人問點解會咁失策、搞到流會收場架?阿某工頭好勞氣咁話、那是販民頻玩催魂鐘嘅結果。然而擘口卻慢調斯理的反問、若非亂制縮晒去蛇竇又點會搞成咁?點知拗拗下、阿某工頭矛頭一轉、便直插雙茂部主管卡啦蘇辦事不力、仲賴佢搞到連個龍門都冇人守。聽到呢度、阿力忽然問、真係咁到得?我就話佢知、以垃圾會今日嘅勢態而言、唔係咁至奇。

2015年12月18日星期五

垃圾就是垃圾


阿茂整餅打乞嗤
關門隱事有嫌疑
呢煲唔鹹又唔淡
勢將港人當做豬

呢嗱、俗語都有話啦、貓捉老鼠、狗看門口、本來係各司其職嘅事。但係剛剛就發生咗一件狗捉老鼠嘅事。話說、有幾名垃圾會尊貴被指涉嫌私吞獻金、正當清天公署展開調查之際、垃圾會卻另起爐灶、搞咗個甚麼「調茶委員會」去跟進。好嘞、閉門調茶完畢、結果就係無證據顯示有人行為不當喎!嘩、收咗人家嘅禮金、仲存埋入自己個私人戶口半年都冇唔出聲、又冇向垃圾會申報利益、咁都話冇有錯。喂喂、真係咁都得?更加令人眼冤嘅就係、在發布會上正副主席兩人形同貼錯門神、仲刻意擺出一副互不妥協嘅態勢出來吖嘛!

2015年12月16日星期三

司焫覆核



行家一開口
最好調頭走
大話無真理
只有硬拳頭

呢嗱、指鹿為馬是政客搵食嘅看家本領、早已係見怪不怪之事。但怪就怪在、連被視為正義化身嘅無上判官、居然都有雷同吖嘛!早前豹隱多年嘅判官甲忽然公開露面、並點名批評戰中鬥委娘例摑濫用司焫覆核機制之時、唔覺意瀄濕咗另一位歸田不久嘅判官乙件衫。判官乙當然唔順氣啦、於是乎反指司焫覆核係一個專門替老百姓檢查公共機構推出嘅政策是否違法嘅機制、人人都有權使用它的。之但係、佢就冇就判官甲所提及嘅「司焫覆核是不能挑戰縣府政策」這部份作出回應。呢兩位過氣嘅判官老爺、你一言、我一語、搞到小市民無所適從咯。不過現在問題係、究竟點解司焫覆核呢家嘢會霎時之間潮起來的呢?

2015年12月14日星期一

垃圾會布屎陣?




爆粗無分左右中
玩屎玩到滿堂紅
莊家氣量如水退
閒家酷愛發噏風

日前議事堂尊貴鬼槍梁話有人在佢嘅枱底搽咗一笪米田共、搞到佢條褲近膝頭哥位置葾崩爛臭。於是向主持人食奶謙投訴、但有人話那只係小事一宗。嘩、咁都話係小事?難怪人人都叫呢個議事堂做垃圾會啦!正如阿邊個話齋、屎嚟架、臭架、搵啲咁嘢嚟玩、有冇搞錯呀?喂喂、假如真係有人搞鬼嘅話、呢個垃圾會就要改名為茅廁會至得喇!

2015年12月11日星期五

反恐 玩恐



反恐定玩恐
歷來多博懵
今者無厚道
遍地見哀鴻

突厥(土國)大佬埃爾不安為着阻止沙鵝炸毀伊恐佔領嘅油田和油庫、居然膽大包天、指沙鵝戰鬥機非法闖入其領空十七秒之久然後將之擊落、事後還聲大夾惡指那是灰熊京咎由自取和應該道歉。之但係、話口未完、埃爾不安自己又在未得巴比倫(伊國)同意之下貿然派遣坦克部隊踩入該國北部、又託辭打擊伊恐而派戰機飛入該國境內轟炸。點不知、當巴比倫大佬馬蘇武提出抗議時、埃爾不安卻說、在行動之前已經知會咗奧黑馬。由於埃爾不安嘅回應牛頭唔答馬嘴、氣得馬蘇武生蝦咁跳、在無可奈何之下、惟有向聯國投訴。

2015年12月9日星期三

一代女俠葉錫恩


賢士與鬥士
只差一個字
理性討公平
人皆稱俠義

一生誠心誠意為基層市民抱打不平和爭取利益嘅葉錫恩女士、於今年十二月八日上午九時許與世長辭、享年一百零二歲。一九九五年在市政局大選當中、葉女士被對手(曾經是親密戰友嘅講筒盟(後稱白鴨黨)長老)華叔將其對社會的貢獻指為小恩小惠。結果葉女士前後兩次在選舉中被擊敗而淡出政壇。今日回頭再望忽然發現、原來當年葉女士嘅所謂小恩小惠、比起當今政客們嘅大幫大忙不知優勝多少倍。葉女士雖然未有足夠力去牽動整個社會、但數十年來受過她幫忙嘅市民已是不勝枚舉矣!

2015年12月7日星期一

套丁



套丁不套丁
習慣當時興
行前先上岸
後者眼矎矎

近日「套丁」呢個詞語在江湖上熱起來、細聽之下才知到原來係買賣丁權圖利咁解。據說所謂套丁、即係有些邊疆居民(疆民)把丁權賣給某人、而某人又把手上嘅土地、名譽上轉讓予當地疆民、然後再由他們以自己名譽向縣府申請在該土地上興建丁屋。至於套丁呢個名詞出於何處、在下就唔知到。但係買賣丁權呢四個字就聽得唔少。不過咁、類似嘅丁權買賣交易、其實係持續超過四十年之久、但今次就有人被請去坐兩年半至三年花廳矣!正如某疆民長老質疑、在前朝都係咁做、點解要等到今時今日才拉人兼封艇呢?

2015年12月4日星期五

例摑姐 VS 烈判官



你話我浪費資源
我話你誤打誤傳
香港地滿城歪理
戇居青勝二和團

日前過氣無上庭大判官烈火麟公開指出、有人濫用司法覆核拖累咗本城大型機建工程、並點名批評前戰中鬥委娘例摑濫用司法覆核程序、但反遭例摑姐隔空發炮、質問「除咗判官之外、還有誰人有權力去推翻行企會嘅錯誤決定」?看來例摑姐滿以為今次一定窒到呢位過氣大判官口啞啞都未定。正當她沾沾自喜之際、點知烈判在另一個公開場合講、司法覆核並唔係用來挑戰府衙政策、審判院關注嘅應該係決策者是否依法、以及有沒有濫權。呢嗱、行家一出手便知有沒有、烈判就這麼樣簡單澄清一吓、就令到例摑姐懵都面埋喇!咁又係嘅、誰叫例摑姐問得咁貽笑大方?事實上她問得冇一窟似個大學生、極其量只像一隻小學雞而矣!

