2014年12月30日星期二

講台無王管



角色搞不清
紀律欠嚴明
老爺皆廢物
嘩鬼哄天庭

早前燶樹根在公社大喊十、指孖葉電台日日罵紫荊府衙、建義紫府唔好再同佢哋續約喎!呢嗱、燶樹根可能入行入得遲、唔知到孖葉電台罵阿左已經維持半個世紀咁耐。在六七爆亂期間、孖葉電台大丈夫林君日日罵阿左、後來涉嫌遭遇報復、在駕車返工途中被人淋電油、連同搭佢順風車嘅弟弟一齊葬身火海。自此孖葉電台便跟阿左結下不解之仇。當今時移勢易、角色易轉、惜日嘅阿左搖身一變、成為今日金紫荊支柱。試問孖葉電台唔罵紫府、唔通罵民仔咩?

2014年12月28日星期日

吹水唔抹嘴



政客發噏風
口水似暴洪
但憑三寸脷
引你入迷宮

在戰中期間、繼李工頭夾硬將捕快描繪成黑警之後、毛姑姑亦唔蝕底、她將今日嘅捕快與六七年大暴動嘅防暴隊相提並論。喂喂、毛姑姑、點解你咁鍾意別人當正盲巫咁點架?我話妳知啦、六七年防暴隊使用防暴警棍和催淚彈之外、還用上手鎗、木彈鎗、步鎗、散彈熗、等致命武器、比之今日捕快使用嘅催淚彈、胡辣噴霧、伸縮棒或防暴棍、簡直係蚊肶同牛肶、根本無可能混為一談。身為阿民金牌打手質素尚且如比、難怪阿民聲勢日走下坡啦!

2014年12月26日星期五

政縛法



施威喊立政縛法
阿民當堂口擘擘
建仔徬徨心更焦
難怪紫城爛笪笪

呢嗱、俗語都有講、偷雞不成蝕把米吖嘛!今次阿民煲燶藥嘥心機、賣黃雨遮賣出個大頭佛來、結果搞到蝕老本收場、仲被施威食住上、話要依據「各製法」搞個甚麼「政縛法」出來、縛住呢班友仔、並規定所有阿民幫會必須公開所有幫眾嘅個人資料和所有捐款來源、十足十擺部 X光機日日照住班友仔、連佢哋食咗乜嘢落肚都睇得一清二楚。雖然政棍一向不分左右、財來直受、誰出得起錢就幫誰、但俗語都有講寧願被人知、亦切勿被人見。試問又有誰願意拿高自己個肚皮任人睇?呢單嘢咁濕滯、莫講話阿民唔肯、就算係建仔亦未見得會贊成。

2014年12月24日星期三

肥龍入冊



阿龍今入冊
此後冇龍刮
既知監獄苦
何必偏作賊

過氣金紫荊老二肥龍受賄罪名成立、被判監七年半、扣除所有下難大概只須要坐五年半左右。呢嗱、唔講起真係唔知到、原來有好多人為肥龍求情、由其是他的拜把兄弟前金紫荊老大啱僧的求情信內容、將肥龍吹成是金紫荊大救星似的、彷彿應該馬上將他釋放才對。看來啱僧這位沙煲兄弟都可謂義薄雲天、在自己蘇州屎纏身期間、依然肯伸出同情之手、即使它朝有日窄路相逢、做大佬嘅啱僧亦無愧於細佬肥龍矣!

2014年12月22日星期一

阿女妳搞乜呀?

阿女唔生性
跟人去亂政
弊在打瀉茶
通番有餘慶

早前數名大北劣顛國會政客欲到紫荊城調查天朝是否有履行「離合聲明」、誰知尚未啟程就被天朝拒絕入境、結果令到大北劣顛皇國顏面全無。那群政客本想要求首相家霉倫向天朝作出懲罰性報復、奈何今日之北劣顛已非昔日之日不落帝國、一切皆力不從心矣!正當這群鬥敗公雞愁眉苦臉不知如何是好之際、忽然想起近日在紫荊城嘅鬥敗小母雞大生會常委梁厲摑、於是邀請她合演一齣視像阿 Q大吹水、齊齊數臭天朝以泄心頭之憤。誰知老氣橫秋嘅金紫荊公社尊貴旺角興大發雷霆、指責厲摑姐為現代版「吾衫貴」引番兵入關。

2014年12月20日星期六

差別所在




莫說同人不同命
而係管者唔知埞
人家年年有餘慶
我家周時搏老命

祖家官報發表署名文章指、馬蛟人樂天知命、心懷感激可謂「喜大普奔」、而紫荊人有點叛逆、有點抗拒並顯得「人艱不拆」。少數紫荊人之所以輕風作浪、是因為對「一國兩砌」和「歸本法」缺乏瞭解、以及對龍之大地及對阿爺存有偏見所致。呢嗱、唔知到各位街坊對此評論觀感如何、但在下就有所保留。

2014年12月18日星期四

全退保的啟示



每人月入廿五千
何須去求黃大仙
常言大話怕計數
不如務實早先鞭

某日聽阿邊個講解全民退保嘅好處、點不知、聽吓、聽吓、忽然聽到一則令人難以置信嘅數字。原來紫荊人每月人均收入是兩萬五千元。換言之、揸大掃嘅阿叔、洗碗嘅阿嬸、睇更嘅阿伯、個個每月都有兩萬幾銀收入。如果係真嘅話、人人都可以靠積穀防饑、社會上就冇老人問題。從前嘅人就係靠咁過一生、絕對唔似得今日嘅人咁徬徨。可惜月入兩萬五只不過是個統計嘅中位數字、而真正收人被人算到連斗零都冇得剩。今日人力係唔值錢、只有專業知識和高新技能才是生存之道。可惜紫荊城在這方面遠遠落後於獅城、高麗、扶桑等地。

2014年12月16日星期二

鳩嗚之迷



鳩嗚不鳩嗚
志在打招呼
若問何所以
年晚燉冬菇

自從佔中摺埋之後鳩青幫抬頭、星期一至四小組慢步阻頭阻勢、星期五、六、日則大堆頭堵塞交通、圍堵店鋪假鳩嗚、所經之處商鋪紛紛關門謝客、十足十無牌小敗見到販管隊走鬼唔做生意一樣、搞到年晚流流冇啖好食、都可謂慘淡經營矣!究竟這幫人點解要咁做、其真正目的又何在呢?

2014年12月14日星期日

鬼拍後尾枕



輸完又賭冇時停
累到街坊眼矎矎
招惹鳩嗚來混賬
此人正是敗家精

昨日大腰亭教頭忽然公開聲稱和平抗爭已經過時、往後要使用更激烈手法去爭取民主喎!照咁睇、大教頭似乎經不起失敗、以致走火入魔都未定咯!他似乎忘記咗是因為他龜縮才令到佔中一敗塗地、忘記咗係佢累到班門生個個豬八戒照鏡裡外不是人、忘記咗係佢連累街坊生計不保、現在居然又話要玩硬打硬、仲有冇人肯聽佢支笛呀?

