鬧出個廿三味來

無事喊翻天

難分喪定癲

雕蟲施小技

不如早收鞭

非法黃雨遮墟市發展下去、是否會遍地嫣紅收場尚且未知、但戰狼三伯變咗走佬三伯、並晨雞都冇咁早便縮回返大教館、就係人都知到。戴教頭話自己唔係想教腳、而係準備去巡捕房自首、仲教埋法官判處他在公眾地方非法趁墟罪。須知到在法律上而言、非法墟市主持人乃係犯罪集團首領、所犯嘅罪非比尋常、刑罰亦比一般參加者重得多。然而戴教頭、卻忽然自稱是參加者、而忘記他本身就是用一年多時間去籌備這次非法黃雨遮墟市嘅發起人。呢嗱、呢啲就係厚黑學最高境界。試問呢種超級人版、除咗紫荊大教館之外、邊處仲搵得到？

呢嗱、入秋以來風高物燥、莫講話班黃雨遮擁躉日日踎响街邊曬到人人心浮氣燥、就算係旁人睇見亦為之眼火飆升。可惜無論飲涼茶抑或飲啤酒都無法降火、結果社會上有人趁機提議、重煲廿三味、免費供市民享用、保證一劑掂喎！如果電制派人馬趁着“手指拗出唔拗入”嘅田大剛剛被褫奪北京紅協堂委員身份之勢、在紫荊話事堂重提此荒案、相信未必再有人膽敢倒戈、通過嘅機會亦很大。咁、你話嘞、今回紫荊人無啦啦執劑苦茶畀自己嘆、係唔係有啲犯賤呢、吓？

唔知閣下有冇質疑過、何以有關方面動用咁多銀両、人力、物力去泡製呢把黃免雨遮、但到頭來居然搞到死唔斷氣咁款嘅呢？其實問題是出自戴教頭身上、他以一年多光景去宣傳黃雨遮之同時、亦給予內地巡捕房一年多時間廣布綫眼。因此當黃雨遮在紫荊城大賣特賣之際、京城巡捕房已經將藏身於當地嘅六十多名無牌特約黃雨遮推銷員拘捕。除此之外各個省市嘅巡捕亦打醒十二分精神戒備。因此黃雨遮在內地連一把都賣唔出。就係咁、咪蝕到連阿媽都喊到收唔到聲囉！所以話啫、在龍之大地之上、賣黃雨遮係冇前途架！知冇？