2015年12月2日星期三

公家大帳房又填氹



人皆喊壓價
工程涉灶罅
超資又超時
過水冇有怕

開講有話、免強無幸福吖嘛、因此免強得來嘅嘢、通常都係靠唔住嘅。呢嗱、當初府衙擺糕鐵上垃圾會議事桌嘅時候、遭到一眾尊貴壓價。經過府衙左除右拆省去大筆製作費之後、議案才獲得通過。好嘞、現在工程造到欲罷不能之際、致話唔夠銀両支付餘下嘅工程費用。如果府衙不增加製作費嘅話、工程勢必爛尾。如果府衙繼續泵水、又唔知泵到幾時才可以滿足這個無底深潭。填氹呢家嘢並非糕鐵獨有、其它項目如沙中鱔、講豬獒大橋、西狗文化區等項目全部都差不多。事到如今、納稅人才發現、原來自己一開始就注定要當冤大頭。呢鋪都可謂、全民瀄濕身啦!係嘛?!

2015年11月30日星期一

陳四姑開壇




壇前拍烏蠅
越拍越神經
全場板凳冷
講者眼瓊瓊

呢嗱、嗰位陳四姑連全城十八所大教館館監就係施威都唔知、仲夾硬老屈張郭李曾經做過華大教館館監、亦居然會獲得講大門生會垂青、邀請她前在講大教館、擔任「紫荊未來印像」論壇主講嘉賓。點知等到夠鐘開壇嘅時候、發覺台下聽眾連埋工作人員和記者計算在內、總數也不足十人。陳四姑便惟有硬着頭皮要求將演講時間稍為押後、好讓主辦單位想想辦法。誰知到再開壇嘅時候、台下聽眾反而買少見少。陳四姑登時嬲到震、並在惱羞成怒之下撇低台下幾名捧場客拂袖而去。其實又唔怪得陳四姑嬲嘅。因為呢單嘢實在係太過陰陽怪氣吖嘛!大門生會既然擺得開個壇、就算真係冇捧場客、亦應該找班臨記來撐起個場、就唔使搞到拍烏蠅咁難堪啦!係嘛?!

2015年11月27日星期五

反恐又見反恐




反恐定縱恐
越搞越難懂
人無貪之念
那有戰火紅

呢嗱、西方反恐反咗幾十年、但係恐怖活動卻係越來越恐怖。歸根結底就係、西方反恐有多重標準。凡係不利於他們的都被定性為恐怖組織、凡有利於他們的都是被稱為反抗軍。當初、天朝在自己地頭打擊東凸恐怖組織嘅時候、西方視之為政治打壓、當中花旗更加在國際場合出口術、指控阿爺假借反恐為名屠殺異己。雖然花旗在911事件之中被自己湊大嘅阿語丐得執咗一劑勁嘅、但死性依然未改、並間接造就出另一個恐怖組織衣撕爛角為禍人間。

2015年11月25日星期三

勿睇錯攤皮



錯攤皮做錯騷
八條細路今撈粗
陰溝裡面撐船過
有命來之冇命途

過氣單位領導人古董在驅異會大選前指出、本城面對嘅問題就係年輕人不認識祖家、以致現任單位領導人乜都做唔到。呢嗱、古董一開口就將年輕人講成敗家仔。咁搞法、班友聽完之後唔起晒槓才怪啦!係嘛?難怪古董當年咁有勇氣、都要腳痛收皮啦!俗語話齋、一隻手掌係拍唔響嘅。點解總係有人將年輕人嘅反叛視作為無知、而從不肯認真分析一下箇中原因嘅呢?難怪周不時都報錯數啦!喂喂、古董呀、古董、你講嘢則埋一邊、究竟係想和諧、抑或係想河蟹架?

2015年11月23日星期一

勝敗見真章



往日一條龍
簪花又掛紅
今日逢一躀
發爛更損容

驅異會選舉曲終人散、所謂勝者留低敗者去遠、本來冇乜嘢好講的。但值得一提嘅就係、飯盟兩名重量級人物鐵頭和二馬基居然雙雙墮馬。當結果公布之後、鐵頭登時承認失敗、並表示尊重選民決定。由此看來、鐵頭總算是個角色。相反、同樣落敗嘅二馬基就將失敗歸咎放對手組織投票、更指選民接受物質資源而改變投票方向。呢嗱、呢啲咪就係買板唔知埞囉!競選呢家嘢、若不是各出奇謀、又點會有勝望?我就係唔相信有人乜都唔做、就貿貿然參選嘅。仲有呀、亂制派係撬唔到飯盟嘅票嘅、而飯盟亦動不得亂制嘅票源、呢啲已經係普通常識嚟架啦!二馬基咁講嘢法、唔通佢認為坐喺度就可以等運到?呢種態度不獨止毫無大將風範、簡直連小學雞也不如。就憑這一點就可以想象得到、如他不檢討一下自己嘅話、恐怕在下屆垃圾會大選同樣會遭遇滑鐵盧。

2015年11月20日星期五

中東命運難自決



拳頭打道理
越打越麻痺
放縱伊絲蘭
如今知彼味

自從鐵塔城受到恐襲之後、法攔犀大佬捕浪得立即遣派唯一嘅核動力航母前往中東狂炸伊絲蘭閣。本來跟沙俄冇偈傾嘅奧黑馬亦不得不向其大佬灰熊京尋求合作。還有一個自稱是全球最大黑客組織公開向該伊絲蘭閣宣戰、並聲稱將會對該組織發動全球狙擊、入侵和癱瘓其所有銀行戶口、以及點晒班恐怖分子出來。呢嗱、唔知各位街坊點睇呢單嘢、但在下對此等講法抱有極大保留。眾所周知、山姆大叔擁有一支全世界最勁揪嘅黑客大軍。若然黑客真的能斷絕伊絲蘭閣嘅財路、山姆大叔又豈會錯過?除非如陰謀論所講嘅一樣、有人要利用伊絲蘭閣去打殘拾葉派、而刻意對這幫人留手、否則冇理由唔去擺平佢哋吖嘛!

2015年11月18日星期三

由足球賽事講起



你說我邪不是邪
瞞天過海放毒蛇
噓聲背後神仙跳
點紅點綠鬥多遮

呢嗱、好端端的一場足球賽事、居然淪為政治角力嘅導火線。昨晚「墨花神」球場上演一場「天 / 」世杯外圍賽、期間有兩群有心人在賽前加插一場治角力表演。當國歌奏起時有人報以噓聲、有人高舉「B洞洞」紙牌、有人豎起「紫荊並不是天朝」標語。然而對手方面亦不甘示弱、當中有人高唱「我們是紫荊」和高舉相關標語回應。總之一切都辦得有條有理、簡值得比熟手技工還要熟手。吓、嗰啲係乜嘢人嚟?聽講話、佢哋係陀地派和講力派嘅人馬嚟喎!

2015年11月16日星期一

Band 1 大教館



學武邊度好
靚大最靠譜
教頭多能士
學師跳都舞

日前見到阿黃唉聲嘆氣、機乎連樹上嘅葉都被佢呻埋落地。佢話佢個寶貝仔學藝嘅嗰間恕忍大教館原來係浪得虛名嘅喎!阿黃仲話館中嘅教頭質素良莠不齊、而有咁啱得咁橋、佢個仔跟嘅師父係呃飯食嘅一類教棍。咁又好難怪阿黃嬲嘅、佢辛辛苦苦供個仔入大教館學藝、無非係望個仔成才之嘛!殊不知、原來佢個仔跟嘅師父係泥鯭充正斑、張教頭證仲係流嘢嚟。搞到他銀両就花咗唔少、但係個仔就乜嘢都學唔到、仲跟玩師兄弟走去瞓街、真係唔嬲勢係假啦!佢問我知唔知邊間大教館係 band 1 嘅、因為佢想幫個仔轉館喎!