2014年12月12日星期五

曲終人散



你佔中時我佔中
各人方向大不同
今後不知何處去
笑言他日再登峰

維持了七十五天的佔據行動、終於在金區被警察清場之後曲終人散。主辦嘅雙學表示、人雖然撤退、但抗爭未完、並將會以各種不同形式繼續發展下去、而大腰亭教頭亦揚言不排除日後有更激烈抗爭爆發嘅可能。不過在下只知到、有錢使得鬼推磨、但今次三個水嚨頭齊齊關上、試問學生哥何來巨款、難道單憑一腔熱血就搞得來?姑勿論點都好啦、既然人家姑妄言之、在下亦惟有姑妄聽之好了!

2014年12月10日星期三

政治使人迷失本性

荒唐教授玩泥沙
教出徒弟自當差
政府時常添渾賬
尊貴胡扯斷大牙

呢嗱、戰狼三伯一心以為利用班後生仔替他們打一仗以圓其春秋大夢、殊不知那群血氣方剛嘅後生仔居然陣前食夾棍、打着戰狼三伯嘅正黃旗旗號自把自為、結果氣得三伯拂袖而去。正所謂蛇無頭而不行吖嘛、自三伯離開戰區之後正黃旗下嘅大生會及神蜂思潮兩幫人亦開始互爭奪領導地位。結果兩頭唔受中間受、領導大權落在早已潛伏其中嘅黑旗幫和激進派人馬手上。正當激進派挾大生以令黃旗軍之際、而溫和派亦將神蜂牽到另一邊實行單打獨鬥。雖然三水金主拂佬禮眼見此情形已心知不妙、但為着交足功課、亦惟有繼續留守在金區觀戰台。

2014年12月8日星期一

今非昔比



昔日沖天一條龍
今朝慘變鼻涕蟲
你問香江何處去
我拿舊事發噏風

人家洋總督自講、咱家縣首又係自講、但人家洋總督就能一呼百應、而咱家縣首則是一呼百「」。雖然大家同樣是為國家利益而辦事、不過人家就掂過碌蔗、而咱家就乜凌乜斜。點解兩者之間嘅差距會咁遠、究竟係紫荊人爛泥扶唔上壁、抑或有其它因素呢?

2014年12月6日星期六

我們的社會是這樣的嗎?



政爭鬧爆門常開
議會慘變戰鋒台
民間怨忿無人問
怒喝儒生勿種災

紫荊議事堂部份尊貴被踢爆公器私用、開放堂中設施讓自己友作戰中指揮部。某尊貴在回答記者提問時堅稱自己冇有錯、日後如果不是非常時期就會自律。換言之、潛台詞就是只要他認為有須要唔時候、必定會重蹈覆轍、問你怕未?喂喂、議事堂乃是全城納稅人嘅資產、而納稅人之中亦包含所有不同政治立場嘅市民、所以尊貴並唔係大晒、更加唔應該私底下動用公家設備供給外人使用。因為這樣等同假公濟私、對持不同政治立場嘅納稅人唔公平、即使在法律上並不構成罪名、但在道德上是可恥的。在下奉勸各位尊貴一聲、如果要幫助自己友就唔好咁孤寒、索性自己掏腰包去酒店開房、而不是濫用納稅人資源。假如你嘅對手又咁做嘅話、議事堂豈非變成冇掩雞籠?

2014年12月4日星期四

劫後狗熊傳

欺人之威不是威
聚眾鳩嗚遇鬼迷
三山五嶽支持你
道理唔通拼命擠

今次戰中都算好帶挈、甚麼都拿不到兼累街坊還不止、仲留低大大畢蘇州屎畀紫荊人嘆。雖然旺區清場尚算成功、但卻衍生一群鳩嗚(普通話“賺物”嘅諧音)青年出來。最弊家伙嘅就係鳩嗚青年(下稱鳩青)要嘅唔係真普選、而係要搞到人家檔生意雞毛鴨血。日前有一群鳩青集體迫爆旺區一家小商店、搞到人家不能做生意、店員想落閘避開他們又被制止、終於要勞動捕快到場才可以解圍。據講這家商店嘅職員在戰中期間開罪了佔領者、今次人家表面為鳩嗚而來、但實際上是專程為報復而來的。

2014年12月2日星期二

應告終便告終



在你門前聚惡丁
紮營露宿博同情
今日滿城歪道理
荒唐教授廢知青

呢嗱、千百年來我龍之大地一向推崇儒家思想、直到今天才發覺原來孔孟之說已經 out 好耐喇、取而代之乃係山姆家嘅霸道式價值觀。君不見今日龍之家門口被來自萬里之外的山姆家大軍及其在亞洲盟幫圍堵至水泄不通嗎?據山姆大叔講、此乃維護其家族利益以及維護世界和平之舉、並非針對龍之家族而來、還叫龍之族長不要作出錯誤解讀。如此價值觀不是霸道、難道是黃道乎?

2014年12月1日星期一

全城皆輸

你使剛勁我使柔
書包放下泛九流
人人責難偏不退
鬧到香江日日愁

預傳、一、二、三、噓...!讓路!讓路!讓路!讓路!這是昨晚上大學徒聯誼會發動的包圍總衙門嘅第一道命令、當時雨遮黨眾以自製盾牌陣作為頭排步隊、集體向現場捕快推進。這趟行動一開始就違反大學徒首領兜阿匡嘅“不主動衝擊和挑釁捕快”嘅公開承諾、難怪事後飯盟頭領劏雞華發表聲明、強調不會動員支持。

2014年11月30日星期日

妖獸之都



東邊風來西邊渡
偉大工程憑你造
人人博命我抽水
適時發難有前途

昨夜睡夢正甜之際、忽然被電話鈴聲吵醒、並在矇矇矓矓之中隱約聽聞話筒傳來甚麼光復旺區之後、就輪到為重煲廿三味製造條件。不過當我在早上醒來之後、才猛然記起、印象中的那位與話筒聲線相似嘅友人是專門演大反派角色的、唔應該會講啲咁嘢嘅。我懷疑只是聲有相似調有相同、而且係有人打錯電話。可惜我家嘅電話係搞撥式嘅古董級產物、否則只要翻查一下紀錄定能查出真相。自從上次巡捕房成功光復旺區之後、激進派人馬以傳音入密方式號召各路英雄到該區打巷戰、目的是要鎖定巡捕房嘅注意力、好讓金區人馬擁有足夠空間部署下一波行動。據說大教頭將會由復出、並帶領眾門生進行無限期罷吃、企圖在國際社會上製造更大回響。注於屬真屬假、就要睇過至知喇!

2014年11月28日星期五

旺區從此平靜下來?







