肥仔希玩嘢

肥希著草裙 

兵丁嚇失魂

送茶兼送飯

你走我還神

呢嗱、那位「南天門事變」走佬英雄肥仔希都算大整蠱喇！佢忽然之間從寶島跟隨信鴿幫長老鐵頭大哥乘飛機到來紫荊城搏拉、仲話要去京城大牢嘆皇家飯、搞到關卡那群兵丁大哥個個手忙腳亂。結果人人賣怕於他、湊錢買盒深井燒鵝飯畀佢嘆、然後恭恭敬敬的恭送他登上飛機、隨即遣返寶島去。有趣的是點解鐵頭大哥不勸肥仔希直接去京城投案、而要到相距千里之外的紫荊城來呢？

眾所周知肥仔希本身是迷吾意族人、而他的家鄉有一個叫「東凹」嘅送炸蛋組織就是由該族族人組成。假如將肥仔希扣押起來、說不定他的鄉里“慶”起上來、送車炸蛋過來畀紫荊人嘆吓、咁就真係傑過芝麻糊喇！試問如果此事由你來處理、你會將他遣返原地、抑或關入大牢呢？以鐵頭大哥這種資深嘅「撞師」沒理由不知到肥仔希必定會被拒絕入境。因此有理由相信肥仔希早就算準自己不會被拉、而且一定可以及時返回寶島與老妻撐枱腳宵夜。看來他今次之所以跑到紫城來搏拉、是要傳達某些不為外人所知的訊息。

目前萬歲爺正在與扶桑首相安屁晉三和花旗大帝奧黑馬三人賭沙蟹、並且已接近晒冷階段。雖然誰人會被清袋尚是未知之數、總之就是到了關鍵性嘅時刻。若然此時萬歲爺家裡後欄火燭嘅話、肯定會分心。假若一個不留神賠上東海釣魚台不在講、甚至連南海油井都會輸掉、到時想“大腳崛起”恐怕要再等一百年才有望。按照局勢看來、肥仔希今次到來既非攞景亦非贈慶、總之是來者不善就是。