2015年11月11日星期三

出奇制勝



出動三點式
奇招代往績
制衡真實力
勝望靠春色

日前、一名驅異會參選者在旺區行人街開地攤、作出一項別出心裁嘅宣傳手法。當我迫到埋去一望時、機乎搞到鼻哥窿噴血咁滯。只見一名穿上三點式泳裝嘅妙齡少女、正在左扭右擰的擺出各種誘人post 讓圍觀者拍照。站在她身旁的另一名穿著便服女士就是驅異會候選人、現場還有人高舉龍獅會會眾納喊打氣。候選人仲許下諾言、話假如她當選、將會在往後的每個晚上都在那裡安排靚女、以飽街坊眼福喎!當時我心在想、萬一她當選、容乜易連驅異會都變得春色無邊?

2015年11月9日星期一

搬起石頭揼自己雙腳



豎起黃旗包喊打
今回旨在碰瀉茶
挑打但憑一字勇
滾紅滾綠再開花

自從「和尚打傘」一役之後傘兵聲名大噪、並且要派人競逐驅異會席位。講起嚟、傘兵封街鎖路七十九天、成功令阿爺明白點解有咁多人跑上街頭喊打喊殺、並促成他老人家在未來五年預算案當中增加對本城民生方面嘅著墨、呢班傘兵大哥都可謂功不可沒啦!既然傘兵對社會有咁大貢獻、那就當然要食住上、派人殺入驅異會撈番幾個肥缺來玩吓啦!點不知社會上居然有人潑冷水、仲譏笑傘兵今次摸錯門口、注定係煲燶藥嘥心機喎!

2015年11月6日星期五

由三隻手講起



禮多人不怪
手多實聽拉
若然撐不住
注定要趴街

呢嗱、真係唔講都唔知到、原來紫荊城已經榮升為亞太區店鋪高買之最。報導指出、在過去十二個月裡面、店鋪盜竊行為令城中零售業損失高達48.9億元、而且係歷年之最高。假如將此數攤開由銷費者分擔嘅話、每人須要承擔1,860元。據資料顯示、牛仔服裝、電池、流動裝置配件、嬰兒奶粉這四類產品是最受三隻手歡迎、而三隻手大部份(約84%)是入店光顧嘅客人、共餘16%就係由監守自盜嘅店員、以及行政失誤或從事詐騙嘅供應商所組成。咁搞法、你都咪話唔誇張。

2015年11月4日星期三

由干預汽車講起



寧願衰多口
切勿亂出手
同人唔同命
撐渡看水流

日前看報得知一名路人見到路邊一倍小型貨車大開中門、於是順手關之。誰知途中被貨車司機截停、並報警指控該路人涉嫌盜取他放有車上的手提電話。雖然當場並沒有在路人身上找到報稱嘅手電、點知一個屈尾十被人以「干擾汽車罪」控之、結果被判罪成。雖然路人獲得紫荊大教館臨床法律教育課程幫助上訴成功、但就要白白坐做了六個星期花廳躉矣!坦白講啦、司機明明係指控路人偷手電、但有關部門在唔夠證告人家盜竊之下、居然告人家干擾部車、都可謂九唔答八喇!

2015年11月2日星期一

小巫見大巫



阿奇生阿奇
水位浸眼眉
早知因是果
何以犯官非

最近號稱泄密小天王嘅大教館門生二馬恩在公廁與金紫荊泄密祖師地窿唐小便相逢、於是有禮貌地向前輩打個招呼。點不知地窿唐劈頭第一句就話二馬恩蠢到連豬都不如。二馬恩登時愕然起來、於是大聲講:“喂、我尊重你係泄密宗師才跟你打聲招呼、你把口使唔使咁臭?”地窿唐反駁:“我泄密是為維護公眾利益、而你泄密係危害公眾利益、彼此層次不同、所以冇面畀。”二馬恩指地窿唐當日在小圈子口水擂台大戰期間泄露行企會機密內容、才是蠢到連豬都不如。但地窖唐卻輕描淡寫的說:“我有腰骨、並已經為那宗蠢事作出咗承擔、所以你無資格同我相提並論。”地窿唐忽然問二馬恩:“你取咗老婆未、如果未取老婆就快啲去取番個、否則有起事嚟你衰硬既。”二馬恩只覺得同呢條友再講落去肯定人都癲、於是嗱嗱聲拉埋褲鍊、連手都唔洗就急急腳鬆人去矣!

2015年10月26日星期一

問幾時釘蓋




問吓唔使死
提早返屋企
臨場喫火药
收工食滷味

常聽聞人講、國之將亡必有妖孽。計我話、紫荊之將枯萎完全係業由自取。雖則話、縣首冇得揀啫、但係尊貴總算有得揀吖嘛!但係選咗之後才發覺、原來有冇得揀分別不大。因為在垃圾堆裡面揀出嚟嘅嘢本質上就係垃圾、而垃圾絕唔會變成臘鴨、但係縣首卻會變成垃圾矣!

2015年10月23日星期五

勿再惡人先告狀



廉費購物團
邀君上賊船
謀財兼索命
禍患永不完

俗語都有講啦、有強姦冇局賭吖嘛!誰知咱家紫荊城竟然鬧出局人購物嘅醜聞、而且仲係長鬧長有添架!呢嗱、事情係咁嘅、自從阿爺大開中門“放馬過來”觀光之後、城中忽然出現一批專門招乎內地旅遊團另類商店。此等商居在江湖上嘅名聲一向都好不到那裡去、而且時有貨不對辦、以及“唔幫襯唔准出門口”嘅傳聞。但奇就奇在、咱家縣府對於打擊強迫購物嘅態度卻于人有點“唔嗲唔弔”嘅感覺。終於在幾日前有一名老表團友唔肯做水魚、並跟內地領隊爆發囗角、繼而有人相約出門口隻抽。殊不知出到門口時、原來係唔係隻抽而係圍毆。就係咁、唔肯做水魚嘅老表就做咗死魚喇!