你反我又反
難分莊與閒
毒瘤雖切去
留下一身潺

呢嗱、反盟終於成功借巡捕房之力去剷除旺區戰場的那個大毒瘤。事情發展到今時今日這個地步、如果唔係盲嘅都睇得出旺區佔據時間越長久、反盟嘅乞人憎指數就飆升得更高、恐怕最終連擁躉都會變心、到咗驅異堂大選嘅時候也一敗塗地、咁就真係陸雲霆睇相、無衰攞嚟衰架喇!因此反盟陣中主流意見是要棄守旺區穩守鐘區、但這個意見卻不為旺區揸拂人癲教頭和鐵血幫老大辣腸王所接納。在無計可施之下、反盟惟有調走自己嘅人馬、並對捕快與鐵血幫之戰作壁上觀。

2014年11月26日星期三

雨遮革命難以為繼



人人喊自首
個個調頭走
此間真英雄
無非得把口

呢嗱、政壇其實係一個「偽術」大舞台、口沫橫飛者彼彼皆是、但能稱得上勇於負責者絕對唔多。昨日當捕快在旺區協助「執凸你」清場時驟眼看去、只見走在最前端的人大多數是來自燶黨、射蚊連、拳頭幫、鐵血幫、還有混合幾路三點水(黑幫)人馬、其間飄紅哥、大舅、常無、麗摑姐等多名反盟頭領現身替雨遮黨押陣、但敢於承擔違反「撳制令」責任而被捕的就只有無常一人。其餘的人早跑得無影無蹤矣!難怪常聽聞人家講、論天下英雄唯常無一人矣!

2014年11月24日星期一

遮天蔽日



你說我黑不是黑
車完大炮喊冤屈
擋人米路包請命
生既不能死不得

有報導指出、老記在金區戰場發現、雨遮黨監護人荔枝英與一名綽號大把刀嘅黑幫猛人密堪。據稱大把刀乃係噏圖幫刑堂堂主、其身份實屬非同小可、雖然荔枝英在事後矢口否認與大把刀相識、但他在戰區與此人多次咬耳仔、難免會令人產生聯想。其實早有傳聞指出、自從雨遮革命爆發以來、無論是金區、灣區、銅區、抑或旺區都不時傳出有黑道人物活躍其中、以致這場所謂革命予人一種龍蛇混雜嘅感覺。據說戰狼三伯宣布遍地開花之後不久、旺區這片英雄地便聚集多路黑道人馬。當時計有噏圖、勝可、十記、真義、干樂等人馬虎視眈眈司機而動、幸好巡捕房早收到線報及時將危機瓦解、否則後果難料。

2014年11月22日星期六

割蓆的啟示



你博同情我博衰
明爭暗鬥有人隨
本來合作稱兄弟
唯獨今次各一堆

有人話、早前大學徒打鑼打鼓闖關北上是假的、藉着被拒入境博取大眾同情才是真的。不過亦有人話、鐵血戰士突襲話事堂、目的就係要製造衝突迫使巡捕房出手鎮壓。事後有人揭發那群鐵血戰士之中、居然有人在互聯網上大造文章攻擊雨遮動運、並將整件事與爆粗教頭有親密關係嘅鐵血幫串連在一起。如此一來、整件事就變得異常詭秘、並予人一種撲朔迷離嘅感覺。

2014年11月21日星期五

戰中之地震先兆



既然大夢要成空
不如盡快打衝鋒
諸君莫問誰之過
一炮轟來便建功

前幾日鐘區戰場發生一宗明修棧道、暗度陳倉嘅騎呢事件。當時有一班人託辭到話事堂前表決網23、但原來集齊人馬之後不是開會而係突擊話事堂。更令人意外嘅就係、當話事堂大門被攻破之後、除咗一隻盲頭污蠅飛身而入之外、其他人通通卻步於門外、根本毫無攻佔嘅意思。燶黨嘅飄紅哥欲制止卻被人捹開、事後射蚊連嘅毛毛哥公開指責有關行為、而拳頭幫嘅大隻哥要求有關負責人企出嚟承認責任。另一方面、鶴雲之潮嘅壇主神蜂哥又煞有介事的指當時在場捕快人數比平時銳減、大有暗示巡捕房勾結黑幫架禍之意。不過咁嘅講法、恐怕連佢自己都唔會信囉!

2014年11月19日星期三

還是收手的好

開錯牌頭打錯更
三伯知機運路行
天時地利皆不予
人和逆轉冇得摱

大學徒聯誼會秘書康少爺表示、今次一眾闖關嘅師兄弟未登機便被打回頭、證明他們已被列入黑名單、並擔心聯誼會所有師兄弟都會喪失登陸資格。因此他公開要求有關當局解釋原因。呢嗱、呢啲咪就係又痕又怕痛囉!俗語所謂、出得嚟行預咗要還吖嘛!現在是大學徒要跑去紅家會踢館、若總舵跟他們計較會被人話以大斯小、如果任由呢班人在自己地頭撒野又會被人話冇料到。因此、禁止這群人登陸是合當不過嘅做法。試問還有啥好解釋呢?

2014年11月15日星期六

撐到幾時?

屢勸你走你不走
堅持霸道封門口
擋人財路天之過
賣弄無知日後愁

某日聽聞一位仁兄話、他們堅決拒絕「袋住先、日後再改進」方案、並堅持「繼續違反禁令、日後再認罪」嘅策略。喂喂、咁講法、豈非等同繼續殺人放火、繼續偷呃拐騙、繼續奸淫虜掠、繼續作奸犯科、總之日後再去自首就OK?難怪黑白兩道上嘅朋友都係咁落力支持今次這趟革命啦!

2014年11月13日星期四

有政治無法治?

祖師敕敕如律令
魑魅鬼怪盡現形
百載繁華如一夢
紫荊猶似地獄城

勢難想像、今次雨遮革命居然將人性醜惡一面曝露得無所遁形。日前苦瓜大狀公開揚言、假如人人都盲目守法嘅話、社會就很容易會淪為人治。繼而輪到爛頭狀師喊路霸自己去判斷、如果認為法令是不符合公義、不符合良知、不符合自己所追求嘅理想、而又自己願意負承擔法律後果就可以繼續留底、繼續加深無辜者嘅損失。在下生於斯、長於斯、從少接受師長教導奉公守法是市民責任、然而以上嘅講法、將在下所信守的全都推翻。原來當時不與我、就可以無視法令繼續為所欲為。難道在今日仇官仇富嘅大氣候之下、這種言論不是極度危險的嗎?難怪政客們也禁止自己嘅兒女參與這場抗爭矣!

2014年11月11日星期二

鬧出個廿三味來



無事喊翻天
難分喪定癲
雕蟲施小技
不如早收鞭

非法黃雨遮墟市發展下去、是否會遍地嫣紅收場尚且未知、但戰狼三伯變咗走佬三伯、並晨雞都冇咁早便縮回返大教館、就係人都知到。戴教頭話自己唔係想教腳、而係準備去巡捕房自首、仲教埋法官判處他在公眾地方非法趁墟罪。須知到在法律上而言、非法墟市主持人乃係犯罪集團首領、所犯嘅罪非比尋常、刑罰亦比一般參加者重得多。然而戴教頭、卻忽然自稱是參加者、而忘記他本身就是用一年多時間去籌備這次非法黃雨遮墟市嘅發起人。呢嗱、呢啲就係厚黑學最高境界。試問呢種超級人版、除咗紫荊大教館之外、邊處仲搵得到?

2014年11月9日星期日

見好不以所謂何?



