2014年8月21日星期四

爭氣大龍鳳

本來好清爽
忽成大隻廣
彷彿有其事
明知沒法擋

上個禮拜日、倦制派舉辦了一次爭氣大龍鳳遊行、並且宣稱有一千多家志願團體參與。點知被踢爆有人以撤蝦餃、燒賣、叉燒包和撤溪錢嘅方式聘用一群山寨茄哩啡混入遊行隊伍之中、而且那些人根本上連自己做緊乜東東都唔知。恐怕連那位取得簽名(一百五十萬個)最高紀錄保持者白頭兜、勢難想到今次乘勝追擊居然令他踩得一腳米田共嘅。呢嗱、到咗呢個時候又係綽號「齋講良心」嘅陳四姑企出來同你講心喇!她強烈譴責倦制派打着大遊行旗號搗亂跑龍套行業、並企圖拖低茄哩啡工資之餘、又痛斥那群山寨貨為了區區蠅頭小利便出賣行家、將紫荊人嘅「瞎心」價值掉進糞坑裡去。雖然白頭兜和被指控撤溪錢嘅冧鎮集團皆出面否認有關指控、但信與不信就真係見仁見智矣!

在下雖然一向對陳四姑嘅講話都聽不懂、之不過今次卻被她那恨死隔離嘅身價所吸引。據報在不久之前、有人出價三百五十萬紫元聘她前往「勾尾」唱好金紫荊、其身價之高確實一時無兩。但係今次倦制派忽然找來一大群山寨茄哩啡沖擊整個大龍鳳「奴工」市場、那就真係好似黃教頭話齊「不該 poor gay 」啦!人家陳四姑每做大龍鳳一次就算不收一百萬、都要收五十萬吖嘛!今次呢班山寨貨居然為了一頓蝦餃燒賣和兩百五十塊錢報酬就做 cheep 個市、分明係靠害、咁你話、係咪不該呢?

講開又講、昨日遇見清潔部嘅判頭老何、他對住我呻到機乎連樹葉都落埋。他說別人出嚟行就發財、然而他安坐家中就破財喎!據老何講、清潔工人為着要賺取三百五十紫元酬勞便報名參加爭氣大遊行、結果搞到唔夠人手開工。終於迫得他自掏腰包、額外多給每人二百塊錢作為特別津貼才能夠留住班伙計。老何話、假如倦制派再爭氣多幾次嘅話、他就聽斷氣喇喎!

呢嗱、縣府曾公開支持這項遊行活動、而今次老何就是因這項活動而蒙受金錢上損失。唔知有冇人可以話畀我知、到底老何是否可以向縣太爺索取賠償呢、吓?

13 則留言:

  1. 域兄午安,
    最失敗之作莫過於今次遊行,可謂陸榮庭睇相,

    你行我又行
    真係咁得閒
    一班跑龍套
    齊演查篤撐

    回覆刪除
    回覆
    1. 華娃兄晚上好、

      有銀梗要行
      無銀便搭棚
      齊齊跑龍套
      應世界艱難

      刪除
  2. 相信自發性去遊行的,不多!

    回覆刪除
    回覆
    1. 相信當中也有不少自願人士參與的。

      刪除
  3. 今次遊行真係醜態百出,又,點解的人蠢到通街派錢???!!!

    回覆刪除
    回覆
    1. 遊行呢家嘢其中有些古靈精怪實屬司空見慣、今次多咗老表參加當然「靈舍不同」矣!

      刪除
  4. 老何千祈唔好行出嚟索償呀!呢啲係等於唔愛國嘅表現!如果唔愛國嘅話,任何人都無運行!呢嗱,陳四姑嘅身價,一般咖呢啡點可以相比?等於C朗同港足歐陽耀沖嘅週薪,無可能相提並論一樣!唔需要調查有無用錢昆人上街喇!單睇連非洲人同巴基斯坦外勞都上街撐反佔中,已經知道駛咗唔少錢啦!

    回覆刪除
    回覆
    1. 聽講那些印巴和非洲人已由難民身份登記咗做紫荊人架喇!若論親疏、老表比他們更疏喎!

      刪除
  5. 四萬升為一百萬
    笑容可掬秀色餐
    餐搵餐食基層苦
    無端週日有運行

    回覆刪除
    回覆
    1. 接受車馬費的行人,嚴重影響了”不為金錢而來”的行人的聲譽,悲哉!

      刪除
    2. 無論有品或冇品
      人間地府皆手緊
      聞得老表撤溪錢
      係人係鬼分一份

      刪除
  6. 域Sir ,我30多年在前稱西德的漢堡住過一年多,生平第一次見到成大班人在市中心的大街遊行,前有警車電單車開路,心中一直奇怪,西德當時算是屬於發達國家,政府清明廉潔,國富民豐,為何還有大遊行?後來我四處打探,有人告訴我,遊行就是表達不滿和希望合理訴求,同埋鞭策和監督政府,但如今香江居然把遊行當番工有糧出,真係 no eyes see 喇。

    回覆刪除
    回覆
    1. 自從日以曼人反醒及承認二戰犯錯之後人人安安份份、點似得咱家龍的傳人萬事皆向錢看咁醒目呢?既然今日紫城有政治冇道義、所以爸親、媽親、還是不及錢親吖嘛!

      刪除