2015年10月21日星期三

癡瘋個唱



你狂我又狂
老鼠咬豺狼
一經時運到
曱甴也封王

上次阿爺走訪花旗嘅同時、癡瘋哥也率領兩名隨從(戰中廷、看更李)前往彼邦跟阿爺打對台、但到步後才發現稍有身份嘅人都跑晒去摱阿爺車邊、結果在飽受冷落之下面懵而回。不過今次機會又來了、日前癡瘋哥在阿爺訪問英吉列期間、同步在彼邦幾家出名嘅大教館展開巡迴演唱。據說今次他不獨只唱阿爺違背「離合聲明」唔畀紫荊人「普損」、仲唱阿爺做生意無誠信、並警告英吉列勿跟阿爺簽貿易合約喎!唉、英吉列正在鬧水荒、適逢阿爺拉條大水龍過去放水、而且連事頭婆都要出動全家三代迎接阿爺、但居然在此時有條茂利彈出來喊人唔好飲水喎!點知佢呢頭話口來完、嗰頭就有消自傳來指英吉列跟阿爺簽咗一將價值三千六百億両銀子嘅托水龍大單。由此看來、傳聞指癡瘋懵到上心口、原來係有根據嘅。

2015年10月16日星期五

癡瘋狂想曲


番邦捧佢上神台
無奈香江戇夾呆
今日癡瘋挨義氣
滿城花柳為他開

癡瘋哥一心想話去報名參加角逐明年垃圾會議席、殊不知一查之下才知到自己只得十九歲唔夠秤、於是把心一橫索性向法庭申請「撕法覆核」好讓年滿十八歲嘅青年人士都能夠參選。豈料縣衙大總管鄭奶媽卻跑出來放話、自稱從未聽講過社會上有咁嘅急切須求。奶媽咁講法、分明唔畀面癡瘋哥、仲譏諷佢不自量力、妄想改變整個選舉制度去遷就他。呢嗱、如果鄭奶媽真係咁諗嘅話、肯定錯晒嘞。須知到今日嘅癡瘋哥已非昔日嘅吳下阿蒙、而係被山姆大叔捧上世界五十猛人榜、而且仲係排名第十位嘅猛人嚟架!意思係話、後面尚有四十個有頭有面嘅世界級猛人都唔係佢嗰皮。所以鄭奶媽係唔應該妒忌癡瘋哥、而係要盡速修改條例、將參選年齡降至十八歲、如果能降低到八歲就更好。明未?

2015年10月14日星期三

喊都無謂



你玩我又玩
神仙都撞板
明知有今日
當初何作繭

日前城中一群社團界大佬跟隨西廠總管梟明北上冧鎮搵財路、其間中環創傷會大佬捹旗陳隔河向飯盟尊貴呼籲勿再拿阿嫲條扎腳布出來玩、應該放下爭拗和支持設立創新歌伎局喎!唔知捹旗大哥係唔係諗住噏幾句、就能夠令班玩嘢派尊貴回心轉意呢?如果係咁容易嘅話、紫荊城就唔使搞到成個火爐咁款啦!係冇?記否當初係邊個帶頭令到社會撕裂架?假如那群既得利益者唔係要大小通吃盡嘅話、那個可以幫助蟻民安身嘅「八問五」計畫又點會被搞垮?如果唔係有人得上床就要霸埋人家張被來冚嘅話,點會爆發豬狼鬥?如果冇豬狼鬥、社會又點會分裂到呢個田地?若然社會冇分裂、戰中三老又點會有機可乘攞把爛遮出來亂咁舞?

2015年10月12日星期一

好頭不如好尾



有着要爭先
人倒勿怨天
錢財裝滿袋
飲水要思源

兩年前、超人集團大老闆老李嘅公子小李涉嫌在大圈違反建築條例、而遭當地衙門檢控、事後老李在小李生日時給他一封大利事作為補償。去年老李在大圈撤資嘅消息不脛而走。今年暑假期間、大圈喉舌不斷指責老李食碗面反碗底、而連日來大圈網民亦齊齊在互聯網上口誅筆伐、並冠以他一個「李較腳」稱號。日前老李終於開口回應事件。他說、不是不想對那些抹黑他的謠言作出反駁、而係唔想在阿爺跟奧黑馬講數期間加添壓力。老李還聲稱自己對十分看好大圈發展、而且很佩服阿爺嘅領導才能、但同時亦指那些攻擊他的文章今他不寒而慄。有人話、老李拿阿爺來話說、委實太過大口氣和過於自負。到底事情又係唔係咁嘅呢?咁就真係見仁見智喇!

2015年10月7日星期三

人情冷暖話當奴



風光過後了無痕
一沉萬踩箇中人
往日功勞今日過
滿盤墨水潑一身

擾攘了三載嘅「貪嗔痴案」終於有新發展、前日過氣金紫荊揸拂人當勞噌(下稱阿噌)終於被開封府控以兩條行為不該罪。坊間流傳指阿噌今次被控行為不該罪、最多就係被送到大池塘跟佢嘅結義兄弟詩人許團聚、假若被控以乜乜勾結罪而又入罪嘅話、分分鐘提早埋單都有可能。之不過咁、阿噌是否罪成暫時尚未知曉、但人情次暖勢態炎涼就可見一斑矣!莫講話一向唔多妥佢嘅人齊齊跑出喺佢身上曬靴、甚至連佢屋企舊日嘅伙頭都跳出來唱佢用隔年月餅打賞家丁。喂喂、各位阿哥、阿姐、就算係落水狗、都唔使打到咁盡嘅、係嘛?!!

2015年10月5日星期一

一數兩計

一條大數兩份計
發達不成勿閉翳
向來官商同一脈
九折出門十三歸

有商界代表指出、今年十一黃金周假期生意淡薄乃係趕客黨所關照嘅、並要求縣府重啟「一天多行」政策。然而商發局主管卡啦蘇話、根據入城署在假期首日錄得嘅訪客入境數字、比去年同期高出一成半。言下之意大概係、他已達成旺丁指標、能不能旺財則責不在他。點不知話口未完、卡啦蘇就被人質疑佢死人燈籠報大數。現在問題是、究竟係卡啦蘇作大、抑或係有人借題發揮迫使縣府恢復「一天多行」政策、好讓他們繼續發水貨財呢?

2015年9月30日星期三

揭盅



有條細蚊冇人性
篤爆教頭唔夠秤
務求上位搏偷雞
裝神弄鬼最虔誠

大教館長老會按照老規矩閉門造車、投暗票決定是否聘任蚊蚊陳教頭為副館長嘅決定、終於揭盅了!有份參與投票嘅大學徒代表二馬因假借替蚊蚊陳教頭抱打不平為名、公然違反保密協議、把否決聘任蚊蚊陳為副館長嘅數據大公開。二馬因指出、長老會否決蚊蚊陳的其中一個理由、就係蚊蚊陳教頭的資格只屬第二班、根本無能力去教導第一班嘅大學徒。在下真係分唔出、究竟二馬因係幫蚊蚊陳、抑惑係驚佢輸得唔夠痛快。連蚊蚊陳嘅死穴都篤埋出嚟、你叫佢以後仲點去跑江湖混飯食呀、老哥?!

2015年9月25日星期五

寶島開綠燈



弱勢藍燈籠
馬哥坐華容
英子逢甘露
刺姊嘆技窮

明年寶島大莊家寶座花落誰家大概可以預見、傳聞指就算綠幫嘅大家姐菜英子瞓著覺都會被捧上下一屆寶島大莊家寶座。因為目前代表藍幫出戰嘅刺繡洪猶如越級挑戰、而且一直被菜英子遠遠拋離。最弊傢伙嘅就係、逢選必輸嘅親幫大佬送貨瑜還要跑出來搶剌繡洪嘅票吖嘛。咁你話啦、菜英子點會輸?難怪花旗大佬奧黑馬早就喊菜英子過府密斟、要求她答應在當上大莊家之後就要聽佢支笛、以及骾曬押在花旗倉底嘅一大批爛銅爛鐵、仲要大開中門讓金山肥牛在寶島牛肉市場大展鴻圖啦!