餓時不得食
臨嘴雙眼直
扮懵定天才
人心險惡極

毫無疑問、反盟與倦制兩派人馬日鬥夜鬥、無非是要爭取話事堂嘅主導權。但問題是、點解從來只有反盟喊爭、而不見倦制喊爭的呢?據說是當今話事堂已經為倦制所壟斷、無論反盟提出甚麼都勢難獲得通過、唯一解救之法就是要將目前話事堂嘅格局打破、然後重新劃分餅仔。之不過若要改革成功、首先要取得金紫荊揸拂人寶座才有望。到底反盟在話事堂嘅形勢又係唔係弱成咁呢?現在就讓我們先了解一下其中實況吧!

2014年11月7日星期五

混蛋之城

無人敢說真心話
支持與否也挨罵
教頭大話兩三句
書生隨即發爛渣

近日社會上有人形容、嗰啲既唔幫黃亦唔幫藍嘅人以為自己睇透世情、其實係一群不懂民主和假作惺惺之輩。呢嗱、幫又被人罵、唔幫都被人罵、紫荊人真係唔易做咯!剛剛出爐嘅講大民調顯示、無論係泛派抑或建派嘅政黨同樣民望大插水。照咁睇嚟、人們對於政治爭鬥呢家嘢感到厭惡、已經係不爭嘅事實、可惜話事堂裡面班大帝個個借咗聾耳陳雙耳、懶得睬你之嘛!

2014年11月5日星期三

欲罷不能



學人搞戰中
大夢變成空
時逢燒壞瓦
注定褲穿窿

呢嗱、戰狼三伯都可謂夠晒“禮、義、廉”喇、佢哋一聽聞將會有戰中受害者從法律途徑向他們索取賠償、就馬上呼籲戰中參與者齊齊自首、美其名創造全世界高最自首紀錄、其實係要氹班人證明自己有份阻人發達、從而一齊孭起筆賠償費用就真嘅。呢嗱、呢啲就係光棍佬話齋“精人出口、笨人出手”吖嘛!

2014年11月3日星期一

大話戰中

三個戇老頭
帶你去西遊
誤人兼損物
撩起大眾愁

呢嗱、今回真係好死唔死咯、居然被在下唔覺意噏中、昨日支持戰中嘅人、就係今日反對戰中嘅人。目下戰中行動嘅成員猶如烏合之眾、兩班慌失失嘅學師仔和一群雜牌軍搞到神憎鬼厭、都唔知點收科咯!依照目前形勢看來、戰中行動隨着時間消逝而弄到聲名狼藉。當下街坊心煩氣燥、大小店東蝕本蝕到火都嚟埋、預計很快就爆發執笠潮、到時莫講話學師仔唔掂、就算戰狼三伯和反盟都變成過街老鼠架喇!因此呢班友仔當務之急並唔係要爭取甚麼理想、而係要找個藉口出嚟散水架咋!

2014年11月1日星期六

應該擴張宮能組別



戰中原是雜牌軍
一氣谷來便發瘟
先生教路前不進
有着同分退爛民

江湖盛傳總舵主踢田大出紅家會已經表明、不惜犧牲富貴黨七票而無法在話事堂通過紫改、亦不容許有人吃裡扒外。換言之紫改不成、宮能組別亦繼續發揮其劫貧濟富嘅角色。照咁睇嚟、紫荊蟻民豈不是繼續做冤大頭不成?呢嗱、開講都有話啦、窮則變、變則通吖嘛!既然除之不得、而且咱家縣首又口口聲聲話要公平地照顧各方利益持份者、那就反過來將宮能組別嘅代表性升級吧!

2014年10月29日星期三

戰中升級?



打着民主反民主
書生惡過大天二
封路紮營不賣賬
押上囚車悔恨遲

有政客在人民公社議會期間質問保安大隊長、是否因為戰中是非法經營就不獲巡捕房保護?呢嗱、那些攞正牌兼納正稅做生意嘅大小商號被人搞到雞毛鴨血、甚至已有食店因為拍烏蠅而結業、但巡捕房依然劈手不理、點解又唔見呢班友替佢哋出頭呢?喂喂、與民為敵衰硬架、小心下次選舉又躀低多幾個呀、老友!

2014年10月27日星期一

暴力中的和平

橫蠻霸道叫和平
揮拳毆打謂撐警
政府關人兼混賬
學子無知背罪名

呢嗱、暴力呢家嘢簡直係傳染病一樣、爆開就爆。連日來、黃絲帶嘅晒冷嘉年華會場頻頻被藍絲帶嘅人踩場、而且多次爆發暴力衝突。某晚藍絲帶開茶篤撐警大派對期間、居然在自己個場一面喊撐警、一面毆打採訪記者。雖然未造成致命傷害、但已經打到人家遍體鱗傷。勢想唔到咱家紫荊人居然變得咁暴戾、每次都係人多欺負人少、簡直係無法無天。

2014年10月25日星期六

政海孤雛



小子做先鋒
越做越唔通
沿路打倒蹆
到尼一場空

自從紫荊堂大總管答應廣大武術學院嘅學師會代表、將他們的要求透過講馬部轉交紅家會總舵之後、翌日學師會代表便發出不尋常嘅聲明、要求直接與總舵對話。別以為這一宗看似係談判中突發性小枝節、其實內裡是另有乾坤、而且連場好戲在後頭、當城中大晒冷件事擺平之後就自然有好戲睇、保證你眼界大開架!不妨耐心等一等啦!

2014年10月23日星期四

阿黃的控訴



別說無厘頭,民主挾自由;
學生成街霸,官家懶回眸。
花旗沽清貨,歐洲未夠喉;
財經打倒蹆,港股遇急流。
此番無力撐,大難正當頭;
紫人喊救命,一鋪報晒仇。

阿黃話:「你嘅崇高理念尚未到手、已先毀去我半條人命。假如再搞落去、我就一定瓜得。如果你要為爭取民主犧牲、我一定唔會反對、因為你有你嘅自由。但係你在未得到我同意之前就夾硬要我犧牲、那就絕對係強盜所為。現在我唔係話民主唔好、更加唔係話要阻止你去爭取民主、我只係要求你唔好再傷害我。

2014年10月21日星期二

誰是真正的磨心?

天下無知天亦知
空言怪論費心思
攻心說話停不了
聽去聽來乏善詞

呢嗱、戰中書生領袖多次把示威者與捕快的衝突事件、歸咎於捕快挑釁示威者而觸發的。之但係、事實證明並非如此。據報巡捕房已經拘捕一名青年、指他透過互聯網呼籲人們前往迫爆區衝擊警察防線、而且揚言革命已經到了轉捩點、並鼓吹群眾必須要盡力去迫使捕快使用武力。因此、如果腦袋不是生錯位置嘅正常人、一聽到所謂「捕快挑釁示威者」嘅指控、便知道這種講法完全係本未倒置。勢想不到、一群正在接受高等教育嘅書生、居然會在光天化日之下委過於人。

2014年10月19日星期日

黑警啟示錄



政棍將人整
捕快變黑警
官家無能事
大眾眼矎矎

呢嗱、世界輪流轉、在1967年暴亂期間阻仔稱香江捕快做黃皮狗、之但係到咗2014年、書生革命嘅今日、爛民政棍喊捕快做黑警。點解會咁?答安就是人嘅劣根性失控所致。扣帽子從來都是政棍慣用嘅伎倆、為咗要達到一己之私、連人性都可以泯滅、甚麼喪心病狂嘅事都做得出來。

2014年10月17日星期五

革誰的命?



