由佢哋講起

逢人便說他不好

真真假假難靠譜

往日仇人今碰面

兜巴直扯掹甩毛

日前過氣縣首老古洞與過氣督爺肥佬棚先後就『紫改』發表意見。前者是呼籲街坊放開懷抱接受下議院定下來嘅篩選框框。後者就話新框框乃係衰到冇朋友嘅波斯式選舉。無論呢兩位大叔講嘅話是來自肺腑、抑或是來自屁股都好、總之就有人唔滿意、並且齊齊走出來炸形。第一位是肥佬棚嘅前頭馬兼兩朝元老麈四姑。她指老古洞講話係要氹街坊入屎坑、並叫人千祈咪聽佢支笛。另外一位出來講嘢嘅係前朝兩局重臣、兼當今下議院常委飯大嬸。她批評肥佬棚妖言惑眾呃街坊、連份合同內容都未了解就彈出來亂噏廿四、並叫肥佬棚早唞喎！

呢嗱、這兩位女士雖則同是兩殿為臣、但彼此遭遇就截然不同。麈四姑在前朝是獲得肥佬棚提拔、連升三級當上二把手之位、殊不知過檔之後卻被老古洞殺得落荒而逃、結果連烏紗都掉去。飯大嬸雖然被當年初來步到嘅肥佬棚由行企局搣咗出嚟、但在大歸過度期間獲得朝廷賞識、並委臨時人民公社主席一職、大歸後更獲委以下議院常委重任、從此東山再起。由此可見麈四姑是恨透老古洞、而飯大嬸亦唔妥肥佬棚。因此兩個滿懷怨氣嘅人各自把握機會、向自己討厭的男人兜頭兜腦冚兩巴算是出出氣。由此可見、政治呢家嘢總是令人愛恨交織、一切是是非非並不在於政見與立場之間分歧、而往往都是跟人與人之間嘅利益掛上勾的。

呢嗱、大家都有眼見啦、紫荊城嘅政客質素一向是良莠不齊、分分鐘幫忙變闖禍吖嘛！城中之所以亂七八糟、問題並不僅僅在於民心尚未完全回歸、更多的是人心不足之故。請看看我們四周環境、財主愛剝皮、官家管自肥、政棍靠吹水、懵仔擔大旗。到底有幾人真心為金紫荊打算、大概唔使問阿貴啦！今天咱家的人民代表橫睇、掂睇、左睇、右睇、就算用個顯微鏡去睇、都睇唔到一個大公無私嘅人物、但係一心想搵着數又唔想承擔風險嘅人則比比皆是、亂制如是、幻民亦如是、總之街坊做定冤大頭就是。目前『紫改』激發起嘅火頭大有越吹越烈之勢、今後紫荊人何去何從、是值得坊眾好好的去想一想矣！