2015年9月23日星期三

天師「篤」妖



指左望右喝一聲
單蹄蹬地最靈瓊
諸君咪話唔緊要
弄假成真你便驚

日前護國天師陳所以聲稱、自從「和尚打傘」一役之後、一股強烈嘅「催殖化」妖氣瀰漫着香江城、但香江府衙又無依法禁止該等妖氣蔓延。於是乎立即開請祖師爺上身指引一下喎!只見陳天師指天蹬地之後疑似祖師爺了上身、並怒罵香江府衙辦事不力、視獅龍旗重現江湖而不見。更加可惡嘅就係、府衙居然任由獅龍幫大搞「去龍化」和在遊客區趕客、令到全城陷於紛亂困境之中。祖師爺臨走之前還寄語香江府衙、指應禁則禁、應留則留、應管則管、絕不可有半點含糊。照情形看來、祖師爺對香江府衙嘅慢三拍辦事態度已經不耐煩矣!不過打開部「歸本法」左查右查、都查不到陳所以天師所講嘅「禁止妖氣蔓延」這麼樣的一條法則。咁算唔算係間接催促府衙擺廿三條台呢?

2015年9月18日星期五

三權分立與地位超然


從前總督位超然
三權分立理相連
今天縣首非連理
一寸之遙隔地天
 

自從大歸之始、香江城便開始染上內外感雙侵症、而且病情越來越嚴重。於是乎、朝廷就開出各種不同嘅藥方、希望盡快為香江城殺菌消毒。殊不知藥力雖強、但細菌嘅抗藥性能力更加強、結果搞到香江城就快要靠吊鹽水活命。呢嗱、就在幾日前之嘛、西灣辦嘅張大總管放話、指不少判官誤解香江城奉行的是「三權分立」管治模式、但事實上並無此事、昨日無、今日無、今後也不會有。他強調、香江是一個以行政為主導嘅城市、而縣首在這方面嘅領導地位是超然的。由於張大總管那番話給予人一個縣首凌駕三權之上嘅印象、嚇得無上法庭嘅馬大判官立即引經據典、指「歸本法」清楚闡明三權分立、並特別指明司法獨立不受任何干預。但法政衙門嘅袁大總管立即澄清、指洋文嘅 separation of power意思常被解讀為「三權分立」、但實情是指「司法獨立」才對。現在問題是、究竟張總管憑甚麼指縣首地位係超然嘅呢?不如讓我們來探討一下吧!

2015年9月16日星期三

發軟蹄


契錯大佬插錯旗
口甜舌滑放飛機
腳步浮浮哭着笑
軟蹄硬嘴聽收皮
 

日前戰中廷助教認真風騷、佢話「和尚打傘」嘅目的就是要拖垮阿爺嗰隻831紅股、現在831已冧目的已達、注於收受花旗柑一事只係濕濕碎至喎!戰中廷助教仲話、若然長老會堅持要以三不「不准當長老、不准做監督、不准食黑柑」將他綁三年嘅話、佢冇乜所謂架、只不過恐怕西方極樂世界會好唔高興喎!呢嗱、戰中廷助教咁講法、雖然聽起來有點屁股幽靈咁嘅味道、但諗深一層又覺得大教館真係唔多敢對佢動真格。如果你話畀我聽、戰中廷助教係驚食豉辣炒魷驚到搬西方極樂世界出來嚇人嘅話、我係唔會相信嘅囉!我反而覺得、首先係佢係無須依靠選民投張票畀佢才有工開、其次就係即使大教館唔要佢、尚可投奔西方極樂世界、所以才會咁大口氣架咋!乜唔係咩?!

2015年9月14日星期一

由噓國歌講起



一噓訴心聲
剌激腦神經
不怕前無路
獨怕後追兵
 
日前城中一群球迷在一場國際足球賽事之中、拉開一條寫着「我哋係金紫荊」嘅橫額、並且集體噓國歌和掟物件、結果被當值監場人員寫入報告內、並引起世界足聯(世聯)關注。據說世聯可能會判罰下一場比賽齋踢、即係禁止球迷入場觀看咁解。人們只把眼光集中於世聯是否會這樣做、而忽略咗噓國歌球迷嘅動機。以當時情況看來、是一群有心人利用國際賽事這個平台去宣示自己嘅政治立場。相信無論是判罰齋踢、抑或係取消本城舉辦賽事嘅資格、對他們來說都是無關宏旨的。因為他們旨在宣傳「講獨」吖嘛!

2015年9月11日星期五

你還愛佢嗎?


一槍焫散九重天
盡拆圍場共並肩
終於發現唔多妥
欲哭無淚語無言
 

約在十五年前、花旗與歐盟聯手在中東引發一場名為「阿啦拔之春」嘅民主運動、到咗十五年後嘅今天開花結果、數以百萬計來自中東和北非嘅難民湧向歐洲去。目前歐洲主流意見都是不願多收難民。雖然德意志一姐墨黑耳提出歐盟成員國合力收容難民、但原來亦只屬曲高和寡。北列顛答應收容兩千難民之後國內有聲音傳出、寧願退出歐明也不肯再收容難民。花旗顯現得更加小器、只答應收容三百名難民。正在大眾都感到頭痛之際北列顛忽然有所發現、前指出在四百萬名難民之中混入了數千名醫師蘭閣恐怖分子。咁講法、歐盟終於能夠以國家安全為理由拒收難民啦!係嘛?其間胸牙脷一哥說得最坦白不過。他說若然不制止中東難民繼續湧入嘅話、歐洲人就要面對喧賓奪主和淪為小數民族之危。看來、西方對百萬難民湧入感到吃不消。之不過、一旦下逐客令嘅話、他們以之為傲嘅「人權」價值觀便會全面破產矣!

2015年9月9日星期三

青出於藍


祖師壇前罵龜公
教頭扮懵學生從
蕃旌背後無真理
斯文掃地發噏風
 
呢嗱、自從大教館成立以來、歷屆館監嘅角色都是由洋督來擔當的、直到大歸之後才改由縣太爺去坐這個位。本來這是順理成章的事、但奇就奇在大學徒居然要反對。不過諗深一層又一啲都唔出奇。原因幾年前大生會與舊生會(下稱兩會)聯手發功、阻止大教館接受李老闆為加建新的練武廳而捐出嘅大筆銀両、事敗之後便將矛頭直指館長。結果連續三任龍裔館長冇個襟撈、最後要從北列顛聘個洋人來當館長才相安無事。呢嗱、經過連番大捷之後、兩會又點會話唔心雄、唔齖齰呢?不過在最近一宗武力衝擊長老會事件之後、大生會一哥居然話一切暴力事件均不是兩會所為。嘩、佢咁講法、都可謂禮義廉俱全喇啩?!

2015年9月7日星期一

取消恨奶令?


