雙辣招終於跪低

真招變假招

無須眼火標

齊來打份數

有樓快速銷

喂喂、各位炒家、今次冇死喇！特產霸權反攻大獲全勝、督爺雙辣招即將被廢武功、家鄉及紫荊城兩地炒業發財方便之門快將重新打開喇！日前房運部部長小丙與問卷連二當頭殺人鯨和驚蚊連代表電風林密斟後、忽然公布在減辣時先執行後再由爛法會通過以之補飛、而在加辣時則先由爛法會通過然後執行、意思就是將加辣嘅話事權全部交給爛法會、以收減辣容易加辣難之效、亦即是說督爺在這方面即將大權旁落矣！事後一向以正義見稱嘅白鴨幫長老黑仔桃馬上走出來抗議、直指紫府與亂制派黑箱作業、企圖壟斷辣招主導權。據說眾多爛法及行企兩會尊貴聞得辣招將變廢招後、有人如獲鬆綁、有人如釋重負、但只有黑仔桃一人唱反調、莫非以此證實他是清白之身乎？

有人話小丙部長自己知衰、所以在翌日馬上放聲氣探討租金管制嘅可能性、希望暫時穩住社會上對辣招變屁招嘅不滿情緒。呢嗱、俗語有講、凡事都唔應該只睇表面吖嘛！計我話、其實小丙部長絕對係精甩辮就真。佢之所以答應亂制派交出加辣控制權、無非是要博取他們在政改方面全力支持。所謂租金管制其實正正就是壓抑樓價嘅致命撒手鐧。試問如果租金被壓制嘅話、你估樓價仲可唔可以無止境地颷升呢？因此小丙部長是極有可能以此去警告亂制派切勿過橋抽板、否則紫府一樣會有辦法將樓價打回冰河時期去。不過呢味嘢、講易行難、我就唔相信特產霸權係食齋嘅。

唔係在下靠嚇、近來世界立立亂、啥事都會發生、甚至連減辣都可能是個氹、加上花旗重返亞洲興風作浪、天朝周邊諸國蠢蠢欲動、扶桑爛仔喊殺連天、這一切隨時都會對信貸和息口構成不穩定因素。如果閣下手上還揸住貨尾嘅話、最好就趁辣招鬆綁時拿拿聲甩手喇、否則蘇州過後冇艇搭。信不信由你。