七個一皮

巴西又揼雞

包你輸甩髻

買細偏開大

今趟抌穿肺

記得在七十年代聽大聲葉（葉觀楫）講波、每當香港代表隊（本地球員組成）或香港聯隊（華洋混合）被外國球隊連數幾蛋之際、就以被人打到七個一皮（即係章法大亂）呢句嘢去形容當時港隊嘅景況。勢難想到四十年後嘅今日、呢句名言居然被套用到巴西國家代表隊身上去。

被譽為足球王國嘅巴西雖然係今屆世界杯主辦國、但國家代表隊嘅表現卻無半點王者風範。一向以腳底下功夫細膩見稱嘅巴西居然以一比七大敗在德國腳下。全場波所見、巴西班球員踢得到喉唔到肺、甩腳、甩波、甩位唔在講、仲連球品都甩埋、莫講話毫無戰術可言、甚致連個人技術都欠奉。雖則話佢哋嘅王牌前鋒尼馬因背傷不能上陣、而且換走埋一名正選後位、但係踢波呢家嘢係踢十一個人吖嘛、少咗兩個正選係就係會有影響、但使唔使輸到七個一皮咁肉酸？當德國隊射到三比零嗰陣時全個球場鴉雀無聲、射到五比零嘅時候鏡頭所見很多巴西球迷黯然神傷、射到七比零嘅時候球迷已忍不住掉下淚來、甚至連小朋友也不例外、即使當巴西隊射入破蛋嘅一球、但場中並無歡呼聲、外國球迷亦感覺到唔多對路、於是紛紛提早離埸、以免城門失火殃及池魚吖嘛！

今次世界杯參賽隊伍忽龍忽蟲嘅表現已經成為家常便飯、不過尚未到決戰時刻就頻頻聽聞有人輸波輸到連條命仔都冇埋、咁搞法認真不智。須知到、人有三衰六旺、在運氣不濟嘅時候所行嘅係衰運、就算財神離遠見到都要運路行、試問黑成咁嘅人點會贏錢架？但凡涉及賭博必有造假、所謂十賭九騙吖嘛、賽果係可以預知亦唔係新鮮嘅事。換言之除咗有內幕消息嘅架忌冷之外、其他人一注押中嘅機會簡直微乎其微、否則又點會有派彩？依在下看、呢啲輸多過贏嘅玩意絕對不宜瞓身落去博老命。巴西輸到一比七嘅賠律超過百倍、講唔定有人輸波發大財都未定架！呢嗱、輸完又嚟賭過喇、來緊嘅週日上午四點將會舉行巴西與荷蘭嘅季軍爭奪戰、而週一上午三點鐘就輪到德國與亞根庭爭奪世界杯、不如約埋班老朋友齊齊睇波、嘆啤酒、吃零食、順便來一場牙較論英雄看看誰的眼光最醒神、不過千祈咪賭錢呀！