為利行頭作先鋒
中途易帥夢成空
祖師壇前擺路祭
挾迫關帝坐華容
 

近日城中有人高呼貨品滯銷嘅情況比「沙屎」時期更差、並將責任歸咎於陀地趕客、而且借傳媒把口向縣太爺喊話、要求解除「恨奶令」和重啟「一簽多銀」政策。喂喂、請先等一等、既然係關陀地趕客嘅事、只須要加強檢控就得啦、何必要搞咁多花臣?不過縣太爺亦唔係食齋嘅、當然冇咁順攤啦!據縣府發言人指出、每日出入數次嘅拖喼黨只是搶貴米嘅水客而非觀光客、故暫時無計劃解除「恨奶令」或重啟「一簽多銀」政策。但事頭黨發言人則認為這樣陰乾落去、金紫荊遲早都要變成廢柴。呢嗱、聽落確係公有公理、婆有婆理、其實大家都只係著眼於一個利字之嘛!係冇?

2015年9月2日星期三

放生咒


天靈靈呀地靈靈
茅山師傅眼矎矎
眈天望地無料到
盼望街坊莫詐型
 

繼涉嫌收受外來資助、以及策動「和尚打傘」嘅四名教頭(蚊蚊陳、民調耀、戰中廷、文學量)被大教館長老會放生之外、昨日青天衙門又宣佈放生一群路霸。據說青天大老爺接受被控一方嘅理由、認同刑部並無按照規定於兩週內向青天衙門就「路霸藐視法令」一案提出控訴、所以將利益歸於被告、並宣布不受理該案。

2015年8月31日星期一

兜巴扯面



明打既不得
暗鬥易迷塞
先天無能士
代代喊冤屈

被放逐嘅四口老大近日又口擘擘潤起施威來。佢話唔知到講馬辦和西環辦有冇向大教館長老會施壓、阻止提升蚊蚊教頭做副總教頭、但係佢就批評長老會堅持要等埋首席副總教頭一齊才推選嘅理據、比起當日亂制派在甩轆事件之中堅持等埋八叔才舉手嘅理據更加荒謬、並直指施威做得太過「適度有違」喎!嘩、四口老大咁講嘢、咪即係以贈施威為名、請阿爺吃兜巴扯麵為實?喂喂、呢碗麵會唔會食出禍嚟架?閣下執著成咁、小心累親則邊嘅人至好呀!

2015年8月28日星期五

一台獨大


一台獨大有乜好
吞金滅餸確離譜
廣大市民心火燥
三句唔埋問老母
 

前幾晚在街口被黃伯截住、佢話屋企個公仔箱唔知係咪壞咗、個老番台搞來搞去都只係得單聲道、搞到佢聽極都唔明套劇講乜東東、仲叫我幫佢較番雙聲道喎!咁我咪跟佢上樓睇吓幫唔幫到佢囉!點知我發現佢個公仔箱好正常、於是問他究竟是那一套片集冇配音。佢話唔知劇名點叫、只記得一套係檢查骨頭破案、另一套係講個男主角諗嘢好叻破案嘅。我聽後登時明白晒、於是話畀佢知那兩套片集已經冇配白話、完全唔關部機事。點知黃伯聽完我講之後滿臉不悅、仲問我點解失驚無神取消咗配音、我真係唔知點答佢囉!

2015年8月26日星期三

寶島無國賊


非龍亦非寇
惡毒冇人有
存心當國賊
果然爛得透

 
島嘅過氣大佬燈龜經常開口及著脷、話釣島屬於扶桑都唔在講、現在更加變本加厲、在抗戰勝利七十周年慶典在即便投書扶桑、直指在七十年前寶島與扶桑屬同一國、所謂抗戰完全係子虛烏有嘅事、係有人刻意利用這種莫須有嘅罪名去抹黑扶桑的。此事曝光之後便在寶島牽起翻天巨浪、並鬧得滿城風雨。

2015年8月24日星期一

攴嘢奇談



先生教學我走堂
攬著阿嬌去洞房
點知半途失路向
惟有就地嵌一樁

呢嗱、我哋紫荊城嘅大學生認真係乜都出位過人嘅。吓、乜嘢咁駕勢?之唔係同女友在行人路邊當眾搞魚水之歡囉!不過請聽清楚、我講緊嘅唔係揩大咗嘅忽仔、忽妹、而係紫荊城高上學府嘅大學生。月前一對男女大學生在慾火攻心之際、連租用時鐘酒店都嫌費事、便將行人路邊當作新房、就地大幹起來。登時睇到過路嘅街坊人人心癢癢、個個眼甘甘。後來還被人將條片擺上互聯網供諸同好、真係唔知到當佢哋嘅爸媽睇見之後有何感想矣!在早幾日前又有一對人細鬼大嘅男女小學生、在公屋後樓梯上演顛鸞倒鳳、而且還有另一名男童用手機在旁拍攝。依我睇、假如唔係驚動咗大廈保安報警嘅話、那段片分分鐘紅爆互聯網。呢鋪都可謂攴嘢無大小、最緊要啱橋咯!

2015年8月21日星期五

痴瘋自白


亂搞無罪反有理
三山五嶽同朋比
秋後算賬太猖狂
紫城價值不如屁

豈有此理、縣太爺居然明目張膽的搞秋後算賬、把我哋一群「和尚打傘」嘅同志逐一押上公堂判罪。咁搞法分明係踐踏人權和打壓學術自由、簡直係無法無天。眾所周知、我哋一班「和尚打傘」同志嘅天職就係替你哋去保衛金紫荊免受紅潮薰染吖嘛!要革命就梗係有犧牲、做唔到生意咪關鋪去遊埠囉!再唔啱、就摺埋間鋪開枱打麻雀吖嘛!點不知你哋班街坊好人當賊扮、唔單止唔感激我哋搏命替你哋爭取話事權、反而唱衰我哋、都可謂好心冇好報咯。坦白講、我哋霸住條街七十九日、無非要話畀全世界知、你哋係被「棺箱勾結」累到交唔起租、買唔起樓、攞唔到公屋、我哋至替你地去瞓街啫!咁仲唔夠偉大咩?我哋之所以衝擊人民公社、就係因為你哋選咗一群不顧民生只管發財嘅自私鬼出來做代表。記住下次選我哋、飛起佢哋喇!

2015年8月19日星期三

小心拖出禍來


有錯必須認
唔好兩頭擰
有法不依從
遲早爆鋪勁


在去年「和尚打傘」期間、大撞黨成員水佬超涉嫌從高處向捕快灑下「陽之甘露」而被捕。有人用手機拍得水佬超在被押送期間涉嫌遭七名捕快毆打。事件至今已經過咗十個月時間、但刑部衙門依然未有提出檢控。據刑部袁大總管透露、待米字國大狀師提供意見後就會有所決定、並強調假如意見清晰、就不必等待巡捕房提供資料都可以展開行動。呢嗱、唔知各位街坊點樣去看待此事、但在下就覺得唔多妥。因為聽落之後感覺上係巡捕房拖延呢單畸屎嘅進度多啲喎!咁咪即係暗寸新任總捕頭冇料到?

