乜事基金狂想

壇前鬼打鬼

神仙冇眼睇

此君無義氣

遲早墊屍底

俗語有講、風水輪流轉吖嘛、早前城中有群冒充「廣英娛業」嘅後生仔跑上街頭舞龍舞獅、鬧得建仔人人喊打、個個喊殺。如今稽查處踢爆建仔搞嘅舞龍舞獅、舞到連筆公帑舞咗去邊處都冇人知、於是白鴨幫便牽頭派人跑到青天衙門舉報有人涉嫌打斧頭、矛頭直指負責乜事基金篤數嘅疲倦聯頭目橄覽仔。之但係基金揸拂人京頻聯老二危駕蜂就反指白鴨幫博出位而小事化大、並認為此事無須驚動青天衙門、只要踏法會搞個「調茶委員會」讓大家先飲杯茶、然後心平氣和搞掂就是。

其實危駕蜂亦無須激氣、記得上次白鴨幫鐵頭和黑桃兩名頭目、本着有福同享嘅精神、帶埋個老婆跟隨建仔班人一起去嘆免費旅遊、並藉此聯絡一下彼此間嘅感情吖嘛！點知有人在事後自己踢爆自己貪便宜、間接將件事揚開、並唔覺意曝露咗白鴨幫有份參與、搞到隻白鴨機乎變成燒鴨、都可謂雞毛鴨血矣！今次既然機會摸上門來自當有怨報怨、有仇報仇、趁着乜事基金呢單嘢好讓青天衙門來個串燒大餐、由橄欖仔燒到危駕蜂、再由危駕蜂燒到蘇卡片局長、若然一個唔覺意燒埋督爺施威就更加盞鬼、到時呢隻白鴨仔想唔羽化登仙都幾難矣！

講開又講、假如我話踏法會裡面班友仔只為區區八萬塊錢替街坊沒水舂牆、相信冇幾多個人會同意。之但係、如果有人話是為自己開拓財路、相信亦無幾人會反對。縱觀今日府衙、行企和踏法兩會、不難發現其中不乏成功炒家和各大小公司掛名董事。這一切都是看得遠、拿得準、更重要的就是能夠下下都快人一步吖嘛！既然阿建如斯獨食、阿民當然要會整到佢食到由背脊骨落。

有人問、點解在事頭婆揸拂嘅年代裡面府衙與兩會之間嘅關係總是那麼和諧、而今日竟變成如此河蟹呢？其實答案十分簡單、因為當年是有銀紙冇民主、而今天就是有民主冇銀紙。