自由多造福
民主未滿足
書生齊革命
大眾眼睩睩

日前有人替京司傳話、指阿爺認為已經在「廿三味」以及「作文教育」兩方面作出讓步、今次「紫荊改革」決不妥協、亦不會讓此事以流血告終。呢嗱、未知各位街坊對於這番話有何感想、但在下聽落就驚驚地喇!所謂不妥協不流血、等同叫班書生放心玩、鐘意點玩就點玩、要玩到幾大就幾大、話之你玩到翻天覆地都不會有鎮壓嘅、總之唔使主意動搖朝廷嘅決心。咁講法、豈非等同宣布有死紫荊人死?難怪連李老闆都企出來呼籲書生收手啦!

2014年10月14日星期二

有感而發



民主浪滔滔
不怕斬頭刀
欲圓夫子夢
代價要幾高

如果你問我是否支持無篩選嘅普選、我可以話畀你知、我支持。不過如果你問我是否支持戰中嘅話、我的答案是不支持。因為我早已經從8964之中學懂了!當年我雖然身在紫荊城、但也和其他人一樣從電視畫面見到書生為了挽救國家、絕食要求政府改革。那些畫面深深的感動了我、於是我也像其他紫荊人一樣、在自己的手臂上戴上黑布帶、以示支持。但當第一下槍聲響起時我的心便沉下去、那種刻骨之痛至今尚未忘懷。

2014年10月12日星期日

戰中外傳




紫城鬧紛爭
裡外睇唔真
官民不相合
帶挈有心人

今時今日、以資本主義為主導的西方工業大國全部陷入經濟困境之中、只有以共產主義為主導核心嘅天朝一枝獨秀。以花旗為首的西方經濟大國已經感到威脅、亦明白到若要保存資本主義嘅存在價值、必先要將世界上最大嘅共產主義堡壘摧毀。由於天朝是個擁有核武器嘅國家、若以戰爭為解決手段、恐怕全世界都會被殃及、所以慳水慳力嘅顏色革命便派上用場。

2014年10月10日星期五

民主是啥?

民主未益你
已先傷和氣
眾生標松柴
無非皆為利

日前白鴨黨坐館婆瞓街姐被書生追問何謂國際標準嘅時候、她回應謂「能夠讓不同政見者參選舉」就係喇喎!睇嚟、瞓街姐可能係瞓唔醒都未定喇!難道她認為花旗人會容許共產黨人參與該國各級選舉嘅咩?答案當然係唔可以吖嘛!道理正如阿爺是絕對不會容許外國勢力干預縣首選舉一樣咁簡單。若問那一家民主模式才算係真正嘅民主、那實在不好說。之不過、山姆大叔那套金權政治式民主在世界流行榜上高據首位、而目前阿爺那套一家專政式民主仍未上榜而矣!

2014年10月8日星期三

政治弄人



就地喝一聲
鄰里使神經
親人黑了面
摯友鬧不停

自從戰中爆發之後、黃色絲帶代表支持有公民提名嘅普選和支持戰中行動、而藍絲帶代表支持有篩選嘅普選和支持警方執法。就係咁、這場政治爭鬥就越演越激烈、不少好朋友、好同事都因為各執一詞鬧得面紅耳赤、甚至一家人裡面都分成兩派、亦聽聞有對父女在吃飯期間拗到火紅火綠、結果連飯碗都掟埋。咁、你話嘞、係咪豈有此理呢?

2014年10月6日星期一

不可為而為之



你知我又知
來者盡皆痴
未見當頭棒
只見未來輸

戰中搞到今日形勢急轉下滑、議價能力亦越來越薄弱、主要原因係反對戰中嘅人數越來越多。雖然有大批忠實擁躉支持、但出來踩場嘅人也不少。剛剛還有搵食車司機以慢駛宣示抗議生計受阻、社會撕裂已經去到臨界點、管治當局遲早都會使用武力清場。然而、在這個時候有人見到部份示威者撤退、惶恐就此玩完、於是聯群結隊跑出來呼籲政府跟示威者妥協。不過阿爺嘅態度已經很清楚係絕不妥協、所以縣府亦無可能向示威者誠諾些甚麼。咁即係話、距離「要求不果、流血收場」越來越近矣!

2014年10月4日星期六

巡捕房勾結黑社會?



越抹越是黑
有水洗唔甩
台前爆陰毒
幕後共一窟

昨日數批反戰中人馬出動向戰中群眾衝擊、並造成有人受傷和有人被捕。今日江湖上有傳聞指那些衝擊戰中人士的人是為愛字堆集團所顧用的、亦有傳聞指巡捕房與黑幫勾結對付戰中人士、而支持戰中嘅政客亦以高姿態指責巡捕房縱容黑幫傷害和平示威者。

2014年10月2日星期四

搬起石頭砸己腳



戰中不戰中
齊齊打秋風
支持變黑面
到尾一場空

戰中發展到今日確實係遍地開花、只見一群又一群擁抱着未來民主幢幜嘅學生到處集結開拓新地盤爭取民主。雖然有學生聲稱不接受任何政客或戰中三英指揮、但從他們結集地點對市民影響嘅程度看來、應該是經過巧妙布置的。之但係、原來學生嘅如意算盤並不是到處都打得響。有群學生到元區派絲帶、點知有一群人跑到他們面前、要求他們勿在該區搞事、結果學生只好離開。其實邊疆地區普遍為鄉土勢力所壟斷、無論是飯民抑或是倦制、若想在當地種一枚樁腳亦須要起用當地人、就憑幾個外來學生哥根本冇可能在人家地頭插旗。這是政治現實、學生哥究竟懂得幾多?

2014年9月30日星期二

我就笑唔出



紫改仍是大棋局
行錯半步一鑊熟
須知政治無真相
不謀退路必遭伏

在剛過去嘅週末晚、縣府滿以為來一招快刀斬亂麻、先投催淚彈、後再現槍支就可以把那群手無寸鐵嘅書呆子嚇跑。誰知弄巧成拙、激發起更多人出來支持學生、除了金鐘區之外、下環區、銅鑼區和旺區等地變成示威戰場、而且巡捕房嘅驅散手法亦受到千夫所指、今因縣府都可謂賠了夫人又折兵矣!呢嗱、戰中三英見大好形勢則重在他們的一方、當然喜不自禁。翌日戴教頭更帶着滿臉喜悅公布戰中運動遍地開花、並宣稱第二階段行動快將開始。不過、亦正是因為遍地開花這四個字、才令在下笑唔出。

2014年9月28日星期日

2014年9月26日星期五

精人出口



學生打衝鋒
成仁博成功
兩頭不到岸
惟有揼波鐘

呢嗱、『有政治、無道義』又有新體驗。中書齋學生哥被推入政治格鬥場已經無可避免。繼『學人思維』之後、第二個中書齋嘅學生哥組織『書生瞓醒』於不久前成立、並迅速加入罷課行列。從此一向和平安靜嘅中書齋便淪落成為新的政治格鬥場所。學生哥想專心讀好書?難矣!講到這裡、內心忽然湧起一個頗具玩味嘅問題。何以在大中書齋所成立的書生組織、總是為針對阿爺而設嘅呢、吓?