2015年8月14日星期五

貨幣戰


吊桶十五個
獨怕唔識貨
兩極欠勻遁
難卜福與禍
 
08年起、人銀嘅幣值不斷飆升、由原來嘅八個人銀兌換一個花銀、升至15年嘅六個人銀兌換一個花銀。咱家紫荊人從此就挨貴嘢、挨到眼光光。之但係、花旗一值不滿意、並指控天朝操控貨幣幣值、從而阻撓人銀成為世界主流找數貨幣之一。最近花旗又迫使人銀升值、天朝只好放手讓人銀在國際容貨幣市場自由泛動。殊不知人銀不升反跌、而且連繼貶值幾日。呢嗱、花旗迫人操縱幣值不成之下、居然睩大雙眼發開口夢、反指天朝故意讓人銀貶值靠害花旗。喂喂、係又鬧、唔係又鬧、像花旗這樣的超級大國、遇起事來居然地痞無賴更加無賴、都可謂貽笑大方矣!

2015年8月12日星期三

都係睇真啲好



唔知真定假
聽到口啞啞
若是假不來
誰敢當玩耍

最近聽到一位在某某軍事雜誌社工作嘅友人分析、建設「講豬馬大橋」、「糕鐵」、「三跑」和「癲馬艦」唔單只對本城經濟有利、並且具有非常重要嘅軍事戰略價值。當各個項目配合起來便可以形成一座面對太平洋嘅超級大炮台、到時「二豹」、「裝甲獅」和其它軍事設施都可由透過「糕鐵」和「講豬馬大橋」快速運送入城布防、「癲馬艦」可以為守護南海和進出大平洋嘅艦艇提供後勒補給、「三跑」可以為飛出南海和太平洋殺敵嘅「戰鬥雞」、「轟炸雞」、「預警雞」等不同「雞」種提供有利嘅升降陣地。因此無論有幾多人反對、此等項目最終都會建設起來的。

2015年8月10日星期一

民主反民主



生骨大頭菜
問你愛唔愛
買板唔知埞
仗勢更狼胎

繼講錯電台淪陷之後、紫荊大教館亦正在面臨巨大考驗。由於今次講錯電台更換嘅新班頭被懷疑係盟主派嘅架忌冷、故有人視之為是紫府軟弱而且間接助長激進飯盟嘅氣焰。前幾日、大學徒會首領二馬因公開講、硬闖長老會嘅行為與大學徒無關、所以誓不道歉。照咁睇嚟、原來今日嘅大教館學徒連乜嘢係「我雖不殺百人、百人因我而死」嘅道理都唔懂。假如將來由呢班大帝去領導咱們的社會睇怕都死得人多、你話唔驚就假喇!係嘛?!

2015年8月7日星期五

水的疑惑



塘水滾塘魚
露出大肚臍
買板應知埞
問價看時宜

紫荊城都可謂多事之秋、勢估唔到今期食水安全問題越炒越大鑊。最弊傢伙嘅就係成個水記部門擺咗喺度、但係發現食水含重金屬嘅竟然係大雲姐呢位人民代表。衙門方面知到自己行頭執輸、於是速速宣布立即徹查。唯獨是調查嘅速度比蝸牛還要慢幾分、而且還給予人一個到喉唔到肺嘅印象。涼茶大狀眼見勢色唔對、於是試圖先向飯盟取得共識、然後再向亂制爭取支持運用「凸拳法」在人民公社開堂審理此案。但據稱涼茶大狀嘅提議、連自己友一關都過唔到。咁你話奇怪唔奇怪?

2015年8月5日星期三

誤判玄機用錯神


一人卸膊眾遭殃
學生作亂已為常
端端學府龍蛇集
回頭再望更心傷

江湖上有傳聞指出、大教館長老會早已準備好否決戰中敏教頭嘅晉升議案、只是揸拂長老金刀老大唔想喺臨退隱之前孭起呢隻鑊才一直拖延。換句話講、即係金刀老大嘅拖延、間接向有心人提供鼓動大學徒犯上作亂嘅機會。在今次事件之中有部份長老受到身體上嘅損傷或心靈上嘅驚嚇、還有一位長老劈炮而去、都可謂人算不如天算矣!如果傳聞屬實嘅話、金刀老大豈非受人之託壞人之事?即使係咁、想甩身都唔係咁容易。現在就有人提議金刀老大冧莊一年、待事情搞妥之後才退隱。呢個故事話畀我哋知應做就要做、決不可拖泥帶水搏甩身、否則偷雞唔成蝕揸米架咋!

2015年8月3日星期一

爭端背後


越鬧越兇狠
唔似人咁品
有好不曾學
寧願做痞躉

在下常聽人講、人類嘅貪婪和虛偽係與生俱來的、越是掩飾越見虛偽。今次全城鬧爆嘅大學徒迫宮事件就是個活生生的例子。明明是有人要奪取大教館嘅學術和人力資源控制大權不遂而搞大件事、但卻連聲指責別人干擾學術自由、並指控管理層粗暴阻撓戰中陳大教頭升官發財、於是高舉以武制暴旗幟去衝擊和圍堵管理層成員。唔知各位有冇覺得齣鬧劇嘅情節熟口熟面呢?呢嗱、山姆大叔與架仔夾計侵吞釣島、並反指紅家會在東海搞事。明明是安南仔和賓仔在南海侵佔天朝島嶼、而山姆大叔又講成係紅家會在南海欺壓鄰居。山姆大叔把六成家丁派到亞洲來、並頻頻與南海諸族在紅家會門前舞刀弄槍、但係當紅家會家丁在自己門前練拳嘅時候、即被指責為對山姆家挑釁。呢種無賴行為是否與大學徒嘅言行同出一轍、大概不言而喻矣!

2015年7月31日星期五

當講惡已成習慣


鬥垮兼鬥臭
人衰冇藥救
越反越橫蠻
兒子打老逗

紫荊大教館任命副館長風波越鬧越大。日前大批學生包圍及衝擊大教館議事廳、並造成館委受傷、繼而又有人在停車場圍堵館委狂罵半小時。更不堪嘅就係、當館方召來警察解圍時、學生會居然本末倒置的指責警察進入校園打壓學生、事後還要在電台聲稱他們只是以武制暴而矣!但有館委不甘當政治靶子、而馬上宣布辭退館委之職。呢嗱、呢群學生之所以如此斗膽、大概是受到「和尚打傘」一役嘅薰陶。當時紫府不敢以強硬手段對付示威者、令他們認識到只要堅持有前冇後打死罷就嘅決心、當權者就會退縮。今次事件顯示「以武制暴」已經成為年青一代嘅金科玉律。

2015年7月29日星期三

由執錢講起


以為執到寶
誰知衰運到
遭人拉審押
就此廢前途

從前我哋紫荊人有句老話叫作「地上執到寶、問天問地擺唔到」、之但係到咗今時今日仲係咁諗嘅話、肯定一身蟻矣!幾個月之前有幾個懵盛盛嘅鏢師押着大批銀両在高速官道邊走邊跌錢都唔知到、令到途經此道嘅其他人士以為天降橫財齊齊執豆咁執。但勢難想到今次並非天降橫財、而係天降橫禍。原來、他們的一舉一動都被巡捕房嘅千里眼睇得一清二楚、甚至連相都影埋。結果巡捕房將拾遺者逐一拘捕、再交由刑部衙門判以偷竊鏢銀之罪、然後打入大牢。就係咁、大好前途即成泡影矣!

