2014年6月24日星期二

強吞必哽

近日見頭痕
占卜又拜神
紅家一句話
諸家喪三魂

據報導指出、在剛過去的周日、真民聯主辦的「傳聞電子公投」參加者數字已經累積超過七十萬人、其中四萬多人是親身前往票站投票。如果數目真確的話、今次公投已創下歷年群眾運動參加人數新高。阿建立刻跑出來指、有人利用電腦程式造假報大數、而那份半官方嘅蠻球日報亦當眾放屁、形容即使支持公投嘅紫荊人更多、也沒有祖家十三億人的多。這類恐嚇言論、莫講話阿民聽來火紅火綠、即使是在下這類一向冇表態嘅小市民聽後也為之扯火。不過今次督爺一見唔對路便彈出來解話、以求達到降溫效果。點知又被抽水政棍食住上、插一餐飽嘅、都可謂該燴咯!

官報屁話雖然俗不可耐、臭不可聞兼且哽耳、但須要注意的就是話講得很明、而且具代表性的。冇錯、人是須要維護自己嘅權利、即使這一代爭取不到都要為下一代做些事。但問題是應該點樣去做、是不是一定要以不成功便成仁嘅態度去做?所謂不成功便成仁等同做不來就死畀你睇。咁搞法、跟屈原投江、伍子胥挖眼有何分別?老屈死了還不是白死?老伍除了令到自己有眼無珠之外、又有啥作為?現實告訴我們、基於雙方價值觀不同、而且彼此之間缺乏安全感和互信、要爭取政治上嘅話語權就須要有耐性和懂得變通才行。如果A計劃行唔通、那就行B計劃啦、再唔啱咪行C計劃囉!總之寧願像蠶食般的一口一口慢慢去咬、總好過開口過大一啖骾死吖嘛!

懂個打枱波嘅人都會明白、何謂唔怕揼波鐘、最怕己技窮嘅道理。現實永遠都是殘酷的、當年鬧得翻天覆地嘅「南天門」一役到咗決定性時刻、有人建議先撤退然後再部署長期鬥爭、有人要打鐵趁熱繼績抗爭到底、結果大夥兒選擇後者、亦因此而落得慘淡收場。國際上奉行民主政制嘅國家立即集體向天朝發動制裁。然而他們嘅所謂制裁、其實係將台面上嘅買賣搬到台低下去做、除了迫使天朝花費更多民脂民膏去換取同一級貨品、以令他們獲取更大金錢上利益之外、其它啥也未有改變過。當時經濟發展初起步嘅天朝尚且企硬、難道有人認為今天如日方中嘅阿爺反而會腳軟?以老人家今時今日「你進一寸、我進一尺」嘅作風看來、硬碰硬會係邊個蝕底、大概唔使問阿貴都知啦!係冇?

14 則留言:

  1. 香港有好多事可以去反對,去抗爭,但嗰班友就乜都冇做,其實現今貧富懸殊,他們只是為自家金錢利益,他們有沒有去要求政府正視現實,平衡一下社會的兩極狀況......那些只看法國片,喝紅酒的中產,這些人才是真正的「佔中」罷!是佔據中產高過美國總統收入的人呀!

    回覆刪除
    回覆
    1. 依在下看、他們都是混兩餐、政棍須要依靠搞大社會矛盾才能糊口、與一般蟻民嘅須要自然南轅北轍。

      刪除
  2. 域Sir ,請問有冇人聽過亜爺在政治上會妥恊讓步的?

    回覆刪除
    回覆
    1. 在下從未有聽聞過阿爺會在政治上妥協、但最近卻聽聞話一步不能讓、讓步等同投降喎!

      刪除
  3. 70萬人投票? 都幾難信, 尤其是那些人在5月可以橫手騎劫3方案, 現在要製造投票有何難。

    回覆刪除
    回覆
    1. 有太多東西真假難辨、總之姑妄言之、姑妄聽之就是。

      刪除
  4. 無論啲人做大龍鳳又好、造假、造馬又好,阿爺立場都係好堅定!

    回覆刪除
  5. .有些事的確要人去做,沒有做的,並不代表他們立塲不明
    這次空前的投票說明甚麼呢,相信政府高層好明白,不能扮睇唔到,但又唔可以順民情,真係要睇事情發展落去.

    回覆刪除
    回覆
    1. 睇就一定睇得到、之不過呢個世界上有好多政治家、好多國家領袖明明睇見都扮作睇唔見、明明是明白都扮作不明白、相信天朝亦不例外。

      刪除
  6. 21日在打小人橋底電子站投票

    回覆刪除
    回覆
    1. 聽講拳頭幫女幫主都去嗰度投票喎!

      刪除
  7. 域兄,你呢次錯怪蠻球日報喇! 編緝即係暗示中央,應賦予13億人民以後有投票權! 所以部份內地網民見到呢個消息,都即時喺網上投票,不過最斃係好多都支持香港公投!

    回覆刪除
    回覆
    1. 係咁就弊喇!到時篩撞、四穿、暈男等各路人馬齊齊投毒臘票豈非捉蟲?

      刪除