紫荊解碼

似真不是真

難將道理分

一朝行錯路

劫後冇翻身

當大代會就正菜改格方案『正改』拍板之後、該會二當家飛大叔聲稱、歡迎飯盟加入愛葛愛糖大家庭喎！之但係、弊就弊在紫荊人向來喜歡用葛來煲老火湯、跟老表將葛舔着糖一起吃嘅習慣完全不同。雖然城中也有人喜歡把葛舔糖而食、但卻不是紫荊人主流口味。看來、飛大叔都係嘥聲壞氣喇！

今日紫荊政壇似乎是飯盟與倦仔之爭、但實際上卻是倦仔派內訌。例如那場轟天動地嘅『小圈子大雷台』嘅賽事當中兩大拳手均來自倦仔派、代表阿爺嘅係施威、代表大老闆嘅係堂躺、而飯盟代表鐵頭有份上台冇份打。就係咁、城中僅存嘅一雙『禾鞋』就是在那場爭鬥之中被撕得容容爛爛。切勿以為每年七一唱反調嘉年華大遊行嗰條人龍十足水蛇鰆咁長就有料到、其實真正能夠令紫荊城富貴與閉翳嘅人並唔係佢哋。有人認為倦仔派一方獨大就會令到整個社會傾斜、而且會造成不公平現象、但在下敢寫包單就算由綽號『齋講良心』嘅陳四姑來揸拂、社會傾斜度大致上是無明顯分別的。因為無論是誰人想做太平官都不得不聽聽大老闆嘅意見、呢啲就叫作人在江湖、身不由己吖嘛！吓、唔信？那就唔該你話畀我知、到底世界上那個國度嘅揸拂人係無須睇大老闆嘅面色嘅呢？

如果你以為由一位著重民生嘅人士來擔當縣首、咱們就會有運行嘅話、那是不實在的。恕在下大膽講句、如果將來有一個打着民粹旗主義旗號嘅人參加大選嘅話、即使他是個聖人亦同樣冇運行。別以為當日是人們懼怕施威將紫荊城『染紅』才群起反對他。也許你有不同睇法、但事實就係有人一口咬定施威是挾民粹而令紫荊才搞到翻天覆地架咋！

講到『染紅』呢家嘢、根本無須撳住你個頭嚟染、只要時間一長、你身邊嘅一切就會產生化學作用、在不知不覺之間將你感染、情形就好似人們從來都不知到在甚麼時候、自己被『羊化』得半鹹不淡一樣。難道你以為非要搞『作文教育』和『廿三味』不可？如果係咁、人家就唔會停手啦！係嘛？假如必須要找一個平台作為基礎嘅話、那麼一部『歸本法』再加上一個『講人自縛五十年不便』已經夠晒皮啦！也許你會質疑、既然係咁、點解仲要搞『作文民教育』和『廿三味』？其實理由好簡單、一切皆在乎一個快字、因為『作文教育』可以縮短漂染嘅時間、而『廿三味』可以快速將激進派嘅虛火降低。相信冇人係唔想成就來得快一些嘅。係冇？