成也水貨敗也水貨

今日打水貨

打到對面河

蠄蟧慌撒尿

老鼠被嚇傻

呢嗱、日前督爺在拆白會隨說了一句可以考慮削減兩成自遊行旅客之嘛、零售股、收租股、以及相關概念股價登時蒸發過百億元、都咪話唔誇張。喂喂、難得有人跌錢、唔知各位街坊有冇執番多少呢？一向對水客衝關活動視為無限商機嘅政客馬上爆響口、呼籲督爺別打自由行主意、要搞就去搞那班水貨客。點解呢位事頭今次會咁順攤嘅呢？無它的、那是因為冧鎮關卡已經開始嚴打水貨。即是說、假如今次是來真的話、水貨客的末日將至、無論本城是否取消一簽多行亦無關宏旨。不過咁、現在社會上講緊嘅係、城中酒店和相關設施不足以接待真正來觀光消費嘅遊客、而唔係指滋擾着北區市民的那群一日往返關卡多次嘅水貨客喎！係咁、那位爆響口嘅政客究竟想點呢？

近日內地打貪打到沙塵滾滾、嚇得班大小贓官紛紛投奔花旗。據說地方官吏為了自保便紛紛將那些篤眼篤鼻的事糾正一番。其實水貨一直嚴重打擊着內地行貨銷量、只是問題一直未獲解決而矣！年前紫荊衙門曾經向冧鎮對口單位試探由對方出手嚴打水貨客的可行性、結果是碰得一面灰。據說是有人不敢去捋老虎鬚、惟有向紫荊府衙派檸檬喎！然而今天時移勢易、上方寶劍由北向南直殺過來、那麼冧府衙門當然要有所交代、於是就做齣好戲畀街坊睇囉！

今次打水行動是否只有三分鐘熱度目下不得而知、不過城中依賴做水貨客生意的店家有得震冇得瞓就唔使問阿貴都知。假如打擊水貨是長期策略的話、水貨行業必定玩完、紫荊城亦將會爆發小商鋪倒閉潮。唔信？試想一想、那些堆滿貨倉的食油、紙巾、益力多、嬰兒用品、奶粉、紙尿片、咳藥水、消炎藥、止痛藥、傷風藥等貨品全部難逃滯銷命運、加上昂貴的租金和員工薪水委實難以維持下去吖嘛！唔知咁樣、啲鋪租又會唔會回落呢、吓？！！