還是收手的好

開錯牌頭打錯更

三伯知機運路行

天時地利皆不予

人和逆轉冇得摱

大學徒聯誼會秘書康少爺表示、今次一眾闖關嘅師兄弟未登機便被打回頭、證明他們已被列入黑名單、並擔心聯誼會所有師兄弟都會喪失登陸資格。因此他公開要求有關當局解釋原因。呢嗱、呢啲咪就係又痕又怕痛囉！俗語所謂、出得嚟行預咗要還吖嘛！現在是大學徒要跑去紅家會踢館、若總舵跟他們計較會被人話以大斯小、如果任由呢班人在自己地頭撒野又會被人話冇料到。因此、禁止這群人登陸是合當不過嘅做法。試問還有啥好解釋呢？

其實這群溫室長大嘅花花草草應該玩夠架嘞！請看看、連同坐一條船嘅反盟尊貴都拒絕他們提出以總辭公投作為退場台階嘅要求、試問紅家會又點會有可能答應佢哋嘅要求？事實證明、這群人鬥不過紅家會、也鬥不過施威、但害苦了小市民、連累了大小商戶、妨礙了經濟發展。目前雖然尚未到人人喊打嘅地步、但當顧主蒙受損失、爆發倒閉潮、即使能保住份工亦加薪無望嘅時候、這群花花草草便立即變成市民公敵。現在大學徒嘅形象越來越似神台貓屎、但大聯常委麗摑姐還要大大聲講、假如佢哋開出嘅條件不獲回應就絕不退場。在天時、地利、人和皆不予嘅情況下、究竟大學徒還憑啥去講條件？唔通真係要見到有人被佢哋累到破產而跳樓才滿意？近日學人之潮在各區擺檔宣傳「點解要擾你」屢被街坊驅逐、已經反映出坊眾對這群花花草草嘅憎惡程度越來越厲害、若再不收手嘅話、恐怕遲早會被人請食完錫完心口錫背脊之後、還要被送到花廳嘗嘗公家飯嘅滋味矣！