2014年12月12日星期五

曲終人散



你佔中時我佔中
各人方向大不同
今後不知何處去
笑言他日再登峰

維持了七十五天的佔據行動、終於在金區被警察清場之後曲終人散。主辦嘅雙學表示、人雖然撤退、但抗爭未完、並將會以各種不同形式繼續發展下去、而大腰亭教頭亦揚言不排除日後有更激烈抗爭爆發嘅可能。不過在下只知到、有錢使得鬼推磨、但今次三個水嚨頭齊齊關上、試問學生哥何來巨款、難道單憑一腔熱血就搞得來?姑勿論點都好啦、既然人家姑妄言之、在下亦惟有姑妄聽之好了!

名歌手粉絲姐在金區清場期間曾經講過、今日議會中嘅政客與社會脫節、並希望年青一輩能為議會注入新血和添新景象。其實粉絲姐也講得實在太宛轉、未必人人都明其所指。不過一位粉絲擁躉就說得比較直接、佢話議事堂裡面班人冇幾個係真心為社會做嘢、係時候要法瘀血換青新血喎!在下認為政客不獨只不會與社會脫節、而且對於社會脈搏瞭如指掌、否則亦無可能憑選票勝出的。注於議會加入年青人是件好事、不過如果加入者嘅素質好似抗爭學生領袖咁嘅話、那就唔加好過加。唔怕得罪講句、這幾個學生哥視野狹隘又欠缺組織能力、而且行事章法大亂。更不堪的就是朝令夕改、講話前言不對後語吖嘛!試問如斯幼嫩嘅年青人又憑甚麼本領在政治格鬥場上顯身手?畢竟議事堂並不是校園、學生哥應該專心讀好書、將來總有機會的。

其實佔據行動之所以失敗告終非關警方清場之事、敗因定全由戰狼三伯嘅天真和學生嘅無知所造成。表面上學生是整個行動嘅靈魂、但實際上只不過是一枚棋子。相信有不少街坊早就留意到、每個佔領區總有些不是學生哥嘅人走到最前線製造衝擊。假如你問我、到底那些人是從何而來、為何而來、我只答不好說。但如果閣下再回頭看一看、就會發現戰狼三伯口中的和平示威、從佔領行動一開始就被連番衝擊行為所代替。最要命的就是街頭佔領所針對的目標居然是街坊多於警方、當時形勢明明不利於學生和整個運動、但學生卻不惜與民為敵而繼續堅持落去。因此學生形象大插水、支持者離棄他們、以致佔領行動一敗塗地、並且留下臭名。由此可見政治格鬥之中往往是敵我難分的、又豈是完全未見過世面嘅學生哥可以玩得起呢?

12 則留言:

  1. 域兄,你真係要求太高喇!二十歲仔,連工作經驗都無,識得行出嚟嗌吓咪,模仿部份政棍講野,已經算交足戲架喇! 政治呢家野,根本係兒童及青年都不宜! 佢哋做咗幾多日人? 有幾多人生經驗? 但係吊詭嘅係,佢哋扮演整個行動嘅總指揮.如果我係外國人,我會奇怪,乜香港啲大人政客死晒咩?連小朋友都出嚟論政同付諸行動,重有咁多巿民聽佢哋點添!

    回覆刪除
    回覆
    1. Philip CHU 晚上好,
      字字珠璣, 鼓掌,

      刪除
    2. 域 流亦詩、Philip:
      我都希望香港啲大人政客死晒架!
      而家曲終人未散架!
      依然有遊魂野鬼阻街架!
      店鋪隨時拉閘架!
      我仲未敢晚間在旺角通街行架!

      刪除
    3. 講起政客嘛...依在下睇、紫城沒有政客、只有政棍、仲要係斤兩不足嗰種。一埸佔中居然佔出幾名黑幫頭目出來、其中兩個仲被人認出而上報。咁你話死唔死?注於班學生哥見到人山人海出來支持、仲以為係自己夠號召力、登時將自己當作明星、連三伯台戲都懶睇一眼。殊不知具號召力嘅唔係佢哋、而係利益。可惜佢哋唔知、即使知都唔肯認架嘞。

      刪除
    4. 華兄你好! 依家班學生呼籲巿民分十幾張支票繳交稅款,作為爭取普選運動嘅延續,我諗 咗好耐,但睇唔到同爭取真普選有乜野關連?剩係呢一點,已經睇到學生幾咁幼稚,香港未來靠呢班友,你話係咪死得更快!

      刪除
  2. 域兄晚上好,
    好咯,一場大龍鳳終於落幕喇,

    為 爭 普 選 要 公 投
    霸 佔 金 鐘 宿 街 頭
    今 早 清 場 拘 過 百
    泛 民 雙 學 志 未 酬

    回覆刪除
    回覆
    1. 華兄,午安!
      無論如何,這場大龍鳳終於落幕,還路於民,總算有路可通。交通真是很重要的。

      刪除
    2. 政客借意搞公投
      並非要上一層樓
      今日得失唔重要
      它朝志在佔鰲頭

      刪除
  3. ☁•★•☾*¨晚安喇喂*¤✬

    回覆刪除
  4. 以前有套戲好似叫罪惡之城~~~喺聖經裡面又講過有天火焚城……皆因是城中有太多罪惡喎,咁香港會唔會有呢日呢?我指的唔係天火,而係天威滅邪!

    回覆刪除
    回覆
    1. 照目前睇尚未會發生咁嘅事、不過有傳聞指阿爺已經着手加緊管控紫荊城。由阿爺嘅格局睇嚟、政治比前更保守在所難免矣!

      刪除