阿超著褲

你奸不及我奸威

化解危機免拘泥

顛倒諸家有法寶

任人把我罵烏龜

日前被拖足一年嘅雙辣議案終於在大話堂三讀通過、不過有人認為紫府贏得十分醜樣。據說飯民政客不滿紫府以先斬後奏方式處理雙辣、並認為是刻意削弱大話堂話事權、於是集體離場抗議、所以議案由亂制派演獨腳戲自己玩晒。呢嗱、總之贏就對基層大眾有利、話之佢美定醜啦！

計我話、其實雙辣越拖得耐對紫府越有利、而今次所有大話堂代表都被請晒入個甕裡面就真。試想想、只拖一年之嘛、紫府就凭一鋪雙辣收咗四十多億稅款、假如議案被否決就要全數嘔晒出來、試問邊個民損代表肯公開做呢個醜人？因此飯民除咗借嬲頓之外、恐怕再別無它法可以明哲保身。然而留堂嘅亂制派更加唔可能自己孭起隻鑊、惟有阿超著褲局住拍板讓議案通過。

所謂窮則變、變則通吖嘛！紫府在失敗中學會扮死狗咬羅友呢一招、故在雙辣被擺上議事桌之前、先擺出一副慌失失趴低翳契哥嘅模樣出來嚇街坊、以此吸引大眾眼球、好讓全城損民個個睩大雙眼睇清楚佢哋嘅代表係人抑或係鬼。呢嗱、出得來政壇打混嘅人、大概冇邊個係惷嘅、雖然今次陰溝裡翻船條氣一定唔順、但無奈都要啞忍一次、所謂來日方長吖嘛！係冇？

雖然紫府今次成功在大話堂為先斬後奏開先例、並且成功迫使堂內隱形炒家就範、不過亦同時加深與大話精之間嘅矛盾。看來弱雞政府亦自知冇真正盟友、惟有行一步算一步。