大話戰中

三個戇老頭

帶你去西遊

誤人兼損物

撩起大眾愁

呢嗱、今回真係好死唔死咯、居然被在下唔覺意噏中、昨日支持戰中嘅人、就係今日反對戰中嘅人。目下戰中行動嘅成員猶如烏合之眾、兩班慌失失嘅學師仔和一群雜牌軍搞到神憎鬼厭、都唔知點收科咯！依照目前形勢看來、戰中行動隨着時間消逝而弄到聲名狼藉。當下街坊心煩氣燥、大小店東蝕本蝕到火都嚟埋、預計很快就爆發執笠潮、到時莫講話學師仔唔掂、就算戰狼三伯和反盟都變成過街老鼠架喇！因此呢班友仔當務之急並唔係要爭取甚麼理想、而係要找個藉口出嚟散水架咋！

江湖流傳、戰中人馬是由三方勢力結集而成。傳聞指表面上戰狼三伯和反盟嘅支持是來自外圍、但實際上更多的是來自中原及城中武林世家。反而大學師和中學師的大部份支持才是來自外圍的。注於激進雜牌軍嘅支持、除咗小部份是來自城中武林之外、其餘大部份支持都是來自外圍及長江流域一個神秘組織的。當日紫荊堂大總管與大學師講數時、曾經提出以「准許反盟派人參加打雷台」作為條件、換取學師仔撤退。戰狼三伯和反盟尊貴均認為可以接受、但要求學師仔鳴金收兵時卻遭拒絕、再加上還有一幫自稱無人可以代表他們嘅雜牌軍堅持死守、足見各方背後勢力雖是我中有你、而你中亦有我、但卻是各有圖謀的。戰狼三伯見到唔對路、便託辭返大教館授徒博甩身、留低個計時炸彈畀班學師仔嘆。之但係大學師一點也不笨、他們公開向反盟尊貴叫板、以劈炮重選換取他們退兵、成功把戰狼三伯纏住。看來、外表一致嘅戰中行動、內裡其實是各自打算的。

對反盟來說更糟糕嘅就係、總舵主居然冒着失去七名紫改護法之險、而將富貴幫幫主田大踢出紅家會、等同告訴大家紫改可以作廢、亦即係話大總管當日提出讓反盟上雷台嘅建議已經不存在。由此推想、大總管在講數時似乎犯下僭越之嫌。試想想、由戰中開始至今、紅家會一直堅持着那「不打壓、不讓步」嘅政策不變、咁又點會有可能跟學師仔妥協呢？由此可見大總管所謂嘅建議、若不是企圖以此為餌去破壞戰中陣營團結嘅話、就係另有所圖矣！