2014年9月23日星期二

必敗的一仗



罷課無效打衝鋒
若不成仁亦成空
今日教頭閃避卸
他朝學子也相同

機乎所有大中教館嘅館主人人跟風、個個閃避、對學徒罷學表示不鼓勵也不反對、仲做埋西南二伯父話將會替罷學嘅學徒補課、但從未聽聞過有人敢於與學徒分析一下厲害所在。之但係鎮大教館嘅館主教頭立就食古不化、企硬不肯做吹水鳥人、結果被班大學徒迫到埋牆角。罷學代表揸旗丁指稱、今次所有大教館嘅學徒都是為光明而戰、教頭立連表態支持都不敢、根本冇資格當他們的館主喎!

2014年9月20日星期六

多點關心 少點麻煩



大炮乃無煙
何必兩相煎
滿城風雨聚
盡在世間錢

近日江湖上盛傳、政黨、學生、民運組織勾結山姆大叔、並與其特派員開秘會議、企圖煽動民眾仇官、仇富、翻盅亂講。但亦有消息指這些是兩陣對壘必然現象、信與不信任憑君意好了!俗語有講、家和萬事興、家衰口不停。看來咱家紫荊城也好不到那裡去矣!

2014年9月17日星期三

餿油與租



世界難撈亦要撈
黑心作業有前途
租金昂貴擋米路
唯有盡地博一鋪

曾幾何時紫荊城被譽為當世美食天堂、點不知突然爆出超過五百家店鋪以餿水油來奉客、其中包括連銷式快餐店、中西餅店、麵包店、雲吞麵店、甚至連酒店都有。當事件在城中曝光之後、不獨只人人眉頭皺、個個眼光光、甚至連咱家美食天堂嘅招牌都噏噏槓。今回蕃薯葉唱嘅捐血老歌『阿哥捐血、阿姐捐血、老梁老何共老林都損血、大家捐血、你捐咗未?』又派用場啦!之不過是改編為『阿哥賴嘢、阿姐賴嘢、老梁老何共老林都賴嘢、大家賴嘢、你賴咗未?』嚟唱之嘛!咁、你話死唔死?

2014年9月15日星期一

中學從此不太平



政治入侵中校園
睇住學生上錯船
師長冇人敢異議
跟紅頂白喊通天

呢嗱、人在成長階段之中總有一些事應該去做、亦有一些事絕不可做。正如家長絕不會讓小孩子有僭越行為、理由就是要保證他們學好守本份、並且在一個良好環境之中成長吖嘛!現在竟然有人破格將政治運動帶入中書齋、並鼓勵學生參加罷課、然而身為師長嘅人不單只不加勸阻、居然說將會為罷課學生補課。試問咁做法與西南二伯父有何分別?須知到政治呢家嘢、就算在社會打滾幾十年嘅人都未必睇得通透、何況正在求學時期嘅學生哥呢?

2014年9月12日星期五

紫荊勝過史葛蘭?



唔怕貨比貨
最怕唔知錯
生人說死話
遲早大家禍

高呼脫離大北列癲帝國獨立嘅史葛蘭、獲得嘅支持度大幅飆升之際、首相家霉倫立即放話保證、如果時史葛蘭不脫離大北列癲嘅話、便會提高其財政自主權。心水清嘅人一聽就知曉、原來史葛蘭並不擁有財政自主權的。由此推算、在其它方面也可能沒有自主權的。那就難怪史葛蘭人喊着要賣甩大北列癲啦!呢嗱、照咁睇嚟、咱家紫荊城就叻過史葛蘭喇!起碼咱家嘅財政是自己揸拂作主、唔使下下向中央請示吖嘛!仲有呀、唔使幾耐就會擁有一人一票選縣首嘅權利、雖然只是一個鳥籠式選舉、但總算踏出第一步。

2014年9月10日星期三

由佢哋講起


逢人便說他不好
真真假假難靠譜
往日仇人今碰面
兜巴直扯掹甩毛

日前過氣縣首老古洞與過氣督爺肥佬棚先後就『紫改』發表意見。前者是呼籲街坊放開懷抱接受下議院定下來嘅篩選框框。後者就話新框框乃係衰到冇朋友嘅波斯式選舉。無論呢兩位大叔講嘅話是來自肺腑、抑或是來自屁股都好、總之就有人唔滿意、並且齊齊走出來炸形。第一位是肥佬棚嘅前頭馬兼兩朝元老麈四姑。她指老古洞講話係要氹街坊入屎坑、並叫人千祈咪聽佢支笛。另外一位出來講嘢嘅係前朝兩局重臣、兼當今下議院常委飯大嬸。她批評肥佬棚妖言惑眾呃街坊、連份合同內容都未了解就彈出來亂噏廿四、並叫肥佬棚早唞喎!

2014年9月7日星期日

大埔 海濱花園 中秋綵燈展





老婆帶我看花燈
來到公園扮細蚊
舊日傳統失分寸
大頭公仔盡銷魂

昨晚我家嘅地球女人域嫂聽完寶具七歲大外甥女個電話之後忽然下令、要在下隨她前往大埔海濱公園睇花燈。點知山長水遠撫到現場一看方知原來只是個蚊型燈展、而且以十二星座作為賣點、睇落似到咗兒童樂園多啲、唔怪得外甥女大力推薦啦!既然嚟到、惟有嗱嗱聲快拍一輪、然後拉着域嫂急急腳鬆人去際肚喇!

祝各位博友中秋節快樂呀!

2014年9月4日星期四

紫荊解碼



似真不是真
難將道理分
一朝行錯路
劫後冇翻身

當大代會就正菜改格方案『正改』拍板之後、該會二當家飛大叔聲稱、歡迎飯盟加入愛葛愛糖大家庭喎!之但係、弊就弊在紫荊人向來喜歡用葛來煲老火湯、跟老表將葛舔着糖一起吃嘅習慣完全不同。雖然城中也有人喜歡把葛舔糖而食、但卻不是紫荊人主流口味。看來、飛大叔都係嘥聲壞氣喇!

2014年9月1日星期一

大亂將至


框架己定好
麻煩亦倒數
紫城遭劫難
不見有賢豪

呢嗱、朝廷一句『葛瓜安全』大代會便推出一套『篩普損』規則出來見街坊、亦即是說從今以後紫荊人都必須按照這套規則去揀選縣首。這個結果等同對飯盟說、今後“有我冇你”若要玩嘢就儘管放馬過來。事情發展到這個地步、恐怕飯盟嘅幻想已經灰飛煙滅。從形勢上看來、無論如何戰中必定會上演、一場大亂在所難免。

2014年8月30日星期六

你想成為輸家嗎?