2015年7月24日星期五

炒魷風雲


你傳我又傳
唔知方定圓
圈中無喜訊
大話當真言

江湖上不斷流傳繼統戰部頭領掙七成和組織部頭領戥你威兩人被炒之後、下一名被炒者將會是飛鴿部頭領咭蘇、並形容今次事件係施威為連任城主所作出部署嘅一部份。不過圈中耳語、施威手上有一份候炒名冊、除了咭蘇之外還有其他部級和副部級頭領、甚至連三大總管之中也有一人嘅名字出現在名冊之中。據說該名冊是由施威起草再由阿爺親自拍板的、相信誰也阻擋不得的。

2015年7月22日星期三

世事如棋


你說我奸不是奸
吃罷終歸要埋單
錯在頻頻失預算
關門隱事也艱難

呢嗱、我在前兩編文章剛提到衙之中有幾隻水蟹沙嫌騙取病假、並跑到佔領區當皮佬禮保鏢而縣太爺卻毫無反應、話口未完昨日衙門在毫無先兆之下宣布解除統戰廳廳長掙七成、以及組織廳廳長戥你威兩人嘅職務。據路邊社社論顯示、以其炒一不如炒二。因為獨炒老戥嘅話、反對派必然會大造文章指責衙門迫害忠良、但連同穿紅褲子嘅七成大叔一起炒就可以塞住悠悠眾口。更妙嘅就係兩位廳長均表示、係自己炒自己魷魚嘅。話時話、掙七成年近古稀須要退隱尚講得通、但戥你威尚未到花甲都話要退隱就有點牽強。佢哋咁講法、唔知你又信幾多成呢?

2015年7月20日星期一

自作業



寧願同閉翳
拒絕齊富貴
損人不利己
注定窮一世

據縣太爺施威講、設立科技廳是要為紫荊城工業開拓一條新出路、但飯盟卻不理三七廿一拼命刁難。日前標童盟一哥飯爺在人民公社指出、設立科技廳等同將金紫荊融入內地、目的是要拿咱家的優勢去貼人家。宮能組嘅奶缸大叔亦不視弱、他形容科技廳是電腦病毒。然而燶盟大佬雀人卻以縣府不准神童電視台掛牌為理由直指施威才是電腦病毒、仲話主機不換就會蠶食創新喎!呢嗱、相信腦袋唔係生錯位置嘅人都心知肚明、禁止神童電視台掛牌嘅並唔係施威呢個芝麻綠豆般大嘅官架啦!注於誰人才是真正嘅主機、大概唔使講出嚟啦!係嘛?換主機?咪傻啦!從以上嘅講話就聽得出、飯盟之所以拉布就是要跟施威過唔去。咁即係話、有死金紫荊死、搞垮施威就收工食幾味。明白未?

2015年7月17日星期五

框架的疑惑



有框無框都是框
臭花凝聚臭草甖
既是規則由我定
誰敢落鑊我敢烹

白鴨幫剛剛宣布將老將阿黃驅逐出幫會、理由是他公開唱反調令到幫主瞓街姐唔高興。呢嗱、姑勿論白鴨幫是否不能容納不同聲音、但幫主果斷清理門戶的確能夠起殺雞儆猴作用。相比之下、金紫荊揸拂人施威眼巴巴的看着自己手底下幾隻水蟹爬上岸跟除李工頭去瞓街、甚至有人涉嫌呃病假跑到佔領區當皮佬禮保貼身鏢都不敢揸正來做、簡直係英雄與狗熊之比喇!喂喂、施威呀施威、如果閣下做這份工做得唔耐煩嘅話、不如讓個位出來、由瞓街姐去做好過啦!

2015年7月15日星期三

衰鬥衰



你要我衰不獨衰
好歹拖你去埋堆
既然不可同歡樂
惟有背後插一錐


俗語有講、好就糠黐豆、唔好就水溝油吖嘛!大家有商有量就能將臭史密冚、即使冚不來亦可以處理得平順一些、將負面影響縮到最小。相反、就將件事有咁大鬧咁大、總之係都要搞到天翻地覆才過引。呢嗱、正當飯盟機乎衰到貼地之際、忽然又峰回路轉了!日前飯盟嘅烏雲師太收到密報指、亂制派火雲師太夫家在城中出售嘅水煲含有危害健康嘅重金屬、於是馬上派人追查、結果證明確有其事。因此烏雲馬師太上公開此事、並要求縣府立即徹查。殊不知縣府開始時卻顯得有點像猶抱琵琶半遮面咁款、但隨後又發現原來部份水煲不單只含重金屬、而且還含有一種致命嘅「下崗兵病」病菌、於是不敢怠慢馬上做嘢。看來、飯盟雖然聲名狼藉、但今回有亂制派和縣太爺落鑊相伴、那就不愁寂寞啦!

2015年7月13日星期一

暗戰


看似勢洶不是洶
紅家本來路暢通
爾推洪水將吾淹
我必趕你入胡同
 
江潮傳聞顯示、近日上開幫在祖家股票市場興風作浪、一為搶錢、二為搗亂阿爺檔攤。但據圈內人指出、從表面看外資在祖家股票市場所佔比例甚低、是無能力打亂整個股票市場、但如果有內應幫助之下、環境就絕對不同。據說在自從兩週前開始、上開幫人馬跑到阿爺開設嘅紅股賭坊、並在沙蟹賭桌上挑戰阿爺。由於上開幫是有備而來、一開始便鋪鋪晒冷把阿爺殺個措手不及、以致賭坊嘅銀両如倒水般的倒入挑戰者嘅口袋裡去。由於坊間有謠言指阿爺可能會輸掉紅股賭坊、以致賭坊股票持有人急速沽貨。再加上番邦大鱷在這場豪賭之中搭上開幫嘅順風車、使得紅股賭坊嘅形勢變得更加嚴峻。

2015年7月10日星期五

劣戲一齣



賊過後興兵
分明係搵丁
鬧極無新意
見者眼矎矎

俗語有講、怪事年年有、今年特別多。在人民公社上演嘅「三司會審皮佬禮」鬧劇裡面、替疑犯辯護嘅狀師竟然係案中被指收受利益機構嘅話事人藥媚。劇中商人皮佬禮被指控、去年將一批價值六百萬両白銀嘅金山特產花旗柑送給大撞幫、作為該幫力撐「和尚打傘」嘅謝禮。之不過、身為大撞幫話事人嘅藥媚、居然無視瓜田李下當起皮佬禮嘅狀師來。據藥媚解釋、被指收受花旗柑只係大撞幫又唔係佢本人、所以佢嘅身份並不存在利益衝突問題。呢嗱、三司呢頭指責藥媚嘅解釋唔知係乜嘢標準、嗰頭又接受佢嘅解釋、並容許佢繼續當皮佬禮嘅辯護狀師。你話嘞、咁仲唔係劣戲、唔通係好戲咩?