中學從此不太平

政治入侵中校園

睇住學生上錯船

師長冇人敢異議

跟紅頂白喊通天

呢嗱、人在成長階段之中總有一些事應該去做、亦有一些事絕不可做。正如家長絕不會讓小孩子有僭越行為、理由就是要保證他們學好守本份、並且在一個良好環境之中成長吖嘛！現在竟然有人破格將政治運動帶入中書齋、並鼓勵學生參加罷課、然而身為師長嘅人不單只不加勸阻、居然說將會為罷課學生補課。試問咁做法與西南二伯父有何分別？須知到政治呢家嘢、就算在社會打滾幾十年嘅人都未必睇得通透、何況正在求學時期嘅學生哥呢？

自從「大生聯會」宣布大書生將會集體罷課之後、「學民諗頭」又鼓吹中書生加入罷課。亂制派嘅「幫講收聲」卻認為中書生未夠班講喱啲、並立即設立一條篤背熱線、要求中書齋提供參加罷課嘅書齋仔數字。之不過幻民嘅「咬肉協會」立即反駁、並指出禁止中書生罷課涉嫌侵犯人權、只要獲得家長同意即使未成年書齋仔亦可以參加罷課。就係咁、政治這污穢玩意便入侵中書齋課堂了！

日前有記者問大書生、既然明知戰中是犯法而且會留案底的、點解還要去做？大聯代表說、紫荊城冇咗「真普損」嘅話、就算大書生讀飽書、但步出社會亦冇運行、因此有冇案底都一樣。雖則人人都跟風指大書生是成年人、應該知到自己係做緊嘅係乜東東。但問題係、究竟一群從來涉足社會嘅學生哥係唔係真係咁掂？現在嘗試以大聯日前公開嘅四點要求、作一個小小的探討。第一、立即撤回紫改方案；第二、向紫荊人道歉；第三、確認公民提名；第四、縣首和紫改三人組辭職。這四點要求對紫荊人來說、並沒有甚麼大不了、但對紅門來說可不得了！因為在紅家眼中可能會變成：第一、解散一言堂；第二、向全民認錯；第三、確認西方式民主；第四、阿爺及其門人下台。如果真係咁、你話死唔死？

切勿以為在下妖言惑眾、須知到紅門家規開宗明義就是一家獨大。假如大書生認為只要他們開聲、朝廷就必須答應嘅話、會不會顯得太過無知呢？如果明知故犯、即等同去打一場有輸冇贏嘅仗。咁、你話嘞、大書生水平尚且如此、何解還要拉中書生落水？雖然政治係污穢不堪嘅玩意、但人總應該有點點良知。紫荊城是個自由社會、任何人都有權以抗爭手段去達成自己嘅政治理念、但請高抬貴手、不要向心智尚未成熟嘅孩子打主意、好嗎？拜託！拜託！