既是求不得
無須喊冤屈
做人要踏實
切忌隨人拂

青天府就『黑柑』事件展開調查、並且派遣公差攜同踢竇令到皮佬捩家中進行大踢竇。另一方面、有人透露大代會可能按原來版本讓『紫改荒案』拍板、意思即係話兜槌定音。然而又有人呼籲飯盟繼續與朝廷就『荒案』交流意見。難怪有人質疑、既然一切定調、還有啥好商量?坊間陰謀論盛傳、青天衙門今次查皮佬捩嘅目的、就是要轉移人們對『紫改』嘅視線。不過亦有傳聞指這批『黑柑』是由花旗偷運入口的禁果、唔單只會食壞人、仲會骾死人。

2014年8月28日星期四

狗屁標準



既是勢難更
何苦強相爭
街頭無怒火
做反有書生

呢嗱、近期「標準」呢家嘢忽然之間在城中熱起來、街坊講、官方講、甚至連大代會(大人代表大會)都講。喂喂、唔講起都冇留意、原來紫荊政壇一家標準三家說法。第一家:「國際標準」。第二家又係:「國際標準」。第三家都係:「國際標準」。呢嗱、呢三句嘢聽起來確係一樣、之但係白紙黑字寫下來就有天壤之別了!首先係普羅大眾認知嘅「國際標準」、其次係政府執行嘅「國製標準」、最後嘅係政客奉行嘅「各製標準」。由於坊間、政府、政客所持的標準存在着嚴重分歧、難免出現雞同鴨講嘅現像、結果當然係有標準等同冇標準囉!

2014年8月25日星期一

口噏噏當秘笈

平時頭耷耷
隨口當秘笈
幫忙唔到埞
到埞聽執粒

日前大賬房掌櫃二撇曾忽然聲稱、無論在食飯、睇戲、行街、甚至乎上廁嘅問題上、咱家縣首都係直接向市民「問」責嘅喎!在下不知到二撇曾是否一邊擁着佳人聽古典樂、一邊飲紅酒搞大咗…喔…對不起、應該是飲大咗、所以連講話都講到一嚿嚿、總之聽完他講嘅話之後就有種周身唔老嚟嘅感覺。咁、係吖嘛、人家當一國之首也要向人民負責、然而咱家區區縣首居然向市民問起責來、這到底是那一門的玩意呀?

2014年8月21日星期四

爭氣大龍鳳

本來好清爽
忽成大隻廣
彷彿有其事
明知沒法擋

上個禮拜日、倦制派舉辦了一次爭氣大龍鳳遊行、並且宣稱有一千多家志願團體參與。點知被踢爆有人以撤蝦餃、燒賣、叉燒包和撤溪錢嘅方式聘用一群山寨茄哩啡混入遊行隊伍之中、而且那些人根本上連自己做緊乜東東都唔知。恐怕連那位取得簽名(一百五十萬個)最高紀錄保持者白頭兜、勢難想到今次乘勝追擊居然令他踩得一腳米田共嘅。呢嗱、到咗呢個時候又係綽號「齋講良心」嘅陳四姑企出來同你講心喇!她強烈譴責倦制派打着大遊行旗號搗亂跑龍套行業、並企圖拖低茄哩啡工資之餘、又痛斥那群山寨貨為了區區蠅頭小利便出賣行家、將紫荊人嘅「瞎心」價值掉進糞坑裡去。雖然白頭兜和被指控撤溪錢嘅冧鎮集團皆出面否認有關指控、但信與不信就真係見仁見智矣!

2014年8月18日星期一

企硬 死硬 看誰骨頭硬



表面上喊殺連天
暗地裡斟茶遞煙
賣蠱惑人才出眾
欲交心先講利錢

近日江湖盛傳、飯盟與倦制兩派人馬就「普損」一事展開大廝殺、在背後扯線的人是萬歲爺和山姆大叔。喂喂、試問一件明明是紫荊人的事、居然會另有人暗中在幕後操縱、而且還牽涉到外人、那是何等哀哉?近日政治「獻柑」醜聞頻傳、有人被踢爆在城中招兵買馬意圖翻盅亂講、亦有政治人物被揭發收受「黑柑」。搞成咁嘅環境、都可謂吾不欲觀之矣!

2014年8月14日星期四

不談會麵只講臘腸

我喊你來你不來
今天又想共一枱
物換星移天地轉
刁橋扭擰嘆哀哉

俗語都有講、蘇州過後冇艇搭吖嘛、上次人家九省巡案余掟星大人帶埋個京城第一大廚南下、並主動邀請盟主派頭領過府吃「會麵」、點知班友仔個個刁橋扭擰、仲齊齊玩唔畀面。就係咁、嗰餐「會麵」益晒保主派。點知日前飯盟忽然又喊着要食「會麵」喇喎、主人家當然馬上答應、之不過陪他們吃「會麵」的並非九省巡案、而係西灣府尹張小明大人。換言之呢餐「會麵」再唔係出自京城第一名廚之手、而係由本地嘅英記大牌檔提供嘅外賣而矣!

2014年8月11日星期一

捕快反戰中實屬不智



捕快反戰中
難以定吉凶
不驚無路退
最忌褲穿窿

早前縣太爺講、公人是市民一分子、有權以個人身份去支持反戰中、而巡捕房刀頭協會亦隨後表示、捕快以個人身份支持反戰中不會違反捕快通例。不過飯盟就唔係咁睇、民間反對團體嘅反應亦相當緊張、因此人民公被嘅飯盟代表立即寫信給總捕頭、要求他就捕快支持反戰中一事作出解釋。

2014年8月8日星期五

樓價又飆升



唔怕雙辣招
最怕仙人跳
大食冇返頭
連鬼都唔要

呢嗱、你有你雙辣招企硬、他有他樓價繼續飆升、都可謂銀両自你袋來不亦樂乎。今次是愈細小的單位叫價愈高、這是代表着真正被打荷包的就是賣不起千尺豪宅的所謂中產人士。在下必須聲明、像二撇曾那類月薪接近四十萬嘅特級中產並不在此列。勿以為在下又在這裡危言聳聽、萬一銀號加息嘅話、恐怕到處都是空中飛人、若然不想墊屍底最好行騎樓底、不然的話就要邊行邊眈天望地確保安全。

2014年8月6日星期三

直銷凶鈴



電話廣告乞人憎
每日擾你兩三勻
雖已言明不奉客
凶鈴繼續鬧紛紛

以直銷凶鈴來形容電話直銷廣告推銷最適合不過、因為無論何時何地、這類直銷凶鈴都會透過你的手機煩到你嘔、煩到你嬲。即使你已經申請拒絕接收直銷廣告都冇用、因為那些凶鈴依然不停的來騷擾你。因此當你參加重要會議時最好是先關掉手機。不過、如果有人等着你去救命、而你又收不到相關訊息、而導致不幸嘅話、那麼錯的不是你、因為不幸是間接由直銷凶鈴所造成的。

2014年8月4日星期一

由當眾拉屎講起



你說我囂不是囂
腰纏萬貫勝天驕
香江有難條凋捹
跛腳兼逢獨木橋

呢嗱、大鄉里任由兒童在街頭當眾拉屎你就聽得多、但在飛機坐位上大解你又聽過未?吓、冇聽過?唔打緊、因為今次有得過你聽。正當內地官報指責紫荊人不通家鄉文化、以及過分渲染內地兒童當街拉屎之際、在一班由京城飛往花旗抵揼粟市的客機上、又有一個內地家庭有所作為。報導指出、有人借咗聾耳陳雙耳、不聽機倉服務員和其他乘客勸告、堅持不去廁所、並在坐位上鋪報紙讓一名小童就地大解、結果令到全機臭氣熏天、引起全機乘客嘩然。

2014年8月1日星期五

基因作祟



你嬲我又嬲
未知幾時休
崇洋早有定
蝕本當豐收

上次榕樹頭講古二老(賣田李和陳四姑)明知西方嘅普世價值就是利己接受、無利過主、依然不委自任代表金紫荊跑到西方多國獻唱、結果既不獲盟主派認同、又受到保主派口誅筆伐指他們唱衰金紫荊。然而賣痰罐賣到街知巷聞嘅保主派大佬痰罐中最近居然也跑到花旗賣唱、並呼籲當地龍裔僑民企出來支持反戰中。呢嗱、龍裔僑民身體內雖然是流着龍血、但身份卻是不折不扣的花旗國公民、今次痰罐中那麼高調要求它國公民支持反戰中、難免令人質疑、咁做會唔會犯咗勾結外國勢力干涉金紫荊內部事務嘅罪名架?

2014年7月29日星期二

公屋縮水居屋有價



阻頭又阻勢
全不受控制
以毒來攻毒
贏輸一樣廢

開講都有話、多講無謂、行動最實際。呢嗱、無論縣太爺講到自己推銷嘅雙辣椒有幾咁巴辣都好、總之事實就係今年落成嘅私人物業又創高鋒、而公屋則創大歸以來新低、都可謂仲衰過做女嗰陣時咯!不過這個現象也算不了甚麼、最有意思嘅就係新建成嘅居屋雖然是同材料、同質量、亦同是由縣府出資建成、但售價方面就大不相同。有些售六千両一尺、有些售九千両一尺。理由是居屋售價都會與座落同區樓價掛勾、即係話居屋座落於貧民區就會大平賣、座落於中產區就會貴啲賣、假如一個唔覺意座落於縣太爺官阺隔離肯定是天價。喂喂、咁搞法仲點算係幫助基層人士置業呀?如果按照呢套邏輯去計算、公屋租金豈不是亦有蕃薯價與海鮮價之分?難怪連你老闆都睇唔過眼、企出來公開指地產霸權從來唔係佢哋、而係奉行高地價政策嘅金紫荊政府。

2014年7月27日星期日

頭大冇腦



有好不學好
頭大腦生草
人浮失馬步
注定躀溝槽

呢嗱、賭仔口中嘅「鳳凰啤」即係睇定而後食、意思即係話有啲人永遠都會托住個羅友吊頸、肯定實食冇黐牙才會出手。剛過去的星期六反戰中陣營宣布收集到嘅簽命已超過預期嘅八十萬、不久府衙傳出已有紊責官大爺亦有簽名、然後輪到督爺跑出來話自己都會簽名、這陣子都可謂意氣風發矣!假有人以為督爺今次高調說自己會去簽名旨在催谷人氣嘅話、在下只能說結果必是適得其反。

2014年7月24日星期四

反戰中登場



戰中遇上反戰中
你拔箭時我扳弓
一旦紫荊逢浩劫
它朝崛起再無從

繼逼宮大聯盟所搞嘅戰中公投之後、最近保主陣營嘅白頭兜豎起一枚名為反戰中嘅旗幟、並揚言希望能收集到八十萬個簽名。呢嗱、這邊廂白頭兜搞嘅連鎖式攤檔剛剛開張不夠幾日、另一邊廂又有傳媒踢爆生果檔老闆瘦身黎向盟主派派發蛇果現金券、並指其頭馬(曾在花旗水帥衙門情報組工作、目前是共河黨派駐紫荊城頭領)麥細蚊有份參與其中。假如報導屬實的話、這場戰中與反戰中之戰就唔係紫荊人家裡事咁簡單矣!

2014年7月21日星期一

買樓乜都免?



你出雙辣招
我將松柴標
屙尿射穿牆
無驚斷擔挑

前日在瓊天大酒吃飯時、無意中聽到隔離台有人講起買樓有着數、內容大概如下:

2014年7月18日星期五

金紫荊的荒謬



當前局勢太糟糕
真言實話冇前途
紫城今日無真相
誰能惑眾領風騷

最近府衙辦公大樓被加上重重圍欄、由門常開改為門常閉、足可見頻密示威行動已令紫府吃不消、然而紫府除了做個籠來罩着自己之外、對於舒緩民怨方面似乎係老鼠拉龜、有若不知從何着手咁嘅款。咁搞法、想太平都幾難矣!

2014年7月15日星期二

羊群心態?



糠鬼賀七一
賣貧兼賣屈
從前勝今日
慨歎窮不甩

最近有人話七一逛街大隊之中有很多參加者是屬於羊群心態一類人、但事實又係唔係咁嘅呢?大歸以來紫荊衙門每年都舉行一次盛大嘅慶祝酒會、並承繼前殖民傳統封侯、封爵兼頒發荷蘭水蓋。唯不同的就是受封者除咗白底之在、紅底、甚至甩底嘅都有份。然而民間亦每年組一枝雜牌軍(近年還有家鄉軍加入)上街遊行以示普天同慶。據說今年有五十萬人上街攞景兼贈慶、即使打個三折都有十五萬、認真不可小觀。不過人們所贈的慶並非「吉慶」嘅慶、而係被人焫「」咗嗰個「」。無奈紫府卻不以為然。

2014年7月12日星期六

公社又鬧鬼



大話堂前又一功
行家蝕底勢不容
雙辣構成擋路障
齊心合力打衝鋒

自從紫府拋出一道雙辣咒鎮住「流市泡沫」以來、人民公社內一眾唔受得辣嘅代表就開始發惡夢。由於「流市泡沫」被雙辣咒所制、又適逢家鄉嘅大小老虎都被打到焦頭爛額、令到一眾「流市」炒家頻食白果、而且洗金和洗銀業亦吹起淡風來。由於穿金帶銀而來嘅人買少見少、以致吉鋪無人問津、而且牽起退租浪湖、租金亦面臨貶值。在這情形之下、大概唔使問阿貴都知究竟誰人做咗大閘蟹。若然雙辣咒繼續制住「流市泡沫」嘅話、恐怕一眾大老闆再也按耐不住、到時那群受人錢財而不能忠人之事嘅掹車邊傍友後庭開花唔在講、分分鐘連個飯碗都會被砸碎。在宮能組鬼槍梁提議之下、一項還原歸本法(撕咒議案)被擺上議事桌、目前仍在辯論中。

2014年7月10日星期四

七個一皮




巴西又揼雞
包你輸甩髻
買細偏開大
今趟抌穿肺

記得在七十年代聽大聲葉(葉觀楫)講波、每當香港代表隊(本地球員組成)或香港聯隊(華洋混合)被外國球隊連數幾蛋之際、就以被人打到七個一皮(即係章法大亂)呢句嘢去形容當時港隊嘅景況。勢難想到四十年後嘅今日、呢句名言居然被套用到巴西國家